هرچند امام رضانی (ع) مدینه‌دن غربت یئرلره آپاردیلار آما همین بو ایش اسلام و اهل بیت معرفتی‌نین داها آرتیق توسعه‌سینه سبب اولدو.
امام رضانین (ع) عصری اؤزونه مخصوص خصوصیتلره صاحب ایدی. او گونه قدر ولیعهدلیق آدیندا موقعیت یوخیدی. آما او حضرتین اقداملاری او موقعیتلرین هامیسینی فرصته تبدیل ائله‌دی. امام بو موقعیتدن انحرافی فکرلرینن مبارزه ائله‌ماق اوچون بیر فرصت کیمی استفاده ائله‌دی.
امام رضا (ع) چوخ چتین بیر شرایطده مدینه‌نی اجبارا خراسان مقصدینه ترک ائله‌دی. او زمان اسلام تورپاغی‌نین هر گوشه‌سینده مختلف اتفاقلار جریاندایدی. شورشلر انقلابلار و قتل عاملار مختلف یئرلرده باش وئریردی. بغداد، آذربایجان، بصره و آیری یئرلرده قانلی جریانلار باش وئریردی. آیری طرفدن مأمون قارداشینی اؤلدورندن سونرا اونا تازا مشکل‌لر یارانمیشدی.
بو شورشلرین اچینده علوی‌لری قیامی هامیدان گوجلو گؤروشوردو. علوی‌لرین سایی چوخ ایدی و حکومتین ظلمی مقابلینده قیاما قالخمیشدیلار و بو یولدا چوخلو تلفات‌دا وئرمیشدیلر. مأمونون امام رضانین (ع) ولیعهدلیغیندا اصرارلی اولماسی باره‌سینده بیر نظریه‌یه گؤره مأمون چالیشیردی بو قیام و شورشلردن یاخاسینی قورتارسین. بونا گؤره امامی مدینه‌دن طوسا گتیرتدیردی.
مأمون بو ایشی اینن علوی‌لر بو پیامی وئرمک ایستیردی کی سیزین رئیسیز امامیز حکومتین ولیعهدیدیر داها سیز نه ایستیرسیز؟
مأمون بو ایشی اینن آیری بیر امتیازدا اله گتیرماق ایستیردی. بئله‌لیغینان امامی بللی بیر نقطه‌ده ساخلادی و اسلام دنیاسی‌نین باشاباشیندان اونون گؤرماغا گلنلری یولدا آرادان آپارا بیلیردی. مثلاً خانم معصومه‌نین و نئچه آیری امامزاده‌نین خراسان یولوندا مسموم اولوب شهید اولماقلارینی بو سیرایا یئرلشدیرمک اولار. طوسدا هارونیه آدینا مشهور اولان قویویا 60 علوی‌نین باشی کسیلیب سالیندی.
مأمون مختلف کجلسلری یولا سالماغینان امامی تحقیر ائله‌ماق ایسته‌ییردی آما همین بو جلسه‌لر امامین داها آرتیق تانینماسینا سبب اولوردو.