امویلرین جماعتی تحمیق ائله‌ماقلاری.

اموری‌لر، ریشه‌سیز حکومتلرینی آیاق اوستونده ساخلاماق اوچون هر ایشه ال ووردولار. بونا گؤره نه اینکی تعصّب و غارتچیلیقدان نهایت استفاده‌نی ائله‌دیلر، بلکه بو خصلتی ساخلاماق اوچون جماعتی جهالتده ساخلیدیلار کی اونلارین جهالتی‌نین کؤلگه‌سینده، چؤرکلرینی خلافتین ایستی تندیرینه یاپیشدیریب جماعتین خبرسیزلیق بولانلیق سویوندان، حاکمیّت بالیغینی صید ائله‌سینلر. ائله بونا گؤره فرهنگ تبلیغینی، تعلیمینی، دوز تبلیغی و یازیب اوخوماغی قده‌غان ائله‌دیلر. شام شهرینه اونلارینان مخالف بیری وارد اولاندا اونو جماعتینن ارتباطدا اولماغا مانع اولوردولار.

مثلاً هشام بن ملک، اموی‌لرین اونونجو خلیفه‌سی، امام باقردن (ع) سؤز دوشنده دئیَردی: او باقر العلوم، وصی الاوصیا و انبیاء وارثیدیر. آما او حضرتی مدینه‌دن شاما گتیرنده و شام جماعتینی او حضرته یاخینلاشماسینی گؤرنده، فوراً او حضرتین مدینه‌یه قایتاریلماسی‌نین امرینی وئردی. مبادا جماعت اهل بیت (ع) فرهنگی و حقّ اینن تانیش اولسونلار. چونکی غارتچیلر او زمانا قدر، جامعه‌یه مینه بیلرلر کی جماعت جهلده و خبرسیزلیقدا باش آپارسین.

جماعتین فرهنگی و علمی رشدی اولماسا و عمل میدانیندا جدّی اولماسالار، جامعه رهبری علی بن ابیطالب‌ (ع) و یا حسین بن علی‌ده (ع) اولسا، هر عصرین اموی‌لری سلطه تاپار.

گؤزل پیغمبریمیز بویوروب: تعلیم هر انسان اوچون تنفّس و سو ایچماق کیمی هر انسانا واجبدیر. یعنی نئجه‌کی دئیه بیلمز: نفس چکمیرم کی اؤلم، سو ایچمیرم کی اؤلم و . . . بلکه واجبدیر کی اؤلمه‌ماق اوچون نفس چکیب سو ایچسین، ائله همان جور ده تعلیم آلماق  و علم جلسه‌سی تشکیل وئرماق، علمی سؤزلره قولاق آسماق، علمی کتابلار اوخوماق و علمی فیلملر گؤرماق اونا واجبدیر. طلب العلْم فَریضةٌ علی کلِّ مُسلمٍ ومُسلمةٍ (بحار، ج۱، ص۱۷۷)

بونا گؤره سوادلی اولماق، مطالعه ائله‌ماق، حق و باطلی آییرا بیلماق، گون مسأله‌لرینده آگاه اولماق، توغلانماماق و جاهل قالماماق لازم و واجب مسأله‌لردن ساییلیر کی اسلام اونلارا تأکید مؤکد ائله‌ییب. البته بو ایشلرین بعضیسی کفایی و بعضیسی عینی واجبدیر.

اهل بیتین (ع) مدینه‌دن هجرتی

اموی‌لر جماعتین رابطه‌سینی مدینه و مکه شهرلری اینن تحریم ائله‌میشدیلر و بو شهرلره گئدنلر نظر آلتیندا اولوردولار. امیر المؤمنین (ع) و امام حسین (ع) بو وضعیته گؤره بو شهرلردن چیخیب کوفه‌یه گئتدیلر کی شام اهلینه داها یاخین اولوب اونلاری هدایت ائله‌ماغا امکان تاپسینلار.