ايمام صادق(ع)-ين 34 ايلليك ايمامتي‌نين چوخ قيسمتي اُموي‌لرين ييخيلماسي و
عباسي‌لرين اينقيلابا بنزر قالخيشي‌اينن بير زماندايدي؛ بونا خاطير ايمام صادق (ع)
اوچون چوخ موناسيب فورصت ايدي كي آتالاري‌نين واسيطه‌سي‌اينن پئيغمبردن چاتان
معاريفين نشرينه ايقدام ائله‌سين. و بئله ده اولدو و ايسلامي معاريفدن چوخ ارزيشلي
گنجينه ياراندي.
ايمام صادق (ع) –دن قالان چوخلو فيقهي اثرلرين
ايبتيدايي تحليلي‌اينن باشا توشه بيليريك كي نييه شيعه‌لر اوچ قرن قاباق اوصولِ
فيقه علمينه موراجيعه ائله‌ميرديلر. بونون تكجه عيلّتي ايمامين دسترسده اولماغي‌ايدي،
بير امر كي باعيث اولموشدو شيعه‌لر سوآللاريني –لااقل او دوراندا- ايمامدان
سوروشوردولار و جوابلارين اله گتيريرديلر. بو پديده احكامدا شكّين آرادان آپارماسيندان
علاوه كي بو اؤزو برائت، ايستيصحاب، تخيير و احتياط كيمي عمليّه اصل‌لرين
يارانماسينا سبب اولور، واقعده احكامدا ظنلرين‌ده قاباغين آليردي.
بو اسادا
ايمام صادق (ع) فيقهينده احكامدا شك باره‌سينده تأكيد گؤرمك اولمور. بونا
باخماياراق كي موضوعلاردا شك ائله‌مك باره‌سينده چوخلو ريوايتلر وار كي اونون
علاجيني شكّلي امرين ايستيصحابين تانيتديريب. آما فيقه دونياسيندان ائشيكده يعني
اسلامي كلام حوزه‌سينده ايسلامي معاريفين و ايسلامين حقانيتي‌نين ايثباتيندا عقلين
نقشينه چوخ تأكيدي وار. مشهوردور كي ايمام صادق (ع) اؤز شاگيردلريني ايسلامين
موختليف علملرينده تخصّوصي صورتده تربيت ائديردي تا لازيم اولاق وقت اونلاردان
موناظيره اوچون بهره آپارسين.
كوليّتده،
او زامان موخاليف فيقهي محفيل‌لرده عقلين راييج اولان ايكي جور كاركرديني، نقد
ائديردي. بو ايكي جور ظاهيرده عقلي كاركرد بئله‌ايديلر: مورسله مصلحتلر و قياس.
مورسله مصلحتلر واقعده او مصلحتلر و مفسده‌لريديلر كي شريعتده اونلاردان بحث
اولماميشدي و ايصطيلاحاً هئچ جوزيي يا كولّي اصله موستند و موقيّد اولماميشديلار
بلكه باشينا قالميشديلار. بو تعريفده جوزيي اصلدن منظور ايجتهادي خاص دليلدير كي
بير خاص فيقهي موضوعنون باره‌سينده كاراييسي وار و كولّي اصلدن منظور، ايجتهادي
عام يا موطلق دليلدير كي خاص دليل اولماياندا ايشه گلر. بو مصلحتلر و مفسده‌لري
چوخ‌راق محلي اميرلر و حاكيملر موختليف قاباغا گلن موقعيّتلرده ايشله‌ديرديلر.
البته بو امرلرين شرطي بو ايدي كي كيتاب و سونّتينن موخاليف اولماسين كي طبيعتاً
اونون مؤحرز اولماسي ايجتهادي دليل‌لرين اولماماسي‌اينن كاميلاً مومكون‌ايدي.
شايد
ايمامين موخاليف فقيهلر طرفيندن بو مصلحتلر و مفسده‌لرين تشخيصي‌اينن، موخاليف
اولماسيني فيقهي باخيمدان يوخ بلكه او حضرتين جور حاكميتي يا اونلارين طاغوت
آدلانديرديغي حوكومته خاص باخيشي بيلمك اولا. هرچند ايمام فيقهي بوعددا دا بو امره
قاييل دئييلدي كي حؤكمون تنجيز و فعلي اولماسينا باعيث اولان مصالح و مفاسدين
تشخيصي راحات اله گلندير. برعكس اونلارين آللاهدان و اونون رسولوندان و سونراكي
مرحله‌ده اولوالامردن محض تبعيّت ائتمك بوتون تأكيدلري، بونو چاتديريردي كي عمل‌لرين
مصالح و مفسده‌‌لريني تشخيص وئرمك غير قابل وصف صورتده چتيندير.
شايد
ايمامين موخاليفتيني بوجور جمعبندليق ائله‌مك اولا كي اگر طاغوت حوكومتي
اولماسايدي و حوكومت او حضرت و اونلارين كؤمكلري‌نين الينده اولسايدي، اوندا
تصوّور ائتمك اولاردي كي ايمام مورسله مصلحتلري بخشيني يئنيدن تعريفله‌رديلر. آما
ايمامين قياسا منفي باخيشي كاميلاً آيديندير. اونلار منصوص‌العله اولان قياسين
حوجيّتيني قبول ائله‌ميرديلر. البته قياسا بو خاص باخيش كي واقعده «مشبهٌ به»-ين
حؤكمونو «مشبه» اوچون تعميم وئرمه‌سينه خاطير بير جوزيي امرين آيري جوزيي امرده
اوخشاتماسي‌ايدي، گاهدان ايمامين لاب ياخين آداملارين تعجوبلنديريردي. آما ايمامين
كؤمكلرينه بو امر كاميلاً آيدين‌ايدي كي ايمام «مستنبط‌العله» قياسين آلتينا كي
موجتهيد فقيه اؤزو حؤكمون مناطين ايستيخراج ائديردي، گئتمزدي.