پیغمبرین باجیسی «شیما» باره‌ده نه‌لر
بیلیرسیز؟/اسیرلیق و آزادلیغین جالیب ناغیلی
«نمونه خانیملار» مجموعه کیتابلاری کی
ایسلام تاریخینده تأثیرلی خانیملارین یاشاییش شرحینه شامیل اولور موعظم رهبری
مقامین بعثه‌سی‌نین هیمّتی و «مشعر» فرهنگی هونری مؤسیسه‌سی طرفیندن یاییلدی. خبر
آنلاینین گوزاریشینه گؤره, «نمونه خانیملار» کیتاب مجموعه‌سی, «حضرت فاطمه زهرا (سلام‌الله‌علیها)»،
«فاطمه بنت الحسن و امّ فروه»، «ام حبیبه»، «پیغمبرین قیزلاری» و «پیغمبرین سوت
آنالاری» کیمی عنوانلاردا, حج تحقیقات مرکزی‌نین تاریخ و سیره گوروهونون هیمّتی
ایله «مشعر» فرهنگی هونری مؤسیسه‌سی طرفیندن پالتویی قطعده یاییلدی.
الزهرا(سلام‌الله‌علیها) دانیشگاهی‌نین
علمی هئیأت عضوی فتحیه فتاحی‌زاده طرفیندن یازیلمیش «پیغمبرین (صلی‌الله‌علیه‌و‌آله)
عیالی امّ حبیبه» بو مجمومه‌نین آلتینجی عنوانیدیر کی پیغمبرین عیال‌لاریندان بیری
و او حضرتین آند ایچمیش دوشمنلریندن اولان ابوسفیان بن حربین قیزی‌نی تانیتدیریر؛
آد و نسب, موسلمانلیق و حبشه‌یه هیجرت, پیغمبرینن ائولنمک, مدینه‌یه هیجرت,
ابوسفیان امّ‌حبیبه ائوینده, امّ‌حبیبه و عثمانین اؤلدورمه ماجراسی, امّ‌حبیبه‌نین
وفاتی و اونون حدیث ریوایت ائله‌ماقداکی نقشی بو اثرده اولان یازیلارداندیر. اونون
موقدّمه‌سینده اوخوروق: «امّ‌حبیبه ایلکین موسلمانلاردان و حبشه‌یه کؤچنلردندیر؛
او چوخ چتین شراییطده موسلمان اولدو و آللاه رسولونون(صلی‌الله‌علیه‌و‌آله)
کناریندا قرار تاپدی.
نمونه خانیملار مجموعه‌سی‌نین یئددینجی
کیتابی «پیغمبرین (صلی‌الله‌علیه‌و‌آله)قیزلاری» آدیندا «زینب، رقیه و پیغمبرین
قیزلارندان ام الکلثوم و پیغمبرین سوت باجیسی شیمانی» تانیتدیریر کی الزهراء(سلام‌الله‌علیها)
دانیشگاهی‌نین علمی هئیأت عضوی فتحیه فتاحی‌زاده طرفیندن یاییلیب. بو کیتابین
موقدّیمه‌سینده اوخوروق: «ایسلام صدری‌نین تاریخی او قدر اهمیّتلی‌دیر کی ایسلامی
و غیری ایسلامی موحقیقلر اونون باره‌سینده تحقیق ائدیبلر, آما بو جهتدن کی بعضی
تاریخی گوزاریشلرین بیر-بیرلریله تناقضولری وار, ایسلام تاریخینه تازادان باخماق
باعیث اولار تاریخین غیری واقعی نوکته‌لرین اوزه چیخسین و یول واقعیتلری تانیماغا
هامارلانسین.»
بو کیتابین بیر بؤلومونده پیغمبرین سوت
باجیسی باره‌ده اوخوروق:
«پیغمبر اکرم (صلی‌الله‌علیه و آله و
سلّم) دونیایا گلندن سونرا, بو اوشاغا دایه آختاراندا بنی‌سعد بن بکر قبیله‌سیندن
اولان حلیمه‌نی تاپدیلار. حلیمه‌نی محمده (صلّی الله علیه وآله وسلّم ) سوت وئرماق
اوچون اجیر ائدندن او پیغبرین سوت اَمَر واختی‌نین لاب اصلی شخصیِتینه چئوریلدی و
ایکی ایله‌جن بو موهوم ایشه مشغول اولدو. حلیمه‌نین اَری حارث بن عبدالعزی بن
رفاعه‌ایدی و نَسَبی بکر بن هوازنه چاتیردی. او حضرتین سوت قارداشی عبدالله و سوت
باجیلاری انسیه و شیما ایدیلر کی بونلارین اوچو ده حلیمه‌نین اوشاقلاری‌ایدی. حضرت
محمد ( صلّی الله علیه وآله وسلّم ) بنی‌سعد قبیله‌سینده برکتلی حضوری زامانی,
شیما آناسی‌نین کؤمگی ایله بو تایسیز یارانیش قاشیندان موغایات اولوردو . . .
