سککیزینجی امامین زمانی، شیعه‌نین خارجی مشکل‌لریندن علاوه داخلی مسأله‌لری‌ده اورک آچان دئییلدی. او دوره‌نین مشکل‌لرینی تانیماق بو گونکی بعضی مشکل‌لرین حلّینه کؤمک اولا بیلر.
امام رضا (ع) زمانی شیعه‌نین ایچینده زیدیه، اسماعیلیه، فطحیه، واقفیه و غالیلر کیمی مختلف فرقه‌لر یاراندی. بو فرقه‌لرین ایچینده شیعه غالی‌لری و واقفیه فرقه‌سی امام رضا (ع) ایله لاپ چوخ مخالفتچیلیغی ائله‌دی.
امام رضانین (ع) امامتینی قبول ائتمه‌ین فرقه
واقفیه فرقه‌سین 183 هجری قمری ایلینده امام موسی کاظمین (ع) شهادتیندن سونرا او حضرتی قائم و مهدی امام ساییب او حضرتده توقف ائله‌ماغینان امام رضانین (ع) اماملیغینی قبول ائله‌مه‌دیلر.
بو فرقه‌نین اؤزونه مخصوص خصوصیتلری، اونون سرعتله رایج اولماسینا سبب اولدو. بو خصوصیتلردن بیری بو فرقه‌نین رهبرلری ایدی. اونلار جماعتین ایچینده یوخاری علمی، اجتماعی و دینی موقعیتلرینه مالک ایدیلر. جماعت اونلارین آدلارینی فقیه، ثقه و مشهور کیمی صفتلرینین همراه ائلیردیلر. اونلارین بعضیسی قاباقکی اماملارین بلا واسطه نماینده‌لری ایدیلر.
واقفیلر اؤز عقیده‌لری‌نین ثبوتی اوچون او زمانین رسانه‌لریندن یعنی کتاب، مختلف کلاسلارین تشکیلی و تحریف اولموش حدیثلرین یایماسی اینن اؤز عقیده‌لرینی یایماغا اقدام ائلیردیلر. اونلارین اساس هدفلری امام کاظمین حضرت مهدی اولماسینی ثابت ائله‌ماغیدی.
اونلار بو ایش اوچون موعود مهدی باره‌سینده اولان چوخلو حدیثلری اؤز نظرلرینه گؤره تفسیر و معنا ائلیردیلر.
امام رضا (ع) بو فرقه‌نین قاباغیندا چوخ شدّتلی دایانیردی. او حضرت واقفیه اینن مبارزه‌ده نئچه ابزاردن استفاده ائلیردیلر:
1.مکاتبه: امام رضا (ع) آتاسی امام کاظمین (ع) نماینده‌لری اولان علی بن ابی‌حمزه بطائنی و زیاد بن مروان قندی و عثمان بن عیسی رواسی‌یه نامه یازیب اونلاردان آتا‌سی‌نین اموالینی او حضرته تحویل وئرماغی ایسته‌دی.
2.شیعه‌لرین شبهه‌لرینه جواب وئرماق: امام رضا (ع) مناظره، دانیشیق و مکاتبه یولو اینن شیعه‌لرین شبهه‌لرینه جواب وئریردیلر و بو یولونان چوخلارینی حقه قایتاردیلار.
3.حدیثلری تحریفدن تمیزله‌ماق: وقفیه طرفیندن تحریف اولان حدیثلرین دوزونو شیعه‌لره دئییب واقفیه‌نین یالانچی اولدوقلارینی جماعته آچیقلادیلار.
4.واقفیلرین ماهیتینی شیعه‌لره تانیتدیرماق: امام رضا (ع) مختلف موقعیتلرده واقفیلرین یالانچی و دنیا مالی دالیسیجان اولدوقلارینی شیعه‌لره دئدیلر و اونلارین ماهیتلرینی تانیتدیردیلار.
5.واقفیه‌نی تحریم ائله‌ماق: امام رضا (ع) اؤز شیعه‌لرینی واقفیه اینن رابطه‌ده اولماق و اونلارا زکات وئرماقدان منع ائله‌دیلر.
6.واقفیلری نفرین و لعن ائله‌ماق: امام رضادان (ع) نقل اولان چوخلو حدیثلرده او حضرتین واقفیلری نفرین و لعن ائله‌ماغی مطرح اولوب. بو حدیثلرین زمانلاری نظرده آلینیرسا او حضرت امامت دورانی‌نین چوخونو اونلارینان مبارزه‌ده ایدیلر.
مثال اوچون امام رضانین (ع) ابوسعید مکاری‌نی نفرین ائله‌ماغی نقل اولوب. امام اونا بویوروب: « الله چیراغینی سؤندورسون و ائوینه یوخسوللوق گتیرسین . . . سنی گؤروم قارداشسیز قالاسان! سنین منیم شیعه‌م دئییلسن . . .» ابوسعیدین اورگی کور ایدی سونرالار گؤزلری‌ده کور اولدو.
7.اؤز علمی کرامتلرینی ارائه وئرماغینان: حضرت او علمی کرامتلرینی بیان ائله‌ماغینان یولدان آزمیش شیعه‌لری دوز یولا قایتارماغا چالیشدی و جهالت اوزوندن منحرف اولانلاری حق یولونا قایتارا بیلدی.