غلو و مبالغه، حددن آرتیق اعتقادا و اینانماغا دئییلیر. آما هر حددن آرتیقا
غلو دئییلمز، بلکه حدّین اؤزونو ده تأثیر آلتینا آلان مبالغه‌یه غلو دئییلیر.
امام رضانین (ع) امامت دؤرانی (203-183 ق.) کلام باخیمیندان سنّیلر -یعنی
معتزله‌لر- و مختلف شیعه جریانلارینا یوخاری اهمیّتی وار. مخصوصاً امامین (ع)
قاباغیندا دایانان شیعه جریانلاری آیری دؤره‌لرده باش وئرمه‌دی.
او زمانین لاپ خطرلی جریانی واقفیه ایدی کی هئچ امامین قاباغیندا بو وضع و
شدّتینن دایانمادی.
اسماعیلیه، زیدیه و فطحیه کیمی آیری جریانلار ایکینجی رتبه‌ده یئر آلیردیلار.
امام صادقین (ع) غالی‌لرینن گوجلو مبارزه‌سینه گؤره اولا بیلر اونلار امام رضانین
(ع) زمانیندا ائله‌ده فعالیّت ائلیه بیلمیه‌یدیلر. آما عیون اخبار الرضا و آیری
کتابلارا مراجعه ائدنده او جریانین چوخ فعال اولماسی و امامین اونلارینان مبارزه
ائله‌مه‌سینه شاهد اولوروق.
امام رضادان (ع) چوخلو روایت، غالی‌لرین قاباغیندا دایانماق مضمونو اینن نقل
اولوب. روایتلرین بیرینده عیون اخبار الرضا کتابیندا او حضرت امامین روحی و جسمی
مشخصاتی ساییر کی زمان اهلینه شبهه یارانماسین. مثلاً «الامام یولد و یَلِد؛»، «یصح
و یمرض»، «یأکل و یشرب»، «ینکح و ینام»، «یفرح و یحزن»، «یحیی و یمیت» و ...
امام رضادان آیری روایت نقل اولوب کی بویورور: «لا ترفعونی فوق حقی فانّ الله تبارک
و تعالی إتّخذنی عبداً قبل أن یتّخذنی نبیاً» منی اؤز رتبه‌مدن داها یوخاری
قووزامایین کی الله تعالی منی نبیّ ائله‌مه‌میشدن اوّل عبد قرار وئریب.