شیمانین اسیر اولما جریانی
نقل اولوب اوندا کی پیغمبر (صلّی الله
علیه وآله وسلّم ) ائشیدیر کی هوازن قبیله‌سی «مالک بن عوف نصر»-ین باشچیلیغی‌اینن
«حُنَین» منطقه‌سینده آرواد اوشاقلاری‌اینن بیرلیقدا موستقر اولوبلار, دستور
وئریرلر بؤیوک (اون ایکی مین نفرلیق) بیر لشکر حاضیرلانیب اونلارا طرف
گئدسین. موسلمانلارین منطقه‌یه چاتماسی ایله و دره‌ده کمین قورموش هوازن قبیله‌سی‌نین
اونلارا حمله‌سی‌ایله, فضا چوخ چتین اولدو؛ ائله کی موسلمانلارین چوخو پیغمبرین
(صلّی الله علیه وآله وسلّم ) اطرافیندان داغیلدیلار و تکجه دوققوز یا اون نفر بنی‌هاشمدن
قالدیلار کی بونلاردان عیبارتیدی: علی بن ابی‌طالب ( علیه السلام )، عباس بن
عبدالمطلب، ابوسفیان بن حارث، نوفل بن حارث، ربیعة بن حارث، عتبه و معتب ابولهبین
اوغوللاری، فضل بن عباس، عبدالله بن زبیر بن عبدالمطلب و بیر قوولا گؤره ایمن بن
ام ایمن. آما نهایتده آللاه اؤز پیغمبرینی غالیب ائله‌دی و مَلَکلر واسیطه‌سی‌اینن
اونو گوجلو ائله‌دی. علی بن ابی‌طالب ( علیه السلام ) هوازنین علمدارینی اؤلدوردو
و بو مسأله دوشمنین اورگینه قورخو سالدی. بو دؤیوشون هوازن قبیله‌سینه نتیجه‌سی بو
اولدو کی اونلارین چوخو اؤلدولر و بیر چوخو دا اسیر اولدو کی اونلارین سایی مین
نفره چاتیردی. هابئله چوخلو غنیمتلر اله گلدی کی اوغورلانانلاردان سونرا اون ایکی
مین دَوه‌یه چاتیردی.
دوشمن قوشونو ایچینده «بجاد» آدلی بیر
کیشی واریدی. بنی سعد قبیله‌سیندن اولان بو کیشی, او قبیله‌یه گئدن بیر موسلمانی
اؤلدوروب دوغراییب و سونرا یاندیرمیشدی. بجاد اؤز آغیر جورمونه موتجیه اولاندا
قاچدی. آللاه رسولی ( صلّی الله علیه وآله وسلّم ) اؤز قوشونونا امر ائله‌دی کی هر
نه یولونان اولسا بجادی یاخالاسیندلار. اونلار دا اونو تعقیب ائدیب قبیله‌سی‌نین
بیر گوروهو ایله یاخالادیلار.
اسیرلر آراسیندا پیغمبرین ( صلّی الله
علیه وآله وسلّم ) سوت باجیسی «شیما»دا گؤرونوردو. او گؤرنده کی موسلمانلار
اونلاری یئیین و خشونت اینن اوردو یئرینه آپاریرلار قیشقیردی: «ائی جماعت ! بیر آز
یاواش ! آللاها آند اولسون من سیزین بؤیوگوزون سوت باجیسی‌یم.»
آما موسلمانلار کی اونو تانیمیردیلار
اونلاری همان وضعیّتینن آللاه رسولی‌نین( صلّی الله علیه وآله وسلّم ) حضورونا
آپاردیلار. او حضرتین حضورونا چاتاندا شیما دئدی: «ائی رسول‌الله ! ( صلّی الله
علیه وآله وسلّم ), من سیزین سوت باجیزام.»
حضرت بویوردو:«بونا بیر علامتین وار؟»
دئدی: «بلی, بیر گون من سیزی دیزیم اوسته اوتورتموشدوم و سیز منیم بئلیمی دیشله‌دیز.»
پیغمبر ( صلّی الله علیه وآله وسلّم )
سؤزونو تصدیقله‌دی و قالخیب رداسینی یئره آچدی و شیمانی اوندا اوتورتدو و اونا خوش
گلدین دئدی. بو آندا شیمانین گؤزلری یاشینان دولدو. سونرا پیغمبر ( صلّی الله علیه
وآله وسلّم ) شیمانین آتا و آناسی باره‌ده سوروشدو و او خبر وئردی کی مودّتلر
قاباق اؤلوبلر.
ایسلام پیغمبری ( صلّی الله علیه وآله
وسلّم ) بو جوابی ائشیدندن سونرا بویوردو: بیزیم یانیمزیدا قالسان محبوب و
مؤحترم اولاجاقسان و قاییتماغی‌دا سئوسن قاییدیب اؤز اقوامی‌نین یانینا گئده
بیلرسن.
شیما او حضرتین ایکینجی پیشنهادین قبول
ائله‌دی. بنی‌سعدین نقیلینه گؤره پیغمبر ده بیر کنیز و غولام اونا وئردی و شیما
اونلاری بیر-بیرلری ایله ائولندیردی و اونلارین نسلی هله‌ده بو قبیله‌ده قالیر.
بیر ریوایتده گلیب کی شیما اسیرلر باره‌ده
پیغمبره دئدی: «بونلار سنین باجیلارین و خالالاریندیلار.»
آللاهین رسولی‌ده ( صلّی الله علیه وآله
وسلّم ) بویوردو: «ما کان لی و لِبَنِی‌هاشمٍ فقد وَهَبْتُهُ لک» منیم و بنی
هاشمین اولانی سنه خاطیر باغیشلادیم.»
بئله‌لیغینان موسلمانلار دا پیغمبره ( صلّی الله علیه وآله
وسلّم ) تای بوتون اسیرلری شیمایا باغشلادیلار.