ایمام علی (ع) نهج‌البلاغه‌ده بویوروبلار: دونیانین اوزو گئتماقدادیر و ویداع آهنگینی چالیر و آخیرتین اوزو گلماقدادیر. بیلین کی بویون آتلاری حاضیرلاماق گونودور و صاباح موسابیقه گونو. کیم قاباغا دوشرسه بهشت اونوندور, و هر کیم دالی‌یا قالیرسا, اونون یئری اود اولاجاق. هئچ کس یوخدور کی اؤلومو چاتمامیش اؤز خطاسیندان توبه ائده؟ کیمسه یوخدور کی بدبختلیقدان قاباق اؤزونه بیر ایش گؤره؟ بیلین کی سیز عؤمور گونلرینده اومیدلر و آرزولاردا بوغولورسوز, بیر حالدا کی اؤلوم سیزن آرخازدا کمین قوروب. هر کس بو گونلر و اؤلوموندن قاباق اؤزونه بیر ایش گؤره, عملی اونا فایدا وئره‌جاق و اؤلومو اونا ضرر وورمایاجاق و هر کس کی بو گونلر کمکارلیق ائده و اؤزو اوچون بیر ایش گؤرمیه, عملی‌نین فایداسی اولماییب اؤلومو ضرر ووراجاق.

وحشت و قورخو گونونده اولدوغو کیمی امنیتده و آساییشده ده آللاه ایشینه قوشولون. بیلین کی من بهشته تای بیر شئی گؤرمه‌میشم کی اونو آختاران غفلت یوخوسوندا یاتسین و جهنم کیمی بیر شئی گؤرمه‌میشم کی اوندان قاچان, قاچماق و اؤزونو قورتارماق یئرینه راحات یوخویا گئتمیش اولسون. بیلین کی هر کس اؤز حقّیندن فایدا آپارمایا, باطیل اونا ضرر یئتیرر و کیمسه کی هیدایت‌اینن دوز یولا گئتمیه, ضلالت اونو اؤلدورر. بیلین کی سفر یوکونو باغلامالیسیز و سیزه دئییبلر کی سفر یوکوز نه‌دیر و هاردادیر.

سیز اوچون ایکی شئیدن قورخورام: بیر نفسین ایستکلری‌نین دالیسیجان گئتماق و او بیری باشدا اوزون آرزولار بئجرماقدیر. بو دونیادا, ائله بو دونیادان توشه گؤتورون کی صاباح او بیری دونیادا اؤزوزو موجازاتدان قورتاراسیز.