حضرت عباس (ع) و قارداشلاري‌نين 61 هيجري قمري ايلينده
دوشمنين امان‌نامه‌سيندن ايمتيناعسي.
كوْنيه‌سي «ام البنين» اولان فاطمه،
اميرالمؤمينانين عيالي‌نين دؤرد رشيد و ديلاور اوشاغي واريدي كي هاميسي كربلا
چؤلونده قارداشلاري و ايماملاري حضرت ابي عبدالله الحسينين(ع) ريكابيندا
حاضيريديلر. حضرت عباس(ع) كي اونلارين بؤيوگو ايدي، چوخلو شؤهرتي واريدي و گؤزل
جمالي، رشيد قامتي، شوجاعتلي، تقوالي و غئيرتلي اولدوغونا گؤره «قمر بني هاشم»
آدينا تانينميشدي و ايمام حسينين (ع) قوشونوندا اولماسي اهل بئيت دوشمنلرينه چوخ
آغير و ناراحات ائليه‌ن ايدي.
بونا خاطير دوشمن چاليشيردي اونو و قارداشلاريني ايمام
حسينين (ع) توحيد جيبهه‌سيندن آييريب «اموي» باطيل جيبهه‌سينه مولحق ائله‌سين.
بونا گؤره ام‌البنين (س)-ين قبيله‌سيندن اولان شمر بن ذي
الجوشن كلابي مأمور اولدو كي حضرت عباس (ع) و اونون اوچ قارداشينا امان‌نامه
وئرسين.
او، تاسوعا گونون آخشامي امام حسين (ع) خئيمه‌سينه
ياخينلاشيب و اوجادان قيشقيردي: منيم باجي‌اوغلانلاريم هارداديلار؟»
ايمام حسين (ع) كي شمرين منظورون بيلميشدي اؤز
قارداشلارينا بويوردو: شمرين جوابيني وئرين، هرچند او فاسيق آدامدي آما سيزينن
قوهوملوغو وار.
حضرت عباس (ع) و اوچ قارداشي (عبدالله، جعفر و عثمان)
شمرين يانينا گلديلر و سوروشدولار: ايستگين نه‌دير؟
شمر دئدي: سيز منيم باجي اوغلانلاريمسيز. بيلين كي نئچه
ساعتدن سونرا ساواش آلوولاري قالخاجاق و حسين بن علي (ع) كؤمكلريندن هئچ كس ديري
قالماياجاق. من سيزه عمر بن سعد دن امان‌نامه گتيرميشم. سيز بو ساعتدن بيزيم
امانيميزداسيز، بو شرطينن كي قارداشيز حسيندن (ع) ال چكه‌سيز و اونون قوشونون ترك
ائده‌سيز.
غئيرت و وفا كاني اولان حضرت عباس (ع) اونا قيشقيردي:
اللرين كسيلسين و آللاهين لعنتي سنه و امان‌نامه‌وه اولسون. ائي آللاهين دوشمني !
بيزه دئييرسن كي مولاميز و قارداشيميز حسين (ع) كؤمگيندن ال چكاق و ملعونلار و
موردارلارين ايطاعتينه واريد اولاق؟ بيزه امان وئريرسن آما پيغمبرين اوغلونا امان
يوخدور؟
شمر ام‌البنين (س)-ين اوشاقلاري‌نين بو كسكين جوابيندان
اومودسوز اولوب غضبلندي و ذلالتي‌اينن اؤز خئيمه‌سينه قاييتدي.
بعض ريوايتلرده شمر بن ذي الجوشن يئرينه «عبدالله بن أبي
محل بن حزام» آديندا ام البنين (س)ين قارداشيندان آد آپاريبلار كي حضرت عباس (ع) و
قارداشلارينا امان‌نامه آپارميشدي، آما اونلارين منفي جوابي‌اينن اوز به اوز
اولدو.
هر حالدا، عمر بن سعدين قوشونو بو اويوندان فايدا گورمه‌دي
و ايمام حسين (ع) موستحكم قوشونوندا خدشه سالانمادي.