امام صادقین (ع) اوزونه باخان انسانین نظرینده قرآن تجلّی تاپاردی، قرآنی گؤرنده ده امام صادق (ع) گؤزونون قاباغینا گلردی. او، قرآن آیه‌لری‌اینن دانیشاردی، قرآنینان استدلال ائلردی و سکوتو قرآندا تفکّر ایدی.
پیغمبرین (ص) بویوردوغونا اساساً قیامته‌جن بیری-بیریندن آیریلمایان ایکی امانت وار؛ بیری قرآن و او بیری، پیغمبر عترتی (علیهم السلام). بو ایکی یادگار الهی پیغمبرلری‌نین بوتون علملرینی یادا سالیرلار و هر زاد اونلارین نزدینده‌دیر. اماملار الهی کتابین حقیقتلرینه عالم و وارلیق عالمی سرّلاری‌نین وارثلریدیلر. امام صادق (ع) کتاب علمی‌نین وارثی، سینه‌سی قرآن سرّلری اینن دولو اولان اونلارین بیریدیر کی مبارک وجودی قرآنینان بیرلشیب.
امام جعفر صادق(ع) بویورور: «وَ اللهِ إنِّی لَاعْلَمُ كِتَابَ اللهِ مِنْ أوَّلِهِ إلَی آخِرهِ كَأنَّهُ فِی كَفِّی. فِيهِ خَبَرُ السَّمَاءِ وَ خَبَر الارْضِ وَ خَبَرُ مَا كَانَ وَ خَبَرُ مَا هُوَ كَائِنٌ. قَالَ اللهُ عَزَّوَجَلَّ: فِيهِ تِبْیَانُ كُلِّ شَیْءٍ؛ آند اولسون الله-ـا من الله کتابینی اوّلدن آخره بیلیرم، ائله بیل کی منیم اووجومدادیر. اوندا گؤیون و یئرین خبری، کئچمیش واقعه‌لرین خبری، ایندی‌نین و گله‌جاغین خبرلری وار. الله تعالا بویویوروب؛ قرآندا هر شئیه آیدینلیق گتیریلیب.»
منصور بن حازم دئییر: امام صادقه (ع) عرض ائله‌دیم: الله مخلوقلاری واسطه‌سی اینن تانینماقدان داها یوخاریدیر، بلکه مخلوقلار الله-ین واسطه‌سینن تانینیرلار.
امام صادق (ع) بویوردو: «دوز دئییرسن.» دئدیم: «هر کیم اونو یارادان تک الله‌ین وارلیغینی اینانسا، بیلمه‌لیدیر کی او الله-ـا رضا وار و او فقط وحی و پیغمبر یولو اینن تانینار. نتیجه‌ده بیرینه وحی اولونماسا، دوزو بودور الله رسوللاری‌نین اتگینه ال آتا، اونلاری گؤرسه، گؤره‌جاق کی اونلار حجّتدیلر و اونلاردان اطاعت ائله‌ماق واجبدیر.
سونرا امام صادقه (ع) دئدی: جماعتدن رسول الله‌دان سونراکی حجّت باره‌ده سوروشدوم. جواب وئردیلر: «قرآن» آما من اونلاری آییق سالدیم کی قرآن قیّم‌سیز کفایت ائله‌مز، چونکی مرجئه، قدريه و حتّى زنادقه کیمی قرآنا اینانمایان مختلف دسته‌لر ده اؤز سؤزلرینده قرآنا استدلال ائلرلر و ائله بونا گؤره قرآنا قیّم لازمدیر کی اونون باره‌سینده دئدیکلری‌نین هامیسی حقّ اولسون.
بو آرادا ابن مسعود و عمر و حذيفه کیمی انسانلار قیّم آدینا دئییلدیلر. آما من سوروشدوم: «اونلار قرآنین هامیسینی بیلیردیلر؟» جواب وئردیلر: «یوخ فقط علی (ع) قرآنین هامیسینا عالم ایدی». من دئدیم: نتیجه‌ده شهادت وئریرم علی (ع) قرآنین قیّمی‌دیر و اوندان اطاعت ائله‌ماق واجبدیر و پیغمبردن (ص) سونرا جماعته حجّت ساییلیر و قرآن باره‌سینده هر نه دئسه حقّدیر.
امام صادق (ع)اونون سؤزلرینی و محکم و گؤزل استدلال‌لارینی ائشیدندن سونرا اونا «رحمک الله» دئماغینان دعا ائله‌دی. (اصول كافى، ج 1، ص 168)
امام صادقین (ع) صحابه‌سیندن بیری دئییر: « ائشیتدیم امام صادق (ع) بئله بویوردو: « نحن ولاه امر الله و خزنه علم الله و عيبه وحى الله؛ بیز امامتین و الله خلیفه‌لیغی‌نین و الله علمی‌نین خزانه‌سی‌نین ولی امری و الله-ین وحی صاندیغی‌ییق. (اصول كافى، ج 1، ص 192)