آتن دانشگاهی‌نین
فلسفه اوستادی پروفسور موچوپولوس
اوستاد جعفری‌نین
اساس دغدغه‌سی، بشریّتین مقصدی و گله‌جاغیدی. معاصر جامعه‌نین معضل‌لری و مسأله‌لریندن
چوخلو تجربه‌سی اولان بیر محققیدی و اؤزونو بو مسأله‌لردن گیزلتماغا چالیشمیردی.
بحثه و
دانیشیغا عادتیمیز واریدی، مخصوصاً تکنولوژی باره‌سینده کی ساعتلر اوزاناردی. اونا
گؤره تکنولوژی، انسان تمدّنینده منفی تأثیر قویور، چونکی باطنده‌کی کمالا بروز
امکانی وئرمیر. تکنولوژی فقط وسیله و ابزار اولدوغو تقدیرده بشریّته کؤمک ائلیه
بیلر.
او، همیشه
دقیق دوشونماق و یوخاری اراده سمبولی ایدی. اونون اورگه یاتیم رفتارینی آتنده‌کی
شاگردلریمینن یادیما سالیرام. یونانلی شاگردلر کلاسی بیر-بیرینه وورموشدولار و من
اونلارا، بیر روحانی اینن بوجور رفتار ائله‌ماقلارینا گؤره، حرصلنمیشدیم. آما
دانیشیق بویو، شاگردلر اونون دانیشیغینا چوخ دقّت اینن قولاق آسدیلار. سونرا بونو
آنلاماغینان کی چوخلو تازا سؤزلر اؤرگشیرلر، تئز-تئز ال چالماغینان اونو تشویق
ائلیردیلر. او گون او، اونلارینان الهاملی شکلده ارتباط قوردو. بو اوزدن بیر
اوستادین بو قدر حیرت آمیزلیغینی، الهی بیر وئرگی اولدوغونو بیلدیم.
آتن دانشگاهی‌نین
محقق و اوستادی پروفسور دلی کاستاپولوس
ایللر اوّل،
نئچه نفر یونانلی دوستلاریمینان، علامه جعفری‌نین ائوینده گؤروشوب و چوخلو
دانیشیقلاریمیز اولوردو. اونون باخیشلاری بیزه تأثیر قویاردی. رحلتیندن اوچ ایل
اوّل (1374-ده) یونانا گلمیشدی و من بیر مجلسده ایکی ساعتدن آرتیق اوننان
دانیشدیم. من شخصاً اونون یوخاری فیلسوف اولدوغونو آنلادیم.
اوننان، آخرت
باره‌سینده دانیشغیمیز اولدو و بو اساسدا «دنیا واقعیّتینده، ایمانین عقل و
الحاددان یوخاریلیغی» آدیندا بیر مقاله یازدیم. بیز هابئله ارتدوکس مسیحی‌لرین و
مسلمانلارین داها یاخجی دنیا اوچون چالیشماسی باره‌ده توافقه چاتدیق.
آتن دانشگاهیندان
پروفسور ولقاریس
. . . عمروم بویو هئچ کس منه اوستاد جعفری کیمی
تأثیر قویماییب. قدیم آتن شهرینده خیابانلارا آد قویماق یئرینه، جماعتین هدایتی
اوچون شهرین هر گوشه‌سینه ستون یاپیشدیریب و هر ستونون اوستونه «هرمه» قویوردولار.
هرمه‌لر همان
زماندان یوخاری انسان و جماعتلرین هدایتچیسی کیمی تانیندیلار. عاغیللی فرزانه‌لر
کی الله آداملاری ایدیلر و مقصدلری خلقه خدمت ائله‌ماق ایدی. اونلار همیشه تحقیق و
اوخوماقدادیدیلار و اؤزلرینی انسانلارین معنویّتی و خدمتینه حصر ائله‌میشدیلر. بو
نادر شخصلردن اوستاد محمد تقی جعفری‌یه اشاره ائلیه بیلرم. بو کیشی دنیانین اونا
فخر ائلیه بیله‌جاق بیر انسان ایدی.
... اوست-اوسته دئمک اولار کی جعفری دنیانین
نادر انسانلاریندان ایدی. او پغمبر کیمی بیر مرجع ایدی. شدّتلی مذهبی میلی
اولدوغونا رغماً، اوستاد جعفری‌نین نداسی بوگونکی وحشی دنیانین اورگینه آییقلیق
وئرن بیر ندا ایدی.
جعفری هئچ وقت
بیرینی محکوم ائله‌مزدی. او قاضی دئییلدی، او بیر معلم ایدی. یادیما گلیر بیر گون
اوندان غرب دنیاسی باره‌ده نظرینی سوروشدوم. بو سؤالی گؤزله‌میردی آما دئدی: غرب
انسانی، فوق بشر اولماغا چالیشماقدا، غیر بشر اولماقدان ساوایی هئچ بیر نتیجه
آلانماییب. چونکی الله-دان اوزاقلاشیب و صرفاً اؤز گوجونه و منطقینه دایانیب.
اوستاد جعفری الله-ـا اینانماغی بشری منطق اینن مخلوط ائله‌میشدی. الله اونا رحمت
ائله‌سین
ناگویا
دانشگاهی‌نین اوستادی پروفسور هیسائه ناکانیشی
استاد جعفری‌نین
عظمتی‌نین جنبه‌لری سایسیزدیر. بونونلا بئله هر شئیدن اوّل اونون اسلام تمدّنی و
آیری تمدّنلر باره‌ده وسیع علمینی و حکمت و درین باخیشینی دئیه بیلرم کی باعث
اولدو معاصر و گله‌جاق انسانلار اوچون اورک یاندیران اثرلرین یاراتماسینا امکان اولسون.
اونلارینان
دانیشاندا بیلدیم کی: اونون اورک ایستیلیغی و روح عظمتی باعث اولدو صلحلی دنیانین
یارانماسینا بو قدر اهمیّت وئرسین و بیزیم اوچون بوجور بؤیوک میراث قویسون.
. . . دنیا دا گؤزه گلیم دگیشیکلیلر باش وئریب و دنیا خطرلی شرایطه
طرف گئدیب. شرافت، انسان کرامتی کیمی بؤیوک مفهوملارا اعتناسیزلیق اولور و حتّی
انکار اولورلار. انسان حیاتی اوچون واجب اولان بوتون بو مفهوملاری دیریلتمک اوچون،
علامه جعفری‌نین بوتون اثرلری دقّت آلتینا گئتمه‌لیدیر. اونون فلسفه‌سی تازادان
تفسیر اولمالیدیر کی داها امن و داها صلحلی بیر دنیا یارانسین.
اوستاد علامه
جعفری‌نین وبساتیندان آلینیب.