وادی‌السلام قبریستانی بقیع
و ابوطالب قبریستانیندان سونرا دونیا موسلمانلاری‌نین لاپ موهوم قبریستانیدیر.
ریوایتده گلیب کی مؤمینلرین روحلاری اؤلندن سونرا اورا مونتقیل اولارلار و دسته-دسته
بو قبریستاندا بیر-بیرلریله دانیشارلار.
وادی‌السلام قبریستانی بقیع
و ابوطالب قبریستانیندان سونرا دونیا موسلمانلاری‌نین لاپ موهوم قبریستانیدیر و
خاص موقدسلیغی واردیر. اورا بیر یئردیر کی ریوایتلره گؤره مؤمینلرین روحلاری اؤلندن
سونرا اورا اینتیقال تاپارلار و اوردا دسته-دسته بیر-بیریله دانیشارلار و بؤیوک
قیامته‌جن اوردا قالارلار.
بو قبریستان جنوبدان ایمام
علی‌نین (ع) موطهر حرمینه و نجف-کوفه‌نین اصلی خیابانینا (شارع علی بن ابیطالب),
شرقدن نجف – کربلا جادّه‌سینه, شیمالدان حی المهندسین منطقه‌سینه و غربدن سابیق
نجف دریاسینا دایانیر.
ایمام صادق (ع) بو
قبریستانلیق باره‌ده بویوروب: هر مؤمین کی غربده و شرقده دونیادان گئدیر, آللاه اونون
روحونی وادی‌السلاما مونتقیل ائدر. دئیه‌سن گؤرورم مؤمین اینسانلار دسته-دسته
بیر-بیری‌نین یانیندا اوتوروب دانیشیرلار.
بؤیوک پیغمبرلرین پاک مزاری
بو قبریستانلیقدا بللی‌دیر. ایمکانی وار آیری پیغمبرلر ده اوردا اولسونلار آما
حضرت هود و حضرت صالح پیغمبرین مزاری قبریستانین اوّلینده گونبذ آلتیندا بالاجا
بیر اوتاغین وسطینده یئرلشیب.
بحارالانواردا گلیب کی حضرت
نوح و ابراهیمین (ع) و حدوداً 370 پیغمبرین قبرلری ایمام علی‌نین (ع) مزاری
کناریندا یئرلشیب.