عزیز پیغمبریمیز (ص) و اماملاردان (ع) یئتیشن روایتلره اساساً عبادتلرین و
عمللرین تکجه قبول اولماق وسیله‌سی، اخلاصدیر. هر هانچی عبادت آیری شرایطی اولا
آما اخلاصینان تؤأم اولماسا قبول اولماز.
اخلاص، عبادتلری فقط الله-ـا خاطر یئرینه گتیرماقدیر. قرآن کریم بیّنه سوره‌سی‌نین
دؤردونجو آیه‌سینده بویوردوغو کیمی: «فقط الله‌ی عبادت ائله‌ماغا و دینی اونا خالص
ائله‌ماق اوچون امر اولدولار». الله‌ین رسولو دا بویوروب: «قیرخ گون اخلاصینان عمل
ائله‌ماق نتیجه‌سینده حکمت چشمه‌لری‌نین اورگیندن دیلینه جاری اولمایان بنده
یوخدور». و بیر آیری یئرده بویوروب: «خوش او بنده‌نین حالینا کی عبادت و بنده‌لیغینی
فقط الله‌ـا خاطر یئرینه گتیرسین.
اخلاص باره‌سینده اولان روایتلرین سایی چوخدور و اونلارین بوتونوندن مهم بیر
نکته اله گلیر: عمللر و عبادتلرین قبول اولماغین تکجه یولو اخلاصدیر. عبادتین آیری
شرایطی اولا آما خالص اولماسا قبول اولونماز.
ریاکارلیق اخلاصین ترسه‌سیدیر. اخلاص عبادتلرین قبول اولماسینا سبب اولدوغو
کیمی ریاکارلیق دا عبادتلری باطل اولماسینا سبب اولار. ائله بونا گؤره اسلام
عالملری‌نین هامیسی ریاکارلیغی عبادتلرین باطل اولماسینا سبب اولدوغونو دئییرلر.
نماز قیلان، ریاکارلیق اوزوندن بیر کلمه‌نی مخصوص شکلده دئسه و یا ریاکارلیق اوچون
مخصوص مکان و زماندا نماز قیلسا و یا ریاکارلیقدان اؤترو سجده‌سینی و رکوعسونو
اوزالدسا نمازی باطل اولار.
اوست-اوسته، ریاکارلیق گیزلی شرکدیر. شرکلی عمل عبادتینن منافاتلیدیر.
ریاکارلیق نه فقط نمازی بلکه هر عبادتی باطل ائلر. خمس، زكات،
حج، جهاد و.... هئچ بیری‌نین ریاکارلیغینان آراسی یوخدور. عبدالله بن بكير دئییر:
«حج مسافرتینده امام صادق‌اینن (ع) بیریدیق. حضرت یولدا بیر داغ باشینا چیخیب
جمعیّتین چوخلوغونا باخیب بویوردولار: «ضجّه چکیب آغلایانلار نه چوخدو و حقیقی حجّ
یئرینه گتیرنلر نه آزدیلار».
معاذ بن جبل
پیغمبر اکرمدن (ص) نبأ سوره‌سی‌نین 18-جی آیه‌سی باره‌ده مفصّل روایت ائدیب کی
حضرت بویوروب: امّتیمدن اون صنف مختلف شکللرده محشور اولاجاقلار. بیر صنفی دونوز
شکلینده، بونلار دنیادا حرام یئینلردیلر. آیری صنف میمون شکلینده؛ دنیادا سؤز آپاریب
گتیرنلر. خلاصه هر عملین عکس‌العملی وار.
زلزال
سوره‌سی‌نین 7-8-جی آیه‌لری بویورور: «هر کیم ذرّه آغیرلیغی قدر یاخجی ایش گؤرسه
اونو گؤرر و هر کیم ذرّه آغیرلیغی قدر پیس ایش گؤرسه اونو گؤرر.