قرآنا اینانان انسان نمازا لازمی قدر اهمیّت وئرر و نماز اونو پیسلیقلاردان و چیرکینلیقلاردان اوزاق ساخلار.
جامعه‌نین مشکل‌لرینی حل ائله‌ماق اوچون اونلاری یاراندیغی نقطه‌دن درمان ائله‌ماق لازمدی. مشکل‌لری و اونلارین یارانما علّتلرینی بیلساق اونلارین حلّینه موفّق اولا بیلریک. قرآنین تأکید ائله‌دیغی مسأله‌لرین بیری ده فرهنگی مسأله و الگو گؤتورمک مسأله‌سیدیر.
عربلرین بیر مثلی وار دئییر: «الناس علی دین ملوکهم». جامعه‌ده بیر سئری الگولر وار کی جماعت اونلارا اسوه و نمونه کیمی باخار؛ اؤلکه مسئوللاری، روحانیلر، ورزشکارلار و سایر. بئله انسانلارین پاک و دوزگون اولماسی جامعه‌نین مثبت طرفه گئتمه‌سینه سبب اولار. جامعه‌نین اصلاحی بوردان باشلانسا، نمونه و الگو اولان انسانلارین دانیشیغی، عملی، اؤزگه‌نین حقّینی رعایت ائله‌ماغی، امانت‌دارلیغی و ظاهری دوزگون اولسا جماعتین فرهنگی مثبت صورتده دَییشر.
جامعه‌ده اولان بوشانما، خشونت، قتل و آیری مشکل‌لری قرآن اینان حل ائله‌ماق اولار. بونلارین یارانماسی‌نین اساس سببی قرآن تعلیماتیندان اوزاق اولماقدیر. ایندی بو اوزاق اولماق اولا بیلر قرآنی دانماغینان اولسون و یا ظاهرده قرآن اوخویوب عملده اونون ترسینه عمل ائله‌ماغینان اولسون.
یوخسا بیری دوغرودان قرآنا اینانسا، و نماز قیلماغین شرایطینی یئرینه یئتیرسه هئچ کسین حقّینی یئمز، هئچ کسه ظلم ائله‌مز، یئدیگی‌نین حرام حلال‌لیغینا فکر وئرر و بئله‌لیغینان بوتون پیسلیقلاردان اوزاق اولار.