1344-جو هیجری قمری ایلین شَوالین سککیزینده ایسلام دونیاسی‌نین لاپ
موهوم قبریستانی وهابیلر الیله تخریب اولدو.
چوخ آز اؤلکه‌ده حیجازداکی
کیمی ایسلامین بیرینجی عصرلریندن اثرلر وار. نیه‌کی ایسلامین باشلایان یئری اورادیر
و ایسلام رهبرلریندن موختلیف اثرلر اونون هر یئرینده گؤروشور. آما موتأسیفانه
دوشونجه‌لری قورو موتعصیب وهابیلر, بو اثرلرین چوخونا شیرک اثرلری آدی قویوب آرادان
آپاردیلار و بو ارزیشلی اثرلرین آزی قالیر. بو مسأله‌نین باریز نمونه‌سی بقیع
قبریستانیدیر. بو قبریستان ایسلامین لاپ موهوم قبریستانیدیر کی ایسلام تاریخی‌نین
موهوم بؤلومونو اؤزونده یئرلشدیریب و موسلمانلارین بؤیوک تاریخ کیتابی
ساییلیر.
بقیع قبریستانی‌نین قبرلری
تخریب اولمامیشدان قاباق, ایماملار و آیری ایسلام بؤیوکلری‌نین قبرلری اوستونده
گونبذلر و بینالار واریدی. بقیع ایماملاری, سککیز ضیلعده دوزلمیش و
ایچه‌ریسی و گونبذی گژلنمیش بوقعه‌ده قویلانمیشدیلار. وهابیلر مدینه‌یه سولطه
تاپاندان سونرا قبیرلری ییخماقدان علاوه اورداکی اثرلری‌ده آرادان آپاردیلار. بو
واقیعه‌ده ایمام حسن موجتبی (ع)، ایمام سجاد (ع)، ایمام محمدباقر (ع) و ایمام جعفر
صادقین(ع) مرقدلری ییخیلدی. اونلار ایماملاردان علاوه آیری قبرلری‌ده خرابلادیلار
او جومله‌دن: فاطمه زهرایه (س) منسوب اولان قبر، عبدالله بن عبدالمطلب و آمنه
(پیغمبرین آتا و آناسی) ، فاطمه بنت‌اسدین (ع) موطهر قبری (امیرالمومنین (ع)آناسی)،
حضرت ام‌البنین (ع ) موطهر قبری ، پیغمبرین عمیسی عباسین قبری، پیغمبرین اوغلو
ابراهیمین قبری, حضرت صادقین (ع) اوغلو اسماعیلین قبری، پیغمبرین اؤگئی قیزلاری‌نین
قبری , پیغمبرین دایه‌سی حلیمه‌نین قبری و پیغمبر زمانی شهید اولانلارین
قبری.
بقیع
بقیع ایماملارین قبری‌نین
بیرینجی دفعه تخریبی
وهابیلر الیله بقیع
ایماملارین قبری‌نین بیرینجی تخریبی 1220 هیجری قمری ایلینده یعنی سعودیلرین
بیرینجی حکومتلری‌نین عثمانلی حکومتی الیله ییخیلماسی زمانی اولدو. بو
ایسلامی-تاریخی واقیعه‌دن سونرا ایران پادیشاهی فتحعلی شاهین حیمایتی اینن
خرابلانمیش مرقدلر گؤزل صورتده تازادان دوزلدی و گونبذ و مسجید احداثی‌اینن بقیع,
موسلمانلارین لاپ گؤزل زیارتی-سیاحتی یئرینه تبدیل اولدو.
بقیعین ایکینجی دفعه
خرابلانماسی
ایکینجی تاریخی-ایسلامی
حادیثه 1344 هیجری قمری ایلین سککیزینده باش وئردی کی بو تاریخده وهابیلرین اوچونجو
دفعه حکومته گلماقلاری ایدی. ائله بیر ایل کی وهابیلر بؤیوکلری‌نین فتواسی اساسیندا
شیعه موقدسلرینی تحقیر ائله‌ماق اوچون, ایماملارین و اهل بیتین (ع) قبرلرینه
ایکینجی دفعه وحشیانه حمله ائله‌دیلر و بقیع قبریستانینی خرابلانمیش و تانینمامیش
بیر قبریستانا چئویردیلر.
مکه، مدینه، جده و کربلادا
قبرلرین تخریبی
وهابیلر 1343 هیجری قمری ایلینده مکه
شهرینده حضرت عبدالمطلب (ع), ابی‌طالب (ع)، خدیجه (ع) و فاطمه زهرا (ع) قبری‌نین
گونبذلرین, پیغمبرین ویلادت یئری و خیزرانی (پیغمبرین گیزلی عیبادت یئرین)
توپراغینان بیر ائله‌دیلر و جده‌ده حوّانین قبری و آیری قبرلری داغیتدیلار.
مدینه‌ده پیغمبرین گونبذین توپا باغلادیلار آما موسلمانلارین قورخوسوندان شریف قبره
دَیمه‌دیلر. هابئله اونلار 1343-ون شَوالیندا بقیع قبریستانینی تورپاغینان بیر
ائدیب ارزیشلی شئیلری تالادیلار و حضرت حمزه و اُحُد جنگی‌نین شهیدلری‌نین قبرلرینی
تورپاغینان بیر ائله‌دیلر.
همان ایل موتعصیب وهابیلر
کربلایا حمله ائدیب و ایمام حسینین (ع) موطهر ضریحین سؤکوب اوندا اولان دگرلی
شئیلری کی صفوی و قاجار شاهلاری‌نین هدیه‌لری ایدی تاراج ائله‌دیلر و جماعت و
عالیملردن 7000 نفر جیواریندا آدامی اؤلدوردولر. سونرا نجفه طرف گئتدیلر آما غارته
موفق اولمادیلار و دالی اوتوردولار.