حضرت ایمام جعفر صادق (ع) ایمام محمد باقرین (ع) اوغلو و اُمّفَروَه بنت قاسم ابن محمد ابن ابی‌بکر آدیندا بیر آناداندیر. ابوعبداللَّه، ابواسماعيل، ابوموسي او حضرتین کونیه‌لریندن و صادق، فاضل، طاهر، صابر و... او حضرتین لقبلریندن ساییلیر.
حضرت هیجری قمری ایلین 83-جو ایلینده مدینه‌ده دونیایا گلدی. او حضرتین اوشاقلارینی اون نفر دئییبلر. ایماملار ایچینده، ایمام صادقین (ع) عصری تایسیز ایدی و او حضرتین عصرینده‌کی ایجتیماعی و فرهنگی شراییط ایماملارین هئچ بیری‌نین عصرینده یوخیدی.چونکی او دؤوران سیاسی لحاظدان بنی‌امیّه‌نین ضعیفله‌مه‌سی و بنی عباسین گوجلنمه‌سی دؤوریدی و بو ایکی دسته حکومتی اله کئچیرماق اوچون موباریزه ائدیردیلر. بو اوزدن بو دؤوران ایمام صادق (ع) و شیعه‌لرین نیسبی صورتده ساکیتلیق و آزادلیق دؤورانی ایدی.
فیکری و فرهنگی جهتدن‌ده ایمام صادقین (ع) عصری موناسیب بیر عصریدی. ایمام صادق (ع) بو موناسیب فورصتدن ایستیفاده ائدیب آتاسی‌نین علمی و فرهنگی نهضتینی ایدامه وئردی. بؤیوک علمی حوزه یاراتدی و اوگونکی عقلی و نقلی علملرینده مینلرجه فاضیل شاگیرد تربیت ائله‌دی.