افلاطونون اخلاق نظریه‌سی سعادت آختاریشینا دایانیر. اینسانین حقیقی سعادتینی داشییان خئیره هیدایت اولوب. افلاطونا گؤره اخلاق سیاست شاخه‌لریندن ساییلیر. او ایجتیماعی عدالتده آختاریشدان سونرا اخلاقین ایکینجی تعبیر، شخصی عدالته دیقّت یئتیریب.افلاطونا گؤره ارزیش اوچ زاددان آرتیق دئییل:
1.گؤزللیق 2. عدالت 3. حقیقت
بونلارین اوچونون‌ده بیرلشدیرنی خیر و یاخجیلیق اولوب بو اوچ معنا خیرین آچیقلانمیش معناسیدیر.
افلاطون بعضآ اخلاقی «گؤزللیق» مقوله‌سیندن بیلیر و بعضاً «عدالت» مقوله‌سیندن ساییر.
«اخلاق گؤزللیق مقوله‌سیندندیر» دئینده منظورو گول کیمی حیسّی گؤزللیقلار دئییل بلکه منظورو گؤزل روحدان آسیلی اولان اینسان عملی‌نین گؤزللیغیدیر.
اینسان داخیله باخاندا ایشلری ایکی یئره بؤلور: گؤزل و چیرکین، یاخجی و پیس. بو تقسیمده‌ده شکّ ائله‌مه‌ییب یاخجینن پیسی سئچماقدا دلیله احتیاجی یوخدور.
بو نظریه ایسلامی موتکلّیملرین مطرح ائله‌دیقلاری «ذاتی حوسن و قوبح»دیر. بو سؤزده گؤزللیغین مرکزی اینسان رفتاریدیر. آما افلاطون اونو اخلاق محوری بیلدیگی گؤزللیق روحدادیر. دئمک اولار روحون گؤزللیغی بوتون استعدادلاردان لازیم اولان حدّده ایستیفاده ائله‌ماقدادیر. حیاتین نوختاسینی غریزه‌لرین بیرینه تاپیشیرماماق لازیمدیر. چونکی اینساندا شهویّه، غضبیّه، حب ذات، مقام و مال سئوگیسی وار. بو غریزه‌لرین آراسیندا تعادول یاراتماغینان روحا گؤزللیق وئرماق لازیمدیر. نتیجه‌ده بیر سری فضاییله چاتماق و رذاییلدن اوزاق اولماق.
بو نوع گؤزللیغی عدالتده آدلاندیرماق اولار، اونو داخیلی غریزه‌لرین تعادولو کیمی تفسیر ائتمک شرطینن، نه اینکی برابرلیق و حقّی حق صاحیبینه وئرماق معناسیندا.
افلاطون فضاییلی کسب ائله‌ماقدا معریفتین نقشینه تأکید ائله‌ماغینان، اخلاقی معریفتی «موثول»واسیطه‌سینن حاضیرلانان ایشیق شوعاسی کیمی بیلیردی کی بوتون محدود خئیرلرین منبعی ساییلیر.
«خئیر میثالی»نی تانیماق بیزی خئیرین جورئیّاتی باره‌ده قضاوته ایمکان وئره‌جاق. اونون باخیشیندا «شرّ» جهالت نتیجه‌سیدیر و ائله بونا گؤره اعتیقادی واریدی اینسانلاری ایکی موضوعدا تعلیم وئرمک لازیمدیر؛ بیر طرفدن فاضیله ایشلری اؤرگشه‌لر و آیری طرفدن عقل و ذهنلرینی فلسفه و ریاضیّاتینان تربیت ائده‌لر. طلب اولان معاریفی اؤرگشه بیلمه‌ین اینسانلار دا حیکمت اهلیندن تقلید ائتمه‌لیدیلر.
افلاطونون نظرینه اینسانین اوچ قوّه‌سی وار و هر بیریله موتناسیب بیر فضیلت وار:
1. شهوانی قوّه کی اونون فضیلتی اعتیدال‌دیر. 2. روحانی قوّه کی اونون فضیلتی شوجاعتدیر. 3.عقلانی قوّه کی اونون فضیلتی حیکمتدیر.
افلاطون روحون اوچ بؤلومونو «فاضیله شهر»ین اوچ بؤلومونه تای بیلیردی. اونون نظرینجه بو اوچ فضیلت بیر سیستمین جوزءلری ساییلیر و بو سیستمده هر بیری‌نین اؤز ایشی وار.
شوجاعت، موقاویمت و روحون مطلوب وضعیّتینده اولماسینی عؤهده‌سینه آلیب اینسانی غیر معقول قورخولارا جومماقدان ساخلار. اعتیدال، شهوانی قوّه‌لری تنظیمه سالیب محدودلاشدیریر. حیکمت، روحون عقلانی بؤلومونه موناسیب معریفت وئریب روحون آیری ایکی بؤلومون واسیطه‌سی اینن حیمایت اولار.
افلاطون فضاییلی بیر-بیرندن آیری بیلمکله برابر سقراط کیمی اونلارین بیرلیغینا اینانیردی.«حیکمت» فضیلتیندن آسیلی اولان خئیره معریفت تاپماق، تکجه اؤ بیری ایکی بؤلومو ایطاعته مجبور ائلیه بیلن شخصه ایمکانلیدیر. بئله‌لیکله فضیلتلر ماهیّتاً آیری اولسالار دا بیر شخصده یا هامیسی وار و یا هئچ بیری یوخدور.
افلاطونون بو نظریه‌سینده اولان موثبت نظریه و موسلمان عالیملری‌نین هامیسی‌نین قبول ائله‌دیغی نوقطه، اعتیدال مسأله‌سیدیر.