اما صادق (ع) بویوردو: «بو شهرده (قم شهرینده) منیم اوشاقلاریمدان بیر خانیم دنیادان گئده‌جاق، اونون آدی فاطمه، موسی‌نین (ع) قیزیدیر کی اونون شفاعتی اینن منیم شیعه‌لریم جنّته گئده‌جاقلار.
نه یاخشی کی او کرامتلی خانیمی اهل بیتین دیلی اینن تانیاق.
امام صادق (ع) بویوردو: «الله‌ین حرمی وار کی مکّه‌دن عبارتدیر. پیغمبرین (ص) حرمی وار کی مدینه‌دن عبارتدیر. امیرالمؤمنینین (ع) حرمی‌ده کوفه‌دیر . . . بهشتین سککیز قاپیسی وار کی اوچو قم شهریندندیر؛ بو شهرده بیزیم اوشاقلاردان بیر خانیم دنیادان گئدر، اونون آدی فاطمه، موسی‌نین (ع) قیزیدیر کی اونون شفاعتی اینن منیم شیعه‌لریم جنّته گئده‌جاقلار. [1]
قم شهرینده امامزاده‌لری چوخو دفن اولوب کی هر بیری‌نین یوخاری مقاملاری وار. آما اماملاریمیزی (ع) فقط موسی بن جعفرین (ع) قیزی‌نین زیارتیندن دانیشیبلار. ائله بو مسأله بو کرامتلی خانیمین یوخاری معنوی مقامی‌نین علامتی ساییلیر.
او کرامتلی خانیمین شخصیّتی باره‌ده نئچه مسأله‌یه دقّت یئتیرماق لازمدیر:
1. قارداشی امام رضانین (ع) مروه مجبوری هجرتیندن سونرا، اوننان گؤروشماق اوچون مروه طرف یوللانماسی. آما تاریخچیلرین یازدیغینا گؤره بو سفر باشا چاتمادی و حضرت معصومه (س) ساوه شهرینده ناخوشلادی و قم شهرینه آپاریلماسینی امر بویوردو و ائله بو شهرده دنیادان گئتدی. [2]
او حضرتین بو اوزون مسیر و سفرین چتینلیقلارینا و مخصوصاً مأمون حکومتی طرفیندن اولان تهدیدلره رغماً مدینه‌دن مروه حرکتی، بو کرامتلی خانیمین سیاسی و اجتماعی شخصیتیندن خبر وئریر.
2 . بو سفرده مریض اولاندان سونرا، و قارداشی امام رضایا (ع) چاتماقدان مأیوس اولاندان سونرا، قم شهری‌نین گله‌جاقداکی فرهنگی موقعیّتینه گؤره بو شهره آپاریلماسینی امر بویورور کی صفالی حرمی اهل بیت (ع) عاشقلرین مأمنینه چئوریلسین.
بو تصمیم یعنی قم شهرینه گئتماق مری، او حضرتین فرهنگی باخیشا صاحب اولماقلاریندان خبر وئریر. او حضرتین زندگانلیغین مطالعه ائله‌ینده اونون مشهور لقبلرین «محدثه»[3] اولدوغونو گؤروروک.
او، طاهر اجدادیندان چوخلو روایت نقل ائدیب، هابئله حدیث عالملرین بیر عدّه‌سی او حضرتدن حدیث نقل ائدیبلر. او جمله‌دن «مسلسل فواطم»ـه[4] مشهور اولان خبره اشاره ائدیریک کی او حضرت سندلر سلسله‌سینده وار:
بکر بن احمد قصری امام رضانین (ع) قیزی فاطمه‌دن، او دا امام کاظمین قیزلاری فاطمه (حضرت معصومه) و زینب و ام کلثومدن، و اونلاردا امام صادقین (ع) قیزی فاطمه‌دن روایت ائدیبلر و بو حدیثین سندی حضرت فاطمه زهرایا (س) چاتیر کی بویوردو: غدیر بایرامی گونو، رسول الله‌ین امرینی یاددان چیخاردیبسیز کی بویوردو: «من کنت مولاه فعلی مولاه».[5]
هابئله بو سلسله سند اینن آیری بیر روایت کی معراج حدیثینه مربوطدور. [6]
نتیجه‌ده:
1. اماملارین (ع) سؤزلریندن استفاده اولوندوغو کیمی، حضرت معصومه‌نین (س) یوخاری معنوی شخصیّتی وار.
2. او حضرتین زندگانلیغیندان بللی اولدوغو کیمی حضرت معصومه‌نین (س) سیاسی و فرهنگی شخصیّتی‌ده چوخ یوخاری ایدی.
منبعلر:
[1] . قمی، عباس، سفینة البحار، ج 2، ص 376.
[2] . قمی، عباس، همان، ص 376؛ حکیمی، محمد، حضرت معصومه و شهر قم، معاصر، اسلامی تبلیغات دفتری‌نین انتشارات مرکزی ، قم، ایکینجی چاپ، 1376، ص 41 ـ 40.
[3] . محمدحسون؛ ام علی مشکور، اعلام النساء المومنات، اسوه انتشاراتی ، بیرینجی چاپ، 1411 هـ . ق، ص 577.
[4] . قمی، عباس، همان، شیع و فطم سؤزلری.
[5] . شافعی، شمس الدین محمد، اسنی المطالب، مکتبه الامام امیرالمؤمنین، اصفهان، ص 50.
[6] . مجلسی، محمدباقر، بحارالانوار، داراحیاء التراث العربی، بیروت، ج 65، ص 76، ح 136.