جعفری مکتبی‌نین یاییلماسی و امامین بؤیوک شاگیردلری‌نین چوخالماسی، شیعه‌لری
بحرانلارین صدمه‌سیندن اماندا ساخلاماقدان علاوه، امام صادقین (ع) تعلیماتی اینن
شیعه‌نین کلامی و فقهی عقیده اساسلاری‌نین بینووره‌سینی تؤکدو.
امام صادق (ع) 83 هجری قمری ایلی‌نین ربیع الاول آیی‌نین 17 سینده عبدالملک
حکومتی زمانی دونیایا گلدی و 148.ه.ق ایلینده عباسی ابوجعفر منصور زمانی شهادته
چاتدی. امام صادقین (ع) زندگانلیق دورانیندا اموی‌لرین وعباسی‌لرین حکومت دَییشمه‌سی
باش وئردیغی اوچون، او حضرتین سیاسی و اجتمعای فعالیتلری چوخ مهم ساییلیر.
زندقی‌لر، دهری‌لر، معتزلی‌لر، حدیث اهلی و صوفی‌لر امام صادقین (ع) زمانی‌نین
لاپ مهم نحله‌لریندن ساییلیر. اونلارین عقیده و افکار تبلیغینده اسلام دونیاسیندا
و حتی مسجد الحرام ایچینده آزاد الماقلاری، بیر طرفدن بو دوشونجه‌لرینن تعامل
اوچون اسلام فرهنگی‌نین و مسلمانلارین فکری بلوغوندان حکایت ائلیر و آیری طرفدن
امام صادقین (ع) بو مختلف فکری دالغالارین مقابلینده گؤزه گلیم چالیشماسی و وظیفه‌لرینی
گؤرسدیر.
امام صادق (ع) موجود شرایطین شیعه دوشونجه‌سی‌نین داها آرتیق تعالیسی و شیعه‌لرین
بو دوشونجه‌لرین مقابلینده داها دا گوجلو دایانا بیلمه‌سی اوچون، اسلام تاریخینده
جعفری مکتبینه مشهور اولان درس حوزه‌لرینی یاراتدی. مختلف فکری شاخه‌لرین و مناظره‌لرده
شرکت ائتمک اوچون گوجلو شاگیردلرین تربیتی، امام صادقین (ع) چالیشمالاری‌نین اساس
محورینی تشکیل وئریردی.
جعفری مکتبی‌نین گئنیشلنمه‌سی و امامین آدلیم شاگیردلری‌نین اورتایا چیخماسی
ایله، شیعه‌لر آیری فکری بحرانلاردان اماندا قالماقدان علاوه، شیعه‌نین کلامی و
فقهی اساسلاری‌نین بیناسی قویولدو و افولا گئدن او بیری نحله‌لرین عکسینه شیعه
مکتبی دایمی تعالی و نشاط تاپدی.
البته بو جریان امام باقر (ع) زمانیندان باشلانان جریانیدی. امام باقر (ع)
زمانه‌نین شرایطی و اوضاعسینی تانیماغینان علمی، فقهی، فلسفی و کلامی بیر نهضتین
بیناسینی قویدو. امامت نظریه‌سی‌نین کامل تبیینی و مزجئه‌نین توجیه ائله‌ین
دوشونجه‌لری و آیری انحرافی دوشونجه‌لرینن مبارزه، امام باقرین (ع) اقداملاری‌نین
آیری قسمتی‌دیر.
ائله بونا گؤره ده بو ایکی امامدان (ع) قالان حدیثلرین سایی آیری اماملارا
گؤره چوخ آرتیقدیر. حقیقتده ایکی صادقین (ع) قیزیل عصری بو دؤره‌نین چوخ سایلی
حدیث کتابلاری و شیعه‌لرین فقهی و . . . مشکل‌لری‌نین حلی‌نین نشانه‌سیدیر.
امام صادقین (ع) علمی مکتبی‌نین گوجو او قدر ایدی کی ابو حنیفه، مالک بن انس
کیمی اهل سنت فرقه‌لری‌نین اماملاری او حضرتین محضرینده شاگیردلیق ائلیردیلر و
امامین حدیث راویلریندن ساییلیردیلار.