1. رحمتليق قطب الدّين راوندى اؤز
كيتابيندا گتيريب: ايمام سجاد(ع) صوبح نامازين قيلاندا؛ اؤز يئرينده اگلشيب گون
چيخاناجن دوعا ائدرديلر؛ گون چيخاندان سونرا اؤزو و خانيواده‌سي‌نين ساغلامليغينا
ايكي ركعت ناماز قيلارديلار و سونرا بير آز ياتارديلار.
يوخودان دوراندان سونرا،
ديشلرين ميسواكلاييب سونرا صوبحانه‌يه مشغول اولارديلار. (1)
2. رحمتليق كليني، ايمام صادق عليه السّلام‌دان نقل ائديب
يازير: هر وقت ايمام سجادين(ع) كوره‌كنلريندن بيري ائوه واريد اولاردي، ايمام سجاد
اؤز اباسين چيگنيندن آچيب اونون اوچون يئره آچاردي تا اونون اوستونده اوتورسون.
و سونرا كوره‌كنينه بويوراردي: خوش گليبسن، كي سن هم
خانيواده‌وين هزينه‌لرين تأمين ائديرسن و هم، اؤز ناموسيوي نفساني هوسلردن و اجنبي‌لردن
موغايات اولورسان. (2)
3. بير گون ايمام سجاد عليه السّلام ناماز قيليرديلار كي
ناماز اوسته او حضرتين اَباسي چيگنيندن توشدو و حضرت فيكير وئرمه‌ييب نامازينا
ايدامه وئردي.
ناماز قورتولاندان سونرا او حضرتين اصحابيندان بيري قاباغا
گليب دئدي: يا ابن رسول اللّه ! نييه ابا چيگنيزدن توشنده اونا فيكير وئرمه‌ديز و
نامازيزي ايدامه وئرديز؟
ايمام عليه السّلام بويوردو: بو نه اعتيراضدي ائليرسن !؟
بيليرسن من ناماز حاليندا كيمين قاباغيندا دورموشدوم؛ و كيم‌اينن
دانيشيرديم؟
آيا فيكير وئرميرسن كي نامازدا هر نه قدر خاليصانه و آللاه
تعالايا كاميل ديقّتينن اولسان همان ميقداردا نامازين آللاه درگاهيندان مقبول
اولار؟
او شخص دئدي: پس واي بيزيم حاليميزا كي چاره‌سيزيق.
و حضرت بويوردو: آللاهين لوطف و رحمتيندن اومودسوز
اولمايين، چون آللاه نافيله نامازلارينان نامازلارين ناقيصليقلارين جوبران ائدر و
كاميل‌له‌در. (3)
4. بير گون بير نفر حضرت سجاد عليه السّلامي چوخ تعريفله‌دي
و او حضرته چوخ محبت ايبراز ائله‌دي. ايمام عليه السّلام بويوردو: ائي آللاه، سنه
پناه گتيريرم بوندان كي آيريلاري مني سئوه‌لر آما سن مني دوشمن ساياسان.
هابئله ريوايت ائديبلر كي: بير گون عرفه گونو ايدي، او حضرت
بير يئردن سووشوردو، نئچه نفري گؤردو كي يولچولوق ائديرلر و اوندان بوندان كؤمك
ايستيرلر.
حضرت اونلارا تعجوبلي باخيب بويوردو: واي اولسون سيزه كي
بئله بير گونده –عرفه گونونده- آللاهدان غئيريندن كؤمك ايستيرسيز و اومود گؤزوزو
اونلارين كؤمگينه باغلاميسيز.(4)
5. رحمتليق كليني شريف كافي كيتنابيندا گتيرير: سعيد بن
مسيّب آديندا بير نفر ريوايت ائدير: بير گون ايمام سجّاد علىّ بن الحسين
عليهماالسّلامين موبارك محضرينه واريد اولدوم، بير حالداكي او حضرت ناماز اوستونده‌يدي.
نامازلارين قورتاراندان سونرا بير نفر قاپيني دؤيدو. حضرت بويوردو: يولچو گليب و
كؤمك ايستير، اونو الي بوش قايتارمايين.(5)
آلت يازيلار:
1- اعلام الورى 297؛ كشف الغمه 2/286؛ اعيان الشيعه 1/630.
2- طبقات ابن سعد 5/156.
3- آل محمد تاريخي 127؛ سئچيلميش تاريخ 203.
4- ارشاد 2/154.
5- اعلام الوردى 297؛ كشف اغمه 2/284؛ فصول المهمة 209؛ نور
البصار 142