علامه طباطبایی اؤز «سنن النبی» کتابیندا رسول الله‌ین سیره‌سی باره‌ده بئله یازیر:
رسول الله (ص) ائوده‌کی واختلارینی اوچ یئره بؤلموشدولر: بیر قسمتینه عبادته حصر
ائلیردیلر، بیر قسمتینی خانواده‌یه اختصاص وئریردی و بیر بؤلومونو ده اؤزلرینه آما اؤزلرینه
مخصوص ائدن واختلارینی‌دا جماعت اینن پایلاشاردی.
امام حسیندن (ع) نقل اولور: آتامدان، رسول الله‌ین ائوده‌کی رفتاری و نئجه
یاشادیغی باره‌ده سوروشدوم. بویوردو: ائوه گئتمه‌سی اؤز
اختیاریندایدی. ائوه گئدنده، زمانینی اوچ یئره بؤلردی؛ بیر بؤلومونو الله عبادتینه
حصر ائلردی، بیر قسمتینی خانواده‌یه اختصاص وئریردیلر و بیر بؤلومونو ده اؤزلرینه، آما
اؤزلرینه مخصوص ائدن واختلارینی‌دا جماعت اینن پایلاشاردیلار و خواصین ایشیندن فارغ
اولاندان سونرا جماعتین ایشینه یئتیشردی و اوندان اؤزو اوچون زمان ساخلامازدی. او
حضرتین جماعت اینن رفتاری ائله‌یدی کی فضل اهلینه آرتیق عنایت ائلردی و هر کسه دینده اولان
فضیلتینه گؤره احترام ائلردی. بعضیلرینین بیر حاجتی، بعضیلرینین ایکی حاجتی و
بعضیلرینین بیر نئچه
حاجتی اولاردی. حضرت اونلارا یئتیشردی و اونلاری اؤز ایشلری و جماعتین ایشلری‌نین حلّینه مشغول
ائلردی. ایشلری‌نین نئجه‌لیغیندان سوروشاردی و لازم اولان سؤزلری اونلارا دئیَردی و
بویوراردی: حاضرلر غایبلره چاتدیرسینلار و منه الی چاتمایانلارین حاجتینی منه
چاتدیرسینلار. چونکی الی سلطانا چاتمایانین حاجتینی سلطانا چاتدیران شخصین
قدملرینی الله قیامت گونو ثابت و محکم ائلر. او حضرتین مجلسینده بو سؤزلردن ساوای
آیری سؤز دئییلمزدی و هئچ کسدن اوندان غیرینیه قبول ائله‌مزدی. اونلار فیض
و علم اؤرگشماقدان اؤترو حضرتین حضورونا شرفیاب اولاردیلار و بیر شئی اؤرگشمه‌میش
داغیلمازدیلار و او مجلسدن قاییداندان سونرا اؤزلرینه گؤره یول گؤرسه‌دن اولوردولار.
امام حسین (ع) آیری روایتده بویورور: آتام امیرالمؤمنیندن (ع) رسول الله‌ین (ص) ائودن
ائشیکده‌کی رفتاری باره‌ده سوروشدوم. بویوردو: رسول الله
دیلینی لازم اولمایان سؤزلردن ساخلاردی. جماعت اینن انسیّت قوراردی و اونلاری
اؤزوندن اورکوتمزدی. هر تایفانین بؤیوگونو عزیز سایاردی و اونو اونلارا باشچی
قوشاردی. دوستلاری‌نین سوراغینی توتاردی و جماعتدن آؤالاریندا اولانلاردان
سوروشاردی. یاخجی ایشلری تشویق و قولای ایشلری پیسله‌ییب آلچاق
سایاردی. ایشلرده اعتدالی رعایت ائلردی افراط تفریطه دوشمزدی. جماعتدن غافل
اولمازدی مبادا اونلار منحرف اولالار. حقدن آلچاق گلمزدی و آرتیغینا دا تجاوز ائله‌مزدی. او حضرتین
اطرافینداکیلار جماعتین یاخجیلاری ایدیلر و حضرتین نظرینده اونلارین لاپ یاخجیسی
مسلمانلارا داها خیرخواه و داها اورک یاندیرانی ایدی و اونلارین لاپ بؤیوگو دینی
قارداشلاری اینن داها آرتیق همکارلیق ائله‌ین و دردلَشَن ایدی.
امام حسین (ع) بویورور: آتامدان رسول الله‌ین (ص) مجلسیندن
سوروشدوم. بویوردو: او حضرت هئچ مجلسده الله یادی اولمادن اوتوروب دورمازدی.
مجلسلرده اؤزونه مخصوص یئر سئچمزدی و بو ایشدن‌ده نهی ائلردی.
هر جمعه داخل اولاندا بوش اولان یئرده اوتوراردی و آیریلارینا دا بئله ائله‌ماغی امر ائلردی.
