متأسفانه جامعه‌میزده اخلاقی قایدالاری آیاقلاماق، یئرسیز حرصلنماق، مالی و غیر مالی امانتلرده خیانت، یالان، تهمت و غیبت کیمی مسأله‌لره تئز-تئز راستلاشماق اولور. بیر عده آیدین اولمایان سؤزو اطمینانینان دئییرلر و یا شایعه‌دن آرتیق اولمایان سؤزلری حقیقت کیمی مطرح ائلیرلر.

دینی تعلیماتا گؤز اوجو باخساق، انسانلارا اخلاقی قایدالاری اؤرگتماغا چالیشان چوخلو سؤزلره راستلاشا بیلروق. گؤزل اسلام دینی، یئر به یئر بیزلری دوزلوغا، گؤزل‌لیغا و اخلاق قایدالارینی رعایت ائله‌ماغا چاغیریب. ائله کی بیری بو تعلیماتا عمل ائله‌سه تعالی و کمالا طرف گئده بیلر.

پیغمبریمیز نه گؤزل بویوروب: «انی بعثت لأتمم مکارم الاخلاق» من فقط اخلاق گؤزل‌لیقلارینی اؤرگتماق اوچون مبعوث اولموشام. حقیقتده انسانین کمالی پیسلیقلاردان اوزاقلاشماقدا و گؤزل‌لیقلارا یاخینلاشماقدادیر. بیزلر، بعضاً ائله شئیلره افتخار ائلیروق کی انسانلیق اونلاردان چوخ یوخاریدیر. مثلاً انسان افتخار ائلیر کی منیم مقامیم و یا پولوم فلان کسدن چوخدور. بیر حالدا کی بونلارین رتبه‌سی انساندان داها آشاغیدیر. دوزو بودور کی انسان، دوزلوق، امانتدارلیق، عدالت و پاکلیق کیمی حقیقی قیمتی اولان شئلره افتخار ائلیه.

الله-ین یئر اوزونده انسان اوچون وئردیغی نعمتلر، اونون اخلاقلی اولماسی و کمالا چاتماق اوچون واسطه و وسیله‌دیلر، عیناً بوغدا کولشی‌نین اونو یئتیشدیریب ساخلاماغا وسیله اولدوغو کیمی. اکینچی‌نین اساس مقصدی و نرمال شرایطده افتخار ائله‌دیغی محصول بوغدادیر و اونون سایه‌سینده اله گتیردیغی سامان‌، افتخار اولونان بیر شئی دئییل. هر چند بوغدانی اله گتیرماق اوچون کولش و سامان لازمدیر. انسانلارین اخلاقدان اوزاق اولوب دنیا مالینا افتخار ائله‌ماقلاری، بیر اکینچی‌نین بوغدایا یوخ بلکه سامانا افتخار ائله‌مه‌سینه بنزر.

انسان الینده اولدوغو نعمتلردن، کمالا چاتماق اوچون لاپ یاخجی صورتده استفاده ائله‌مه‌لیدیر. بونا گؤره انسان نئچه وقتدن بیر اؤزونو یوخلامالیدیر کی گؤره‌سن الله-ین اونا وئردیغی نعمتلردن دوزگون استفاده ائلیه بیلیب یا یوخ؟ گؤره‌سن اوّلکی یئریندن و رتبه‌سیندن داها یوخاری گئده بیلیب یا یوخ؟

اسلامی تعلیماتا گؤره، هر کس بیزیم باره‌میزده پیسلیق ائله‌سه، نتیجه‌ده بیزه قازاناجاق. چونکی اونون ثوابلاریندان آزالیب و بیزیم ثوابلاریمیزا آرتیریلاجاق. آما اؤزوموزه ائله‌دیغیمیز ظلم تماماً ضرر اولاجاق. الله-ین بیزه وئردیغی نعمتلردن‌ده دوزگون استفاده ائله‌مه‌ماق اؤز حقّیمیزده ائله‌دیغیمیز بؤیوک ظلملردن‌دیر. ائله بیل کی انسان اوتوردوغو بوداغی کسماغا مشغول اولور.

