پیغمبر (ص) حضرت زهرانین (س) عبودیّت مقامی باره‌ده بویوربلار: «فاطمه عبادت محرابیندا دایاناندا اونون ایشیغی گؤیده‌کی ملکلره پاریلدا، گؤیده‌کی اولدوزلارین یئر اهلینه پاریلدادیغی کیمی. ( «فاطمه الزهرا من المهد الی اللحد، ص 277، بحارالانواردان»)

هر مسلمان انسانین وظیفه‌لریدن بیری الله اینان رابطه قورماقدیر و اسلامدا بو ایشه عبادت دئییلیر. انسانین یارانما فلسفه‌سی‌ده عبادت و الله اینان هر طرفلی رابطه باغلاماقدیر. الله تعالا قرآنین کریمین الذاریات سوره‌سی‌نین 56-جی آیه‌سینده بو باره بویورور: «وَمَا خَلَقْتُ الْجِنَّ وَالْإِنسَ إِلَّا لِیَعْبُدُونِ، جن و انسی فقط منی عبادت ائله‌ماقدان اؤترو یاراتدیم».

اسلامدا عبادتین مختلف اقسامی وار کی نماز کیمی بدن عبادتی، خمس کیمی مالی عبادت و حج و جهاد کیمی مال و بدن عبادتینه شامل اولور.

عبادتین خاص معناسی خالص و ایلاهی نیّت اینن اولان عمل‌لردیر. آما عبادتین عام معناسی، ظاهری عبادی اولمایان عمل‌لردیلر کی اونلاردا انسانی الله‌ـا یاخینلاتماق گوجو وار و عبادی عمل‌لره تبدیل اولا بیلرلر. تجارت، مطالعه و ایشله‌مک کیمی عمل‌لر کیمی گونده‌لیق گؤردوغوموز ایشلر. آیری سؤزونن عبادتی ایکی یئره بؤلماق اولار: واجب اولان عبادتلر، مستحب اولان عبادتلر.

حضرت فاطمه زهرانین (س) عابده، راکعه، ساجده، صوامه و قوامه کیمی مبراک لقبلری وار. او حضرت نه اینکی اؤزو عبادت اهلی ایدی بلکه عابدلرین الگوسی ساییلیر. بونا گؤره او حضرتین عبادی سیره‌سینی تحقیق ائله‌ماق و عبادت قسملرینی او حضرتین عبادتلری اینن تطبیق ائله‌ماق لازم ایشلردن ساییلیر.

حضرت زهرانین (س) ائوینده عبادت اوچون بیر محراب واریدی کی بو ایش اسلامی روایتلرده اونا تأکید اولموش ارزشلی و مستحب بیر عمل ساییلیر.

او حضرتین یاشاییشیندا وقت شناسلیق مخصوصاً عبادت باره‌سینده وقت شناسلیق چوخ جدّی صورتده رعایت اولونوردو. بو زمینه‌ده او حضرتین سحر تئزدن آییلماسی، جمعه‌نین آخشام ساعتلریندن عبادت اوچون استفاده ائله‌ماغی، گون باتان زمانلاردا عبادت و مناجات ائله‌ماغی دقتّه لایق مقاملاردان ساییلیر.

او حضرتین عبادتلری همیشه حضور و معنویّت اینن دولو اولوردو. بو کیفیّتین کناریندا او حضرتین عبادتلری کمیّت باخیمیندان‌دا چوخ اولاردی. قرآن کریمین مزمل سوره‌سی‌نین 20- جی آیه‌سینده بئله گلیب: « إِنَّ رَبَّکَ یَعْلَمُ أَنَّکَ تَقُومُ أَدْنَى مِن ثُلُثَیِ اللَّیْلِ وَنِصْفَهُ وَثُلُثَهُ وَطَائِفَةٌ مِّنَ الَّذِینَ مَعَکَ وَاللَّهُ یُقَدِّرُ اللَّیْلَ وَالنَّهَارَ عَلِمَ أَن لَّن تُحْصُوهُ فَتَابَ عَلَیْکُمْ فَاقْرَؤُوا مَا تَیَسَّرَ مِنَ الْقُرْآنِ عَلِمَ أَن سَیَکُونُ مِنکُم مَّرْضَى وَآخَرُونَ یَضْرِبُونَ فِی الْأَرْضِ یَبْتَغُونَ مِن فَضْلِ اللَّهِ وَآخَرُونَ یُقَاتِلُونَ فِی سَبِیلِ اللَّهِ فَاقْرَؤُوا مَا تَیَسَّرَ مِنْهُ وَأَقِیمُوا الصَّلَاةَ وَآتُوا الزَّکَاةَ وَأَقْرِضُوا اللَّهَ قَرْضًا حَسَنًا وَمَا تُقَدِّمُوا لِأَنفُسِکُم مِّنْ خَیْرٍ تَجِدُوهُ عِندَ اللَّهِ هُوَ خَیْرًا وَأَعْظَمَ أَجْرًا وَاسْتَغْفِرُوا اللَّهَ إِنَّ اللَّهَ غَفُورٌ رَّحِیمٌ، حقیقتاً الله تعالی بیلیر کی سن و سن اینن اولانلار گئجه‌نین اوچدن بیرینه یاخین و یا یاریسینی و یا اوچدن بیرینی [نمازا] قالخیرلار. و گئجه گوندوزو اؤلچن فقط الله‌دیر. [او]بیلیر کی [سیز] اونون حسابینی ابداً ساخلایا بیلمزسیز‌. اونا گؤره سیزی باغیشلار. [ایندی] امکانیزدا اولان قدر قرآندان اوخویون. [الله] تئزلیکله آرازدا ناخوشلارین اولدغونو بیلیر و آیری [بیر تعداد دا] یئر اوزونده سفر ائدیب الله روزیسی‌نین دالیسینجادیلار. و [بیر عدّه‌ده] الله یولوندا جهاد ائلیرلر. پس هر نه امکانیزدا اولورسا [قرآندان] اوخویون و نماز قیلیب زکات وئرین و الله‌ـا حسنه بورج وئرین و بوتون یاخشی ایشلری اؤزو اوچون قاباقجادان یوللایین. اونو الله یانیندا و داها آرتیق اجرینن تاپاجاقسیز. و الله‌دان باغیشلانماق ایسته‌یین کی الله مهربان باغیشلایاندیر».