حضرت علی‌نین (ع) گؤزو همیشه والی‌لری‌نین اوستونده اولوردو و قیسا حکومتی‌نین بویوندا آداملارینی توبیخ ائله‌ماق مضمونوندا چوخلو نامه‌لر یازدی.
نهج البلاغه کتابینی ورقله‌ینده بو مسأله‌یه تئز تئز راست گلماق اولار. حضرت علی (ع) «منخم بن سلیم»-ی زکات ییغماغا گؤندرنده اونا بئله یازمیشدی:
«تایسیز بیر الله-ین قورخوسو اینن یولا دوش، مسلمانلارین کناریندان خوشلاری گلمه‌ین صورتده کئچمه. اونلارین ماللاریندان الله-ین حقّیندن آرتیق آلما. بیر طایفایا چاتاندا اونلارین ائولرینه گئتمه‌میش سولارینا گئت. سونرا سکینه و آراملیغینان اونلارین آراسینا گئت و اورتالاریندا دور. اونلارا سلام وئر و سلام وئرماغی قیسا ائله‌مه. سونرا دئنه: «ای الله-ین بنده‌لری ! الله-ین دوستو و خلیفه‌سی منی سیزه طرف گؤندریب کی املاکیزدان الله-ین پایینی آلام. سیزین املاکیزدا الله-ین پایی واردی کی اونون ولی‌سینه وئره‌سیز؟» بیری یوخ دئسه (دئسه کی وئرمه‌لی زکاتیم یوخدور) اونا مراجعه ائتمه. آما بیری دئسه کی بلی وار. اونون قورخوتمادان و اونا چتین توتمادان اوننان گئت و قیزیلدان گوموشدن هر نه وئرسه آل. اینک، قویون و دوه‌سی‌ده اولسا اجازه‌سیز اونلارین یانینا گئتمه چونکی اونلارین چوخو اونوندور. حیوانلارین یانینا گئدنده صاحبلرینه مسلّط اولان کیمی و صاحبلرینه چتین توتان کیمی اونلارا باخما. هئچ حیوانی قورخودوب قووما. صاحبلرینی اونلارین توتماقدا اینجیتمه.
[زکاتی آلاندا] مالی ایکی یئره بؤل و صاحبیندن اونلارین بیرینی سئچماغا اختیار وئر. سئچدیگینه اعتراض ائله‌مه. قالانلاری‌دا همانجور ایکی یئره بؤل و یئنه اوندان ایسته بیرینی سئچسین. [بو ایشی اوراجن ادامه وئر کی] الله-ین حقّی مقداریندا قالسین. الله-ین حقّینی اوندان آل و اگر بؤلماغی بَیَنمه‌سه و فسخ ائله‌ماق ایسته‌سه، سن فسخ ائله و ایکی قسمتی بیر-بیرینه قات و تازادان تکرار ائله.