مادی ریاضتلر فقط مادی دونیادا حسابا گلیر آما اوروجون هم هم مادی و هم معنوی فایدالاری وار.
روایتلریمیزده گلیب،گونلرین بیرینده بیر عده پیغمبرین (ص) محضرینه گلیب دئییرلر: بیزی تانیمایان بیر نفر گله‌جاغیمیزدان خبرلر وئریر». حضرت مبارک الینی جیبینه قویوب او شخصدن سوروشدو منیم اووجومدا نه وار؟ او شخص جواب وئردی: سیزین اووجوزدا داش داش گؤرورم. حضرت بویوردو: بلی بو منیم اوزوگومدور.
او شخص مادی منفعتلره گؤره ریاضت چکیب او قدرتی اله گتیرمیشدی. و او شخص نفسی اینن مبارزه ائله‌ییب مسلمان اولاندان سونرا او قدرتینی الدن وئریر. اوروجو الله تعالا اوچون یئرینه گتیردیگی اوچون اجرینی‌ده الله‌دان آلاجاق.
بقره سوره‌سی‌نین 30-جو آیه‌سینه اساساً انسان الله‌ین یئر اوزونده‌کی خلیفه‌سیدیر و یارانیش فلسفه‌سی فقط الینه تسبیح آلیب سبحان الله ذکری دئمک دئییل. او اؤزونده اولان پتانسیل‌لردن استفاده ائدیب الله‌ین خلیفه‌سی اولماق لیاقتینه چاتمالیدیر.
رمضان آیی‌نین اوروجلوغو انسان خلیفة‌الله اولماسینا بیر یولدور. انسان بو یول اینان یئر اوزونده خلیفة الله اولماق لیاقتینی اؤزونده بالقوه‌یه تبدیل ائله‌یه بیلر. آما غیر دینی ریاضتلرده بو مقصد و فایدا یوخدور.
مادی ریاضتلرده بیر شخص مثلاً 40 ساعت آییق قالماغی هدف توتور و بو مدتده اوندان خلاف و گناه ایشلر ده باش وئرسه اونون برنامه‌سینه خلل یئتیرمز. عکسینه اوروج مسأله‌سی بوجور دئییل و انسان اؤزونو یئییب ایچمکدن ساخلاماقدان علاوه سایر گناهلاردان‌دا اوزاق اولمالیدیر.