ایمام حسینین قیزی‌نین زیارتی, بیزی آللاها یاخینلاشدیریر
بو کیچیک اوشاغین «شام»شهرینده قویلانماسی, طهارت خانیدانی‌نین اسارتی و اونلارا ظولم اولماسینا مؤحکم ثبوتدور.
حضرت رقیه بنت الحسین علیهما السلامین ایندیکی مزاری شام شهرینده اوّلدن مشهوردور, دئیه‌سن حضرت ایمام حسین (ع)شامدا اؤزوندن بیر یادیگار قویوب کی صاباح بیری چیخیب طهارت خانیدانی‌نین اسارتینی و اونا مربوط حادیثه‌لری اینکار ائله‌‌مه‌سین, بو کیچیک قیز, اسیرلر آراسیندا کیچیک قیزلارین اولماسینا, بؤیوک ثبوت ساییلیر. بیز بونا اینانیریق کی او حضرتین بوردا دفن اولماسینا شؤهرت وار و او حضرت بوردا جان وئریب و قویلانیب.
بو کیچیک اوشاغین «شام»شهرینده قویلانماسی, طهارت خانیدانی‌نین اسارتی و اونلارا ظولم اولماسینا مؤحکم ثبوتدور. ائله بیر ظولم کی آدمدن خاتمه قدر بوتون پیغمبرلر اونا آغلاییبلار.اوراجن کی آللاه تعالا حسینین عزاسینی حضرت آدمه اوخودو. بو اوزدن بو یئرین احتیرامی لازیمیدر.
اویدورما سؤزلره قولاق آسمایین, او سؤزلر کی دئییرلر رقیه سلام‌الله علیها بالاجا بیر اوشاقدان آرتیق دئییلدی.مگر حضرت علی اصغر کیچیک اوشاق دئییلدی کی قیامت گونو شاهید اولاجاق و شیعه‌لرین گوناهلاری‌نین باغیشلانماسینا سبب اولاجاق؟ ان شاء الله تعالى
بونا خاطیر هامی‌یا لازیمدیر کی بو یئرین احتیرامینی ساخلاسینلار و شیاطینین فایداسیز سؤزلرینه فیکیر وئرمه‌سینلر. بیز ایمام حسینین قیزینی زیارت ائله‌ماغینان آللاها یاخینلاشیریق, او قیز کی مظلوم ایدی و خانیدانی‌نین هامیسی مظلومیدی.