اخیر گونلر مصرده باش وئرن حادثه‌لرین ریشه‌سی معاصر دورده اسلامدان رادیکال تلقّی‌یه قاییدیر. بو دهشتلی جنایتلره ال وورانلار، حدّدن آرتیق اؤز رهبرلرینه اینانیرلار و اؤز عقل و شعورلارینی کنارا قویوب جهالت اوزوندن بو جنایتلره ال وورورلار و حتّا اولا بیلر بو جنایتلری قربةً الی الله ائلیرلر.
بو رفتارلارین اصلاً دینی سندی یوخدور. بو عمللره مرتکب اولانلار دین آدامی دئییللر بلکه اؤزلرینی دینه تحمیل ائدیرلر.
متأسفانه ایستر سنّی و ایستر شیعه اولسون، اسلام تاریخینده بیر جور تلقّی وار کی ریشه‌سی اشعری‌لیق و اخباری‌لیغا قاییدیر. بو تلقّی هر شئیی نقل زاویه‌سیندن گؤرور. بیر موردده روایت اولاندا، داها آیری بیر شئیه اهمیّت وئرمیرلر و اونا عمل ائله‌ماغا چالیشیرلار. بیر حالدا کی بیر نقل، دینه نسبت وئریلنده؛ اونون نه قدر معتبر اولماسی، نه قدر زمان و مکان شرایطینه باغلی اولماسی، نه قدر آیری زمان و مکانلارا سرایت تاپا بیلمه‌سی جهتدن تحقیق اولونمالیدیر. متأسفانه داها بونا اهمیّت وئرمیرلر.
عقله و فلسفه‌یه دقّتسیز اولماقدان علاوه، دَییشماق و تغییره ده دقّت یئتیرمیرلر. بو عمللره مرتکب اولانلار نقل مفهومونا عقل اینن باخا بیلسه ایدیلر بیر مطلبین عینیّاتیندان علاوه اونون اصل‌لرینی‌ده گؤره بیلردیلر. اونلار، حتّا انتزاعی بیر مئتودینان، ساده بیر اصلی‌ده کئچمیشدن انتزاع ائده بیلیمیرلر. هر شئیه سطحی و تجریدی باخیرلار. ذهنلرینده‌کی استدلاللار بیر-بیرلرینن رابطه‌سی اولمایان جزیره‌لر کیمیدیر. یعنی چاتدیقلاری بیر نتیجه‌نین آیری نتیجه‌لری اینن توتمادیغینی گؤره بیلمیرلر. اونلارین روانی جهتدن‌ده بیلدیکلرینه آیری بیر شئیین آراتیرا بیلمه قابلیّتلری یوخدور. اونلار حدّدن آرتیق اؤز رهبرلرینه باغلیدیلار و حقیقتده اؤزلرینی، آداملیقلارین کنارا بوراخیب، جهالت اوزوندن رهبرلری‌نین امری اینن، بو جنایتلره ال ووروب و بونو قربة الی الله، یئرینه یئتیریرلر.
تاریخ بویو شیعه و سنّی بؤیوکلری وحدتین یارانماسی یولونودا چوخلو چالیشمالار آپاریبلار. آما بو کیمی حادثه‌لر، ایشله‌ماغین بوندان آرتیق لازم اولدوغونو گؤرسدیر. بو ایکی مذهبین بؤیوکلری بو مسأله اوستونده جدّی صورتده دوشونمه‌لیدیلر. اونلار اختلافلی مسأله‌لرین اوستونده دانیشماسالار بو ایشی توده‌لر و اونلاری منحرف ائدنلر عهده‌لرینه آلاجاقلار. حقیقتده ایندیکی وضعیّت، دینه توده‌ای باخماغین نتیجه‌سیدیر.
سلفی دوشونجه و اخباریلیق دینه یاراشان و رحمت پیغمبرینه یاراشان دوشونجه دئییل. متأسفانه هم شیعه و سنّی دنیاسیندا تفرقه زمینه‌سی وار. یعنی هر ایکی طرفده‌ده بیر عدّه وار کی منفعتلرینی فرقه‌چیلیقدا و سلفی دوشونجه‌سینده گؤرورلر. ایندی بو سلفی سنّی‌ده اولا بیلر شیعه‌ده اولا بیلر.
هر حالدا بو ایکی مذهبین عقلاسی بیرلیقدا دانیشیب دوشونوب چاره یولو تاپمالیدیلار. شیعه و سنّی دنیاسیندا بو اختلافلی مسأله‌لرین یانیندا وحدته آپارا بیلن چوخلو یوللار دا وار. فقط اونلارا اهمیّت وئرمک الزمدیر.
جامعه و سياست --> مرسی اشتباه کردم جبران می کنم