عتبات سفرینه گئدنلرین چوخو فقط امام حسین (ع) و حضرت
ابوالفضلین (ع) مبارک مزارلارینی زیارت ائلیرلر بیر حالداکی بو کرامتلی انسانلارین
کناریندا آیری مکانلار دا واردی. بو یازیدا اونلارین نئچه‌سینی گتیریروق:
حرمین رواقلاری
1ـ شهیدلرین مقبره‌سی
ضریحین جنوب غرب ضلعینده، کربلا شهیدلری‌نین
قویلانان یئری‌نین علامتی اولان
پولاد پنجره وار. بو پنجره‌نین اوستونه شهیدلرین
آدی یازیلمیش قارا رنگده تابلو وورولوب.
حرمین تعمیرات دایره‌سی
شهیدلر مقبره‌سینه ده چاتیب و
بوندان اوّل ضریحین جنوبو و اونون اطرافی باغلیدی.
2ـ مریم نخلی
ضریحین تقیریباً ایکی مترلیغیندا یوخاری طرفین جنوب
دیواریندا، مریم نخلی آدیندا محراب وار. بو محراب، حضرت عیسی‌نین ولادتینده حضرت
مریمین مستقر اولدوغو نخلین یئریندن علامتدیر. قرآن کریمین مریم سوره‌سی‌نین 22-25 آیه‌لرینده اشاره ائله‌دیغی اوزاق یئر:
«پس [مریم عیسی‌یه] حامله اولدو و اوزاق بیر یئره پناه آپاردی. دوغوم
آغریسی اونو بیر خرما آغیجی‌نین تنه‌سینه طرف چکدی. دئدی: «کاش بوندان اوّل اؤلموش اولایدیم و
بیر دفعه‌لیق یاددان چیخمیش اولایدیم. [آیاغی‌نین] آلیتیندا [بیر
ملک] اونا سسلندی کی غم یئمه؛ سنین الله‌ین [آیاغی‌نین] آلتیندا سو چشمه‌سی یارادیب. خرما
آغاجینی اؤزونه طرف چک کی سنین اوچون تازا خرما تؤکولسون.
بعضی روایتلرین اشاره ائله‌دیغی کیمی مریم
شامدان چیخاراق کربلایه گلیب امام حسینین (ع) شهادت یئرینده عیسی‌نی دنیایا گتیریب.
مریم نخلی محرابی سلطان اویس جلائری‌نین امری اینن دوزَلیب و 1366 هجری قمری ایلینده طاهر قیسی‌نین الی اینن
آرادان گئدیب.
حرمین اطرافی
امام حسین (ع) صحینی‌نین اطرافینا خیابان چکیلنده چوخلو تاریخی بنالار آرادان
گئتدی. او جمله‌دن صغیر صحن، حسن خان مدرسه و مسجدی، زینبیه مدرسه‌سی، صدر مدرسه‌سی و جامع ناصری‌یه اشاره ائله‌ماق ولار.
مسجد الرأس مدرسه‌سی
باب السدره‌دن خارج اولاندا، ساغ
الده مسجد الرأس واریمیش. مسجدین وسطینده کیچیک حوض واریمیش کی دئییلنلره گؤره
عاشورا گونو امام حسینین (ع) مبارک باشینی کسندن سونرا بورا قویموشدولار. یئنه
دئییلنلره گؤره مطهر باشی بدنه الحاق ائله‌ین
زمان مقدس باشی بیر گئجه بوردا ساخلاییب سونرا بدنه ملح ائله‌میشدیلر.
حر بن یزید ریاحی‌نین
مزاری
جناب حرّین پیکرینی، قبیله‌سی
کربلانین بئش کیلومتر غربینده‌کی کندده
قویلاییبلار. اورا ایندی حرّ منطقه‌سینه معروفدور.
ایندیلیقدا بو منطقه کربلا شهری محدودسینده‌دیر.
بو شهیدین مزاری 370 هجری قمری ایلینده، عضدالدوله دیلمی
زمانی دوزلدی. 914 هجری قمری ایلینده شاه اسماعیل صفوی بنانی تازالادی. ایندیلیقدا
تازا بنا دوزلتماق اوچون مزار تخریب اولوب.
امام حسین (ع) حرمی‌نین
کتابخاناسی
بو یئر «مکتبة و دار مخطوطات الروضة الحسینیة المقدسة»
آدینا معروفدور. بو کتابخانین قفسه‌لری و وسعتلی مطالعه
سالونی هامی‌نین اوزونه آچیقدیر.
ملا محمد فضولی‌نین
مقبره‌سی
ملامحمدبن سلیمان فضولی، بؤیوک شیعه عالم و شاعریدیر.
کربلا شهرینده آذربایجانلی خانواده‌ده دنیایا گلیب. او اونونجو
عصرین لاپ بؤیوک شاعری کیمی تانینیر. فضولی‌نین
مزاری باب القبله‌نین ساغ الینده و
خیابان قیراغیندادیر. فضولی‌نین اوچ عربی، تورکی،
و فارسی دیلینده دیوانیندان علاوه امام حسینین (ع) مقتلی باره‌ده
تورک دیلینده «حدیقة السعدا» آدیندا کتابی وار.