امام صادقدن (ع) نقل اولان بیر روایتده بئله گلیب: «بیز هامیمیز امرده نهی‌ده، حلالدا حرامدا و اصولدا بیر-بیریمیزه تاییق. آما جدّیمیز رسول الله (ص) فضلده و باغیشلاماقدا بقیه‌یه گؤره فرقلی ایدی». پیغمبردن (ص) سونراکی تاریخی دوره‌لره دقّت یئتیرساق اونلاردا واحد مدیریّتین اولماسینا متوجّه اولاریق. آما مختلف شرایطده و موقعیّتلرده اونلارین رفتارلاری دَییشیب. امام صادق (ع) روایتین ادامه‌سینده بویورور: «بیزیم علمیمیز بیردیر، شجاعتیمیز ده بیردیر آما دنیادا بونو نه‌قدر بروزه وئرماق الله‌ین امری و اجازه‌سینه قالیب. بیر زمان الله بیزدن علمیمیزی و بیر زمان‌دا شجاعتیمیزی بروزه وئرماغی ایسته‌ییر». بو اماملارا نظرده توتولان نقشه باغلیدیر.

اماملارین خصوصیّتی و رفتارلاریندان علاوه، جماعت امام زماندان (عج) قاباق خلیفه‌لری تانیمالیدیلار. فقیه‌لر و دین بؤیوکلری امام زمانین (عج) خلیفه‌لری ساییلیرلار و ائله اخلاقا و رفتارا صاحب اولمالیدیلار کی جماعت اونلارا اینانیب اطرافلارینا ییغیشسینلار.

امام صادقدن (ع) بیر آیری روایت نقل اولوب کی بویوروب: «صاحب امر (عج) اوچون غیبت زمانی اولاجاق. غیبت زمانی دینینی ساخلایان شخص تیکانی الی اینن دَرَن شخص کیمی اولاجاق. سیزین هانسیز بو تیکانی الیزینن دره بیلرسیز؟» امام مبارک باشینی آشاغی سالیب بویوردولار: «غیبت زمانی چاتاجاق و انسانین تقواسی چوخ اولمالیدیر و دینی ساخلامالیدیر».