حسین بن علی‌نین (ع) ولادتی باره‌ده چوخلو مختلف روایتلر وار. اونلارین مشهورلاری بونلاردیر: بیر سئری روایتلره گؤره هجرتین دؤردونجو ایلی‌نین شعبان آیی‌نین اوچونده مدینه شهرینده دنیایا گلدی. بعضی روایتلره گؤره‌ده هجرتین اوچونجو ایلی ربیع الاولین آخر گونونده و بعضی روایتلره گؤره هجرتین اوچونجو و یا دؤردونجو ایلی‌نین جمادی الاولین بئشینده دنیایا گلدی. لاپ مشهور روایت اوّلکی روایتدیر. اعلام الوری طبرسی، ص۲۱۳.

او حضرت تقریباً آلتی ایل کرامتلی جدّی اینن و اوندان سونرا تقریباً اوتوز ایل آتاسی اینن و اوندان سونرا تقریباً اون ایل‌ده قارداشی امام حسن اینن (ع) یاشدی.

او حضرتین کنیه‌سی ابا عبدالله ایدی. امام حسینه (ع) چوخلو لقبلر نسبت وئریبلر. اونلارین لاپ مشهورو او حضرتین شهادتیندن سونرا وئریلن سیدالشهدا لقبی‌دیر کی اوّل‌لر پیغمبرین عمیسی حمزه‌یه (رحمةالله علیه) وئریلمیشدی و امام حسینین (ع) شهادتیندن سونرا او حضرته اطلاق اولوندو.

تاریخ دمشق ابن عساكر ترجمة الامام حسین(ع) ص ۲۶ و ۲۷ و اسد الغابة  ج ۲ ص 19- کتابلاریندان حضرت علی‌دن (ع) بئله بیر روایت نقل اولوب: اوغلوم حسن دنیایا گلنده عمیم حمزه‌نین آدینی اونا قویدوم. حسین‌ده دنیایا گلنده او بیری عمیم جعفرین آدنی اونا قویدوم. بیر گون رسول الله (ص) منی چاغیریب دئدی: «من اونلارین اأینی دَییشماغا مأمور اولموشام. اونلاری بوندان سونرا حسن و حسین سسله‌یین».

آدلارین دَییشمه‌سی‌ده المعجم الكبیر طبرانى و طبقات ابن سعد کتابلاریندا نقل اولدوغو کیمی بئله اولور: جبرئیل پیغمبره الله‌دان امر گتیریر کی نوه‌لری‌نین آدلارینی هارونون اوغلانلاری «شبر» و «شبیر» آدینا دَییشسین. پیغمبر ده بو آدلارین عبری اولدغونو و عربی اولمادیغینی دئیینجه تازادان امر نازل اولور کی همان آدلارین عربیسینی یعنی حسن و حسین آدلاری پیغمبرین نوه‌لرینه قویولسون.

رسول الله (ص) نوه‌سی امام حسینی (ع) چوخ ایستردی. مقتل خوارزمى  ج ۱ ص ۱۴۶ و فرائد السمطین ج ۲ ص ۱۳۱ باب ۳۰ کتابلاریندا بئله روایت اولوب: رسول الله صحابه‌سی اینن قوناقلیغا گئدیردی. یول اوستونده اوشاقلارینان بیرلیقدا اوینایان امام حسینی (ع) گؤردو. اونو توتماق اوچون یاخینا یئریدی آما او اویناماق اوچون قاچدی. رسول الله هر طرفه قاچاندا او آیری طرفه قاچیردی.حضرت گوله – گوله اونو قووالادی و نهایت اونو توتوب بیر الینی اونون باشی‌نین دالیسینا و بیر الینی چنه‌سی‌نین آلتینا قویوب آغزیندان اؤپوب بویوردو: «حسین مندندیر و من حسیندن. الله حسینی سئونی سئوسین».

تاریخ دمشق  ابن عساكر ترجمة امام حسین , ص ۱۴۶، کتابیندا عامه‌نین بؤیوک عالملری زید بن ارقم و ابوهریره‌دن نقل ائلیرلر پیغمبر رحلت زمانی دؤشکده اولان زمان اوزون علی، فاطمه، حسن و حسینه توتوب بویوردو: « انـا حـرب لـمن حاربكم و سلم لمن سالمكم؛ سیزینله جنگ ائدنله من‌ده جنگ ائلیه‌جاغام و سیزینله دوستلوق ائله‌ینله من‌ده دوستلوق ائلیه‌جاغام».

سنن ترمذى ج ۱۳ ص ۱۸۹ و مجمع الزواید ج ۹ ص ۱۸۱ کتابلاریندا عمر بن خطابدان بئله نقل اولوب: بیر گون رسول الله‌ی حسن و حسینی چیگنینه آلمیش گؤردوم. اوشاقلارا دئدیم: «نه یاخشی آتیز وار !» رسول الله بویوردو: «بونلار نه یاخشی سوارکاردیلار !»

تاریخ ابن عساكر ترجمه امام حسین(ع) ص ۱۴۹، ده نقل اولوب: مسلمانلار تشییع جنازه‌دن قاییدیردیلار. یول اوستونده امام حسین (ع) یورولوب یولون قیراغیندا اَیلشدی. قوجا یاشندا اولان ابوهریره او حضرتین کناریندا اوتوروب پالتاری اینن حضرتین آیاغی‌نین تورپاغینی سیلدی. حضرت بویوردو: «ابوهریره سن نییه بوایشی گؤرورسن؟» دئدی: «قوی من بو ایشی گؤروم. الله‌ا آند اولسون منیم سنین باره‌نده بیلدیغیمی بو جماعت بیلسه‌یدی سنی بویونلاریندا آپارادیلار».

تاریخ ابن عساكر ص ۲۱۰، کتابیندا بئله روایت اولوب: مدرک بن عماره دئییر بیر گون گؤردوم ابن عباس حسن و حسینین رکابینی توتوب یول آپاریر. اونا اعتراض ائدیب دئدیم: «سن نییه اونلارین رکابینی توتوبسان؟ سن کی اونلاردان یاشلیسان؟!» جواب وئردی: «بو ایکیسی رسول الله‌ین اولادی و اونون جیگر پاره‌لریدیلر، اونلارین رکابینی توتماقدان یوخاری سعادت وار؟»