حضرت علی اکبر (ع) شجاعتلر و سخاوتلر اوغلودور، نییه کی سخاوت رهبرلری دامنینده بؤیویوب و البتّه بو گؤزل خاصیّتی اونلاردان ارث آپاریب. حضرت علی اکبرین عظمتینی گؤرسدن موردلرین بیری، حضرت اباعبدالله (ع)-ین اؤز جوانی‌نین نعشی اوسوتونه چاتان زمان دئدیگی معروف جمله‌دیر: سندن سونرا دنیانین باشینا کول اولسون.

بیر روایته اساساً حضرت علی اکبر هجری قمری ایلین 33-جو ایلین شعبانین اون بیرینده دنیایه گؤز آچدی. حضرت علی اکبرین دقیق ولادت تاریخی بللی دئییل.

حضرت علی اکبر، آتا طرفیندن وحی خاندانینا وصل اولور، کرامتلی جده‌سی حضرت فاطمه زهرادیر (س). صولت و عظمتده امیرالمومنین علی (ع) کیمی و گؤزللیقدا و یوخاری اخلاقدا حضرت رسول‌الله (ص) کیمی ایدی.

او حضرتین آناسی ابی مره بن عروه بن مسعود ثقفی‌نین قیزی لیلا ایدی. او، شیعه‌لرین اوچون امامی یعنی حضرت اباعبدالله الحسین، سیدالشهدانین اوغلودور. شیعه مکتبی باخیشیندان او حضرتی توصیف ائله‌ماق ایسته‌ساق، یوخاریداکی مناقب و مزیّتلردن علاوه، او حضرت، جدّی‌نین دینی یولوندا شهید اولان کربلا شهیدلر سیراسیندادیر. آما فضایل باخیمیندان حضرت علی اکبر اسلام پیغمبرینه اوخشوردو. حضرت علی اکبر مخصوص فضیلتلری واریدی کی اونو سایر ائمه اولادیندان آییریردی.

او حضرت کرامتلی آتاسی حضرت حسین بن علی (ع) و مظلوم عمیسی حضرت امام حسن مجبتی (ع) اتگینده بؤیودو. حضرت علی اکبر (ع) شجاعت اولادیدیر.

حضرت علی اکبرین (ع) عمرونو سیاسی جهتدن اوچ یئره بؤلماق اولار: بیرینجی دوره، جدّی حضرت علی‌نین (ع) حیاتی اینن مصادف ایدی. اونون بو مقطعده 6-7 یاشی واریدی و حضرت علی‌نین (ع) شهادت ماجراسینه شاهد اولدو. او حضرت اوشاقلیقدان بنی امیّه‌نین کثیف فتنه‌لرینن تانیش اولدو.

او حضرتین ایکینجی عمر دوره‌سی عمیسی امام حسن (ع)-ین دوره‌سی ایدی. او، عمیسینه او قدر یاخیندی کی کربلا قضیه‌سینه اوخشار قضیّه اوز وئرسه ایدی کربلادا گؤرستدیغی شجاعتی اوردا دا گؤرسدردی.

حضرت علی اکبرین پارلایان گونش کیمی ایشیق ساچان اوچونجو دوره، امام حسین (ع)-ین امامت دوره‌سی ایدی. او بو مرحله‌ده آتانین وزیری و ساغ الی کیمی وظیفه‌سینی یئرینه یئتیردی. بو رابطه او قدر قوی ایدی کی بیر عدّه بئله گمان ائدیردیلر امام حسیندن سونرا خلیفه و امام، او حضرت اولاجاق. بو مرحله‌ده اونون لیاقت و عظمتی بیر حدده ایدی کی معاویه فقط اونو اسلام امّتی‌نین رهبرلیغینا لایق گؤروردو.