ایمام حسن عسكری (ع) چتین و محدودیّتلرله دولو دؤراندا یاشاماقلارینا رغماً موختلیف ساحه‌لرده شاگیرد تربیت ائله‌ماق و دینی معاریف تبلیغیندن قالمادیلار. ایمام حسن عسكری(ع) چتین و حساس دؤراندا یاشادیلار. او حضرتین بیرینجی درجه‌ده‌کی وظیفه‌سی ایسلام مکتبینی قوروماق و اونون حریمینده دیفاع ائله‌ماق، بو حیات باغیشلایان دینه دعوت ائله‌ماق و اونون اصول و دَیَرلرینی گوستریش وئرماغیدی.
اهل بیتین(ع) هامیسی شریعتین یاییلماسی، علمین تبلیغی، اونو آیریلارینا خصوصاً علم طالیبلرینه تانیتدیرماقدا و ایسلامی عقیده و تفکّورون حریمیندن دیفاع ائله‌ماقدا چوخلی فیکری و عملی چالیشمالار ائدیبلر. او عظمتلی اینسانلار، اومّت ایچینده نوخبه، عالیم و معریفت و عمل منبعی ساییلیردیلار.
ایمام حسن عسكری (ع) کرامتلی آتالاری کیمی اؤز دؤرانلاریندا عمل ساحه‌سینده موهیم نقشلری واریدی عین حالدا اهل بیت (ع) مکتبی‌نین معاریفینی"كیتاب" و "سونّت"محورلیغینن تبلیغ ائله‌ماغی اؤز برنامه‌لرینده یئریدیردیلر.
ایمام حسن عسکری‌نین (ع) دؤرانی یعنی هیجری اوچونجو عصری، حادیثه‌لی دؤرانیدی. موختلیف فیکری مکتبلر "فلسفه"، "كلام"، "اصول"، "فیقه"،"تفسیر" و "حدیث" ساحه‌لرینده تقویت اولموشدولار و موقابیله گوجلری چوخالمیشدی.
بو دؤرانین مکتبلری چوخیدی. بو آرادا اهل بیت (ع) فیقه، حدیث، تفسیر، سیاسی دوشونجه، علم، كلام، فلسفه و ایسلامی معریفتده مومتاز مکتبه صاحیب ایدیلر. ایمام حسن عسکری (ع)اؤز علمی فعالیتلرینی موختلیف شاگیردلرین تربیتی، موکاتیبه یولوینان شوبهه‌لره جواب وئرماق کیمی موختلیف حوزه‌لره بؤلموشدو.
ایمام حسن عسکری‌نین (ع) شاگیردلری
ایمام حسن عسکری‌نین (ع) محضرینده اولان شاگیردلرین چوخو بو حضرتین آتاسی و جدّی‌نین دؤرانیندان اهل بیته(ع) ایرادتلری واریدی و بعضیلری ده ایمام (ع) زمانی اونلارا مولحق اولموشدولار. بو اینسانلار، علملری، معاریفی و حقیقتلری او حضرتدن آلیب آیریلارینا چاتدیریردیلار.
ابو عبدالله آدینا معروف اولان بؤیوک لوغت شوناس "احمد بن ابراهیم بن اسماعیل"ایمام حسن عسکری (ع) و ایمام هادی‌نین (ع) مخصوص صحابه‌سیندن ساییلیردی. احمد ابن ابراهیم ایمام حسن عسکرینن (ع) مسأله‌لری و خبرلری واریدی کی نئچه جیلد کیتابدا مونتشیر ائدیب. ایمامین (ع) شاگیردلری موختلیف علمی و معرفتی ساحه‌لرین پیشرفتینده نقشلری اولوب.
هابئله دَیرلی اینسان "احمد بن اسحاق بن عبدالله بن سعد بن احوص اشعری" ایمام حسن عسکری‌نین (ع) خاص صحابه‌سیندن ساییلیردی و ایمام زمانی‌دا (عج) درک ائله‌دی.او هابئله قوملولارین اوستادی و شیخی ایدی. اونون دا تألیفاتی واردیر.
چوخلی کیتابلاری اولان "حسین بن شكیب مروزی" و "صالح بن ابی حماد"دا ایمام حسن عسکری‌نین (ع) شاگیردلریندن ایدیلر. هابئله "كتاب الرحمه"کیتابی کیمی چوخلی کیتاب مؤلیفی، شأن و منزیلت صاحیبی"سعد بن عبدالله قمی"ده ایمامین (ع) شاگیردلریندن ایدی.