غیبت باعیث اولار اینسانلار آراسیندا اونسیت و مهربانلیق آرادان گئتسین و اورکلرده کینه و نیفرت توخومونو اکر و باعیث اولار جامیعه‌ده دوشمنچیلیق و هرکی-هرکیلیق اولسون.
غیبت اؤزگه‌نین دالیسیجان پیسله‌ماقدیر. ایسلامدا, مؤمینلرین آبروسینی تؤکماق مَحرَملرینن زینا ائله‌ماقدان‌دا پیس ساییلیب. قورآندا دا پیس گومان و غیبت, اؤلموش قارداشین اتینی یئماغا اوخشادیلیب.
غیبت باعیث اولار اینسانلار آراسیندا اونسیت و مهربانلیق آرادان گئتسین و اورکلرده کینه و نیفرت توخومونو اکر و باعیث اولار جامیعه‌ده دوشمنچیلیق یارانسین. یالان, یالتاقلیق و جاسوسلوغون باشلانیشی غیبتدن اولار کی جامیعه‌ده هرکی-هرکیلیق یارادار.
غیبته عادت ائله‌ماق اینسانین پاک فیطرتینی آلوده ائلر و اینساندا رذاییلین فضاییل یئرینه اوتورماسینا سبب اولار. عقل اؤز یئرین احساسات و شهوته وئرر. شخصیت و هویّت بؤحرانی باعیث اولار اینسان غیبت ائله‌سین. یعنی شخص اؤزگه‌نین شخصیتین سیندیرماق اوچون و اؤزونه شخصیت قازانماق اوچون غیبت ائلر.معنویت و محبت بؤحرانی‌دا غیبتین آیری دلیل‌لریندن ساییلیر. یعنی هرکسن اؤز لحظه‌لیق منفعتلرین دالیسیجان اولور و اؤزگه‌نی آیاقلاماغینان اؤزونو یوخاری چکماغا چالیشیر.
عمومیّتده غلط و حیوانی تربیت باعیث اولار شخص تؤهمت, ایفتیرا و یالان دردینه موبتلا اولسون.اؤزونو سیندیرماق و خلقه خیدمت ائله‌ماق, دوستلوق و مهربانلیغا سبب اولار و بو طریقینن غیبتیندن اوزاق قالماق اولار.
جامیعه‌ده اخلاقی خصوصیتلری گوجلندیرمک اوچون عاریفلرین یاشاییشی و تمثیلی ناغیللاریمیزین اوزوندن فیلیم دوزلدیلمه‌لیدیر مثلاً عطارین تذکرةالاولیاسی غیبت و یالانین مذمتینده چوخلی حیکایه‌لری وار کی گرک فیلیم و نوماییش قالیبیندا ایرائه اولسون.
هایدگرین دئدیگینه گؤره بیر معنالی دانیشیغیمیز وار و بیرده سارساقلاماق وار. سارساقلاماق فایداسیز و پوک دانیشیقلاردی کی جماعت اونا موبتلا اولوبلار آما معنالی دانیشیق جامیعه‌ده محبّت و دوستلوغو ارمغان گتیرر. غیبت اهلی‌اینن اوتورماق اونون اؤزوندن پیسدیر. گرک دیلیمیزین و واختیمیزین قدرینی بیلک و غیبت, یالان و آیری دیل مرضلریندن نجات تاپاق.