بونا گؤره انسان هر ایشدن اوّل و هر سؤزو دانیشماقدان اوّل، اونون نتیجه‌سی باره‌ده دوشونمه‌لیدیر، سونرا اونو دوز و فایدالی تشخیص وئرسه اونا عمل ائله‌مه‌لیدیر. بیر آیری سؤزونن «سؤزو آغیزدا پیشیریب سونرا دانیشماق لازیمیدیر».

انسان جامعه‌یه نسبت، شاخه کیمیدیر آغاجا. یعنی بیر شاخه آغاجین آیری قسمتلرینه ضرر یئتیرسه، ائله اؤزونه ضرر یئتیریب. بو ضرری ایندی‌ده بیلمه‌سه سونرا تأثیری اونا چاتاندا آنلایاجاق. ائله، بیر انسان‌دا جامعه‌نین او بیری انسانلارینا ضرر یئتیرسه، اؤزو ده بیلمه‌سه حتماً او ضرردن اؤز پایینی آلاجاق.

بونا گؤره حدیثده واریمیز کی بیر ساعت فکرلشماق، یئتمیش ایل عبادتدن یوخاری و داها یاخجیدیر.

اجتماعي --> تربيت فرزند --> کثیف‌کاری، مهارت یادگیری کودکان را به شدت تقویت می‌کند!

http://www.tebyan-tabriz.ir/farsi/?pageid=993&type=articles&id=63586&t_b=Meshki

تؤکوب-داغیتماق اوشاغین اؤرگشماق مهارتینی چوخالدار

تازا تحقیقین نتیجه‌لری گؤرسدیر کی، اطرافداکی شئیلره ال ووران، اونلاری دیشینه آلان و تؤکوب داغیدان اوشاقلارین اؤرگشماق مهارتی یوخاری اولور.

اوشاقلارین تؤک-داغیدی والدینه خوش گلمه‌سه‌ده بو تحقیقین نتیجه‌لری گؤرسدیر کی بو عمل اوشاقلارین اطراف باره‌سینده‌کی درکینی آرتیریر.

آیوا دانشگاهی‌ محققلری‌نین تحقیقلری گؤرسدیر کی، اطرافداکی شئیلره ال ووران، اونلاری دیشینه آلان و _مخصوصاً یئمه‌لی زادلاری_ تؤکوب داغیدان اوشاقلارین اؤرگشماق مهارتلری یوخاری اولور.

بو تحقیقده 72 اون آلتی آیلیق اوشاغین مهارتی، مختلف زادلاری اونلارین اختیاریندا قویماغینان مطالعه اولدو. محققلر مربّا، پنیر، آش کیمی 14 یئمه‌لی، اوشاقلارین اختیاریندا قویدولار و هر بیری‌نین آدینی dax یا kiv کیمی ساده‌ کلمه‌لرینن اوشاقلارا اؤرگتدیلر.

بیر آز سونرا همان زادلاری فرقلی شکلده اوشاقلارین اختیاریندا قویدولار و اونلارین آدلارینی سوروشدولار.

تحقیقلر نشان وئردی کی، داها چوخ تؤک-داغیت ائدن و هر یئری باتیران اوشاقلار و هر شئیی آغیزلارینا آپاران اوشاقلار، اونلارین آدلارینی تمیز و مرتّب اوشاقلارا نسبت داها یاخجی یاددا ساخلاییبلار.

تؤکوب-داغیدان اوشاقلاردا، شئیلرین آدینی دوز بیلماق شانسی، یوزده یئتمیشیدی آما تمیز و مرتب اوشاقلاردا بو شانس یوزده اللی ایدی.

بو تحقیقین آیری بؤلومونده اوشاقلار ایکی دسته‌یه بؤلوندولر. بیر دسته‌سی اوجا صندل‌لرین اوستونده و بیر دسته‌سی میز اوستونده اوتورولدولار. اوجا صندل اوستونده اوتوران اوشاقلار او بیری دسته‌یه نسبت داها چوخ اؤرگشه بیلیردیلر. نییه کی داها چوخ لمس ائله‌ماق و تؤک-داغیت امکانلاری واریدی.

بو مطالعه‌نین ارشد یازانی دکتر «لاریسا ساموئلسون» دئییر: «اویناماق و مختلف شئیلری لمس ائله‌ماق، اوشاقلارین اؤرگشماق مهارتینی چوخ یوخاری آپارار».

بو تحقیقین نتیجه‌لری Developmental Science مجلّه‌سینده چاپ اولوب.