حضرت مهدی‌ اینن (عج) رسول اکرمین (ص) اوخشارلیقلاری باره‌ده چوخلو روایتلریمیز وار. امام زمانین رسول اکرمین نوه‌لریندن اولدوغونا گؤره او حضرته اوخشاماغی طبیعیدیر. آد و کنیه جهتیندن‌ده اوخشارلیق وار. هابئله پیغمبرین احد جنگینده گئیدیغی کؤینک، عمامه، سابغه زره و او حضرتین قیلینجیدا امام زماندا (عج) اولاجاق. بو حدیثلرین لاپ جامعی کیمی پیغمبرین (ص) بو فرمایشینی خاطرلاتماق اولار: رسول اکرم (ص) بویویوب: مهدی منیم ائولادیمدندیر. آدی منیم آدیم ، کنیه‌سی منیم کنیه‌مدیر. یارانیش و اخلاقدا جماعتین منه لاپ چوخ اوخشایانیدیر.

بو ایکی کرامتلی‌نین اوخشارلیقلاری بونلاردیر:

رحمت

الله تعالی قرآندا بویوروب: وَ ما اَرسَلناکَ الاّ رَحمَةً للعالَمینَ.(انبیاء/107) بیز سنی گؤندرمه‌میشوق مگر عالمیانا رحمت اوچون

و حدیث قدسی‌ده امام زمان باره‌سینده بئله بویورور:

... و أکمل ذلک بابنه م ح م د رحمة للعالمین علیه کمال موسی و بهاء عیسی و صبر ایوب. (محمدبن یعقوب کلینی، الکافی، ج1، ص 527؛ محمدباقر مجلسی، بحارالانوار، ج36، ص196)

 . . . و اونو عالمیانا رحمت اولان و موسی کمالی و عیسی عظمتی  ایوب صبری صاحبی اولان م ح م د اینن کامل‌لشدیردوق.

یاخشی و عظمتلی اخلاق

الله تعالی پیغمبره بویورور: وَ إِنَّکَ لَعَلی خُلُقٍ عَظِیمٍ(سوره قلم/4) و البته سن یاخشی و عظمتلی اخلاقا صاحبسن.

پیغمبر ده بیر حدیثده بویوروب: « الْمَهْدِیُّ مِنْ وُلْدِی اسْمُهُ اسْمِی وَ کُنْیَتُهُ کُنْیَتِی أَشْبَهُ النَّاسِ بِی خَلْقاً وَ خُلْقا (بحارالانوار، ج36، ص309)

مهدی منیم اوشاقلاریمداندیر آدی منیم آدیم و کنیه‌سی منیم کنیه‌مدیر. او جسم روح و اخلاق جهتیندن جماعته منه لاپ چوخ اوخشایانیدیر.

امنیت وئرن

الله تعالی پیغمبر باره‌سینده بویوروب: وَ ما کانَ اللَّهُ لِیُعَذِّبَهُمْ وَ أَنْتَ فیهِمْ(سوره انفال/33)

(ائی پیغمبر) سن اونلارین آراسیندا اولدوغون سوره، الله اونلارا عذاب وئرمیه‌جاق.

امام زمان‌دا اؤز وصفینده بویورور: «إِنِّی أَمَانٌ لِأَهْلِ الْأَرْضِ کَمَا أَنَّ النُّجُومَ أَمَانٌ لِأَهْلِ السَّمَاءِ»( بحارالأنوار، ج75، ص380) اولدوزلار گؤی اهالیسی‌نین امنیت وئرنی اولدوغو کیمی البته من‌ده یئر اهالی‌سینه امنیت وئرنم.

عدالتی احیاء ائدن

پیغمبرین رسالتیندن هدف عدالتین اجراسی ایدی.  قرآندا بئله بویورور:

لَقَدْ أَرْسَلْنا رُسُلَنا بِالْبَیِّناتِ و أَنْزَلْنا مَعَهُمُ الْکِتابَ وَ الْمِیزانَ لِیَقُومَ النَّاسُ بِالْقِسْطِ(حدید/25) بیز رسول‌لاریمیزی آیدین دلیل‌لرینن گؤندردوق و جماعت عدالتی احیاء ائله‌ماق اوچون اونلارینان کتاب و میزان نازل ائله‌دوق.

امام زمانین قیامی‌نین‌دا هدفی عدالتی احیاء ائله‌ماقدیر: یَمْلَأُ الْأَرْضَ عَدْلاً وَ قِسْطاً کَمَا مُلِئَتْ جَوْراً وَ ظُلْما(الغیبة، النعمانی، ص58)

یئر اوزونو ظلم و جورونان دولدوغو کیمی عدالت و قسط اینان دولدوراجاق.