آيت الله احمد بهشتي دئدي : بحارالانوار كيتابيندا بير روايتده فلسفه نين ردّينده يوخدور. تكجه زاد كي ريوايتلرده فلسفه نين مذمّتينده گليب فلسفه نين جاهيللري و اؤزلرين فيلسوف سايان نادان آداملارا گؤره دير. فارس خبرگوزاريسي نين آيين و انديشه خبرنيگاري نين گوزارشينه گؤره، بوعلي بونيادي نين علمي شوراسي نين عضوي بين الملل فلسفه كونگيره سي نين ايكينجي گونونده، «موتعاليه حيكمتينده دين و فلسفه نين تطابوقي» عونوانلي مقاله سيني ايرائه وئردي.

او سؤزلري نين باشلانيشيندا بونا ايشاره ائله ماغينان كي غرب دونياسيندا شرقين خيلافينا، دينه فلسفه منظريندن باخيبلار و بو اوزدن ديني قبول ائتمه ييبلر، دئدي: شرقده ده بو موريد گوروشوب آما چوخ آزدير ميثال اولاراق «كندي» دينه فلسفه باخيميندان باخيردي. بحارالانوار دا اولان بير حديثين ريوايتينه گؤره او «قورآندا تناقوضلر» آدلي كيتابي يازماغا مشغول ايدي كي ايمام عسكري (ع) تاپيشيريغي نن بو ايشيندن ال چكدي و اؤز يازيلارين يانديردي. دوزدور كي بو حديث واحيد خبردير آما واقعيتده دوزدور.

قوم دانيشگاهي نين رئيسي ايدامه وئردي: تاريخده ده اوخويوروق كي او نئجه دينه احتيراملي باخيردي، بونا گؤره ده اينصافسيزليقدير كي دئياق «كندي»نين دينه فلسفي باخيشي واريدي.

او ايدامه ده بو موريد ده اولان آيري نومونه لره ايشاره ائديب دئدي: «زكزياي رازي» نين باره سينده بير عيدّه اونون تكفيرينه قاييلديلر مثلاً ابو حاتم رازي دئييب او «نبوّت» ي اينانماييب اونو رد ائديردي. آما «ذكرياي رازي» نين طهارت و نجاست باره سينده يازديقلارينا باخساق نظره گلمير كي او فلسفه باخيشي نن دينه منفي باخيشي اولا.

آيت الله بهشتي دئدي: چوخلو فيلسوفلاريميز وار كي دينه فلسفه باخيميندا باخيبلار و اونو سيتاييش ائديبلر مثلاً «ابن سينا» اونداكي معادي عقلاني جهتدن درك ائده بيلمير اونو تعبودّي اولاراق قبول ائدير.

بو فلسفه اوستادي بونا تأكيد ائله ماغينان كي عينادچيل انديشمندلري نن گركمز بحث ائله ماق آرتيردي: بير پارا انديشمندلر نادانليق و كمكارليغا دوچار اولوبلار كي گرك اونلاري هيدايت ائله ماق.

او آيدينلاتدي: «صدرالمتألهين» دين و فلسفه يه، نه عرضي و نه طولي باخيشي وار. اوندان سوروشماق اولماز كي دين منظريندن فلسفه يه باخير يا فلسفه منظريندن دينه باخير و هانسي سي آيريسين رد و نفي ائدير. حقيقتده صدرايي موتعالي حيكمتينده بو سوآللارا يئر يوخدور.

آيت الله بهشتي «ابن سينا» دان بير فيلسوف عونوانيندا كي دين و فلسفه يه جامع باخيشي واريدي، ياد ائديب دئدي: «ابن سينا» ايشارات كيتابيندا دوققوزونجو فصلين اونونجو نمطينده ،اونداكي مشايي لارين عاجيزليغيندان سؤز آپارير، اونلارين ايشتيباهلارينا تأكيد ائدير و دئيير كي او كسلر كي موتعاليه حيكمتينده راسيخديلر اونو درك ائدرلر.

خواجه نصير «حيكمت موتعاليه ده راسيخلر» سؤزونون تفسيرينده دئيير: اونلار او كسلرديلر كي بحث اينن ذوقو بير يئره ييغيبلار و بو آداملار ايشتيباه و خطادان اوزاق قالارلار و بوردادير كي «وحي» ين آياغيدا آرايا گلير.

او «ابن سينا» يا مشايي دئماغي بؤيوك ظولم بيليب آريتيردي: «ابن سينا»نين اؤزوده بو موضوعدان چكينير و آيري دوشونجه و فيكرين داليسي جاندير.

قوم دانيشگاهي نين رئيسي آيدينلاتدي: هئچ عونواندا موتعاعليه حيكمتينده و شرقده فلسفي باخيشيندا دينه منفي باخيش يوخدور. صدرالمتأهلين عقلياتدا ميردامادا و شرعياتدا شئيخ بهايي يه ايستيناد ائدير.

شئيخ بهايي دين منظريندن فلسفه يه منفي باخيشي وار و اوندان بو بئيت معروفدور: «تا كي ز شفا، شفا طلبي/ از كاسه زهر دوا طلبي»

بوعلي بونيادي نين علمي شوراسي نين عضوي بونا تأكيد ائله ماغينان كي فلسفه ردّينده حديث يوخدور، دئدي: بحارالانوار كيتابيندا بير روايت ده فلسفه نين ردّينده يوخدور. تكجه زاد كي ريوايتلرده فلسفه نين مذمّتينده گليب فلسفه نين جاهيللري و اؤزلرين فيلسوف سايان نادان آداملارا گؤره دير، بو باخيش موتكلّيملرين باره سينده ده وار.

آيت الله بهشتي سؤزونون آخيرينده دئدي: ايسلامي ريوايتلرده آيدين سند تاپماق اولماز كي فلسفه نين حقيقتيني يعني «تعلق» ، «تفكر» و عوقلايي و وحياني باخيشني ردّ ائده.