مجلسده‌کیلرین
هامیسی‌نین
حقّینه ادا ائلر و اونلارین هئچ بیری رسول الله یانیندا آیریسی‌نین اوندان داها
عزیز اولماسینی حسّ ائله‌مزدی. هر کس اینن دانیشسایدی اونون دوروب گئتمه‌سینی گؤزلردی. اوندان
حاجت ایسته‌ین، حاجتینه چاتمامیش یا دا او حضرتدن اورگی قئییم
اولماسینا سبب اولان بیر سؤز ائشیتمه‌میش قاییتمازدی. اونون یاخجی خصلتی
هامی‌یا شامل
ایدی. بیر حدّه‌جن کی هامی اونو اؤزلرینه مهربان آتا بیلردیلر. هامی حقده
اونو یانیندا یکسان ایدی. اونون مجلسی حلم، حیا، صداقت و امانت مجلسی ایدی. اوردا
بیری‌نین سسی
اوجالمازدی و هئچ کسی آبریسی گئتمزدی. بیری‌نین‌ده سهوی اولسایدی
آیری یئرده دئییلمزدی. مجلس اهلی بیر بیری ایله عدالتلی رفتار ائلردیلر. و
دوستلوقلاری تقوا اساسیندا اولاردی. متواضع ایدیلر. بؤیوکلره احترام ائلردیلر و
کیچیکلره مهربان ایدیلر. احتیاجی اولانلاری مقدم ائلردیلر و غریبلردن موغایات
اولاردیلار.
حضرت بویورور دئدیم: پیغمبرین (ص) سیره‌سی مصاحبلر اینن نئجه ایدی؟ بویورد:
همیشه اوزو گولر و خوش اخلاق ایدی. چوخ گولن، باشی بوش، پیس آغیز، عیب آختاران،
یالتاق و خشن دئییلدی. رغبتی و میلی اولمایاندان غفلت ائلردی. آرزیلیلار اوندان
مأیوس اولمازدیلار. اؤزونو تأکیداً اوچ شئیدن اوزاق ساخلاردی: «جدل و سؤز
گولشدیرماق، چوخ دانیشماق و فایداسیز سؤز دانیشماق». جماعت باره‌سینده ده اوچ
شئیدن اوزاق گزردی: «هئچ کسی دانلامازدی، بیری‌نین اشتباهلار و
سهولرینی آختارمازدی، هئچ کسین عیبی‌نین دالیسینی توتمازدی». ثواب و فایداسی اولمایان یئرده سؤز
دئمزدی. سؤز دانیشاندا مجلس اهلی باشلارینا قوش قونموش کیمی ساکت و حرکتسیز قولاق
آساردیلار. حضرت سؤزونو قورتاراندان سونرا دانیشیغا باشلاردیلار و او حضرت اینن
سؤز گولشدیرمزدیلر. بیری دانیشاندا سؤز باشا چاتینجا هامی ساکتجه اونا قولاق
آساردیلار. حضرتین محضرینده نوبه اینن دانیشاردیلار. مجلسین گولدوغو شئیه گولردی و انلارین
تعجب ائله‌دیغینا تعجب ائلردی. غریبه‌لرین ایستگی و
دانیشیقلاریندا اولان ادبسیزلیغا، صحابه‌نین مزاحم شخصی جلب ائلیه‌نه قدر دؤزردی.
بویوراردی: حاجتلی بیرینی گؤرسز اونا کؤمک ائله‌یین. تشکر ائله‌ماق قصدی اینن
اولماسایدی، بیری‌نین مدحینی و تعریفینی قبول ائله‌مزدی. حدّینی
آشماسایدی بیری‌نین سؤزونو کسمزدی، حدّی آشیلان زمان اونو نهی ائله‌ماغینان و یا
قالخماغینان اونون سؤزونو کسردی.
امام حسین (ع) بویورور: سونرا رسول الله‌ین ساکتلیغیندان
سوروشدوم. آتام بویوردو: او حضرتین ساکتلیغی دؤرد ستونا دایانمیشدی: حلم، حذر،
تقدیر و تفکر. تقدیرده ساکتلیغی بو ایدی کی جماعتی بیر گؤزده گؤرردی و هامی‌نین دانیشیغینا
بیر اندازه قولاق آساردی. تفکرده ساکتلیغی بو ایدی کی فنالی و فناسیز شئیلر باره‌سینده دوشونردی.
حلمده ساکتلیغی‌دا دؤزوم اینن حلم بیرلیقدا اوندا اولاردی ائله کی هئچ زاد
اونو غضبلندیرمزدی و اؤزوندن چیخارتمازدی. حذرده ده ساکتلیغی دؤرد موردده ایدی:
آیریلارین اوندان تبعیت ائله‌مه‌سی اوچون یاخجی ایشلر گؤرردی. آیریلارین اوزاق گزمه‌سی اوچون پیس
ایشلردن اوزاق گزردی. امّتین اصلاحینا دوز یول گؤرستماق اوچون چالیشاردی و دنیا
وآخرتین خیری اولان ایشه اقدام ائلردی.