شیخ حر عاملی، «احادیث القدسیه» کتابیندا بئله بیر روایت نقل ائدیب: حضرت داوود ناخوشلور، دعا ائلیر و همیشه اللرینی گؤیه اوزادیب الله الله ائلیردی. وحی گلیر: «چیگینلرین یورولوب اللرین دوشنه قدر یالوارسان‌دا دعانی مستجاب ائتمیه‌جاغام!» او تعجب ائلیر. یئنه وحی گلیر: «من دردی وئریب درمانی‌دا وئرمیشم. سن درمان دالیسیجان گئتمه‌لیسن».

دعانی معناسی ایسته‌ماقدیر آما فقط دیلده ایسته‌ماق دئییل، بلکه دوغرودان ایسته‌ماق معناسیندادیر. دوغرودان دعا ائدن شخص هدفه چاتماق اوچون الیندن گلن هر ایشی گؤرر و اورکده الله‌ین اونا کؤمک ائله‌دیغینا اینانار.