محرم، تایی اولمایان حماسه‌نین آیی و همیشه دیری قالان تاریخدیر. قانین قیلینجا ظفر چالدیغی آی، ناب اسلامین دیری قالماسینا سبب اولان الله‌ین لاپ یاخجی بنده‌سی‌نین قانی‌نین یئره تؤکولدوغو آی.
محرمده تاریخ وسعتینده حماسه باش وئریب. بو آیدا یئر اوزونو پروردگارین لاپ مظلوم بنده‌سی‌نین فراق غصه‌سی بورویوب کی یوزلر ایل بوندان اوّل پاکلارین نسلیندن بیر انسانین حقیقی سعادت یولوندا دوشمنلرین جنگینه گئتمه‌سینی و شجاعت و شهامت درسینی وئردیگینی بشرین یادینا سالسین.
اسلام فرهنگینده محرم جانلی تاریخدیر، آما عادی و گونده‌لیق تاریخ یوخ بلکه درین بیر تحوّل و تاریخ یارادان انقلاب و بوتون حماسه‌لرین منشأی.
امام حسین (ع) یزیدله مبارزه ائله‌سه ده حقیقتده بوتون جهالتلر و ضلالتلرینن ساواشدی و بئله‌لیغینان انسانلارا ظلم قاباغیندا دایانماغی و حماسه یاراتماغی اؤرگتدی.
محرم آیی بؤیوک انسانلارین رشادت و شجاعتلری اینن بیر گلیر. او حساس زماندا ایثاردان و وفادان بؤیون قاچیرتمایان انسانلار: کربلانین سقّاسی آدلانان حضرت ابوالفضل (ع) و یئر اوزونده پیغبره (ص) سیرت و صورتده لاپ اوخشار شخص حضرت علی اکبر (ع) کیمی انسانلار بو گون شجاعتله مبارزه ائدیب شهادته چاتدیلار.
14 یاشلی نوجوان قاسم بن حسن (ع) شجاعت و شهامتله جهادا اوز توتدو و جنگ میدانیندا شجاعتله ساواشیب شهید اولدو.
دوشمن قوشونوندان امام حسینین (ع) لشکرینه قوشولان حربن بن ریاحی توبه ائله‌ییب امامدان جنگ اذنی آلاندان سونرا مبارزه میدانینا گئدیب عمر سعین سردارلاریندان نئچه‌سینی اؤلدورندن سونرا شهادته چاتدی.
حضرت زینب (س) و امام سجاد (ع) کربلا صحنه‌لری‌نین شاهدی اولاندان سونرا کربلالیلارین شجاعت و رشادتلری‌نین راویسی اولدولار و یزیدی رسوای ائله‌ماغینان عاشورا واقعه‌سینی اؤز خطبه‌لرینن جاویدان ائله‌دیلر.