اسلامی معرفتلر و عقیده‌لردن دفاع ائله‌ماق و اونلاری فکر اوغرولاریندان و
تحریفدن ساخلاماق اسلام بؤیوکلری و عالملری‌نین مهم وظیفه‌لریندن ساییلیر.
اماملارین (ع) چوخ یوخاری درجه‌ده اولان سیره‌لری‌نین مختلف ابعادی وار. عقیده
مرزلریندن‌ده مدافعه ائله‌ماق اونلاردان بیریدیر. اونلار بو یولدا چوخلو
چالیشدیلار و حتّی لاپ چتین شاریطده، تحریفچیلرین قاباغیندا دایانیب شیعه
عالملرینه‌ده بو جریانین قاباغیندا دایانماغا تأکید بویوروبلار.
اما باقر (ع) بویورور: بیزه منسوب اولان عالملر، شیطان و اونون قوشونلاری
قاباغیندا صف چکن مبارزلری کیمیدیلر کی مدافعه‌سیز شیعه‌لری اونلاردان
ساخلاییرلار. بیلین کی او شیعه عالملرین ارزشی کافرلر قوشونو قاباغیندا دایانان
مبارزلردن مینلر دفعه یوخاریدیر. چونکی شیعه عالملری اسلام عقیده‌سی و بیزیم
دوستلاریمیزین دینلری‌نین مدافعه ائله‌ینلریدیلر. بیر حالداکی مجاهدلر فقط جغرافی
مرزلری ساخلاییرلار.
امام حسن عسکری (ع) چوخ چتین شرایطده اسلام عقیده‌لریندن تحریفچیلر و عقیده
اوغرولاری قاباغیندا دایاندیلار و ایستر آتاسی دؤرونده و ایستر اؤز آلتی ایللیق
امامتلری زمانیندا (254-جو ایلدن 26-جی ایله قدر) طاغوت قاباغیندا دایانماقدان
علاوه، همیشه اسلام آدینا باش قووزایان فرقه‌لرین قاباغیندا مبارزه ائله‌دیلر.
اسحاق کندی اوزمانین اسلام و قرآن مخالفلریندن بیریدی و جماعت ایچینده فیلسوف
و عالم کیمی تانینمیش ایدی. او اسلامینا مخالفتینی اورا چاتدیردی کی قرآنین ضدّینه
بیر کتاب یازماق قرارینا گلدی. او اؤز گمانینا او کتابدا قرآنین تناقضلرینی
یازاجاق ایدی.
امام حسن عسکری (ع) بو مسأله‌نی بیلندن سونرا، اسحاق کندی‌نین شاگردلریند
اولان بیر شیعه‌نی چاغیریب اونا اسحاقین نئجه قاباغینی آلماغی اؤرگتدی. امام بو
ایشده اسحاقا کؤمک ائله‌ماغینی و اوننان
مأنوس اولاندان سونرا بو سؤزو سوروشماغی تاپیشیردی: قرآنین دئیه‌نی (الله) سنه دئسه
کی «منیم قرآن آیه‌لریندن نظرده توتدوغوم سن گمان ائله‌دیغین کیمی دئییل بلکه من
آیری بیر شئی نظرده توتموشام». اوندا نه دئیَرسن؟
بو شیعه امام امرینه مطابق اسحاق کندی‌نین یانینا گئدیب بیر مدّت اونا کؤمک
ائله‌دی. اوننان تماماً مأنوس اولاندان سونرا مناسب فرصتده اونا دئدی: اوستاد!
اولا بیلر الله سن بیلدیغین معنادان آیری معنا اراده ائله‌میش اولار؟
کندی جواب وئردی: بلی بو مسأله‌نین امکانی وار. اولا بیلر الله بیرزیم
آلدیغیمیز ظاهری معنادان ساوایی معنا اراده ائله‌میش اولسون. آما بو سؤز چوخ درین
سؤز اولدو اونو سن اؤزون دئمیش اولماغین چوخ بعیددیر دئ گؤروم بو سؤزو سنه کیم
اؤرگدیب؟
شاگرد جواب وئردی: «بو سؤز امام حسن عسکری‌دندیر (ع)».
اسحاقی بونو ائشیدندن سونرا دئدی: «بو مسأله‌لر نبوّت خاندانیندان غیریسیندن
ائشیدیلمز». سونرا قرآن تاقضی باره‌سینده یازدیقلاری‌نین هامیسینی یاندیردی.
احمد بن هلال آدیندا بیر شخص ظاهرسازلیق و یاغلی دیلی اینن شیعه‌لرین عقیده‌لرینه
حمله ائلیردی و صوفی‌چیلیغینان جماعتین عقیده‌لرین سوستالدیب ضعیفلدیردی. شیعه‌لرین
بیر عدّه‌سی اونو دوز و مؤمن آدام گؤرستماق ایستیردیلر. دئییردیلر او 54 دفعه
آیاقلین بیت الله طیارتینه گئدیب. آما امام حسن عسکری (ع) چوخ قاطعانه عراقداکی
نماینده‌لرینه اونون یالانچی اولدوغونو یازدی و تاپیرشیردی کی اوندان اوزاق
اولسونلار.
یئنه بیر عدّه واسطه اولدولار کی امامین اونون باره‌ده اولان نظرینی
دَییشسینلر آما امام یازدی: «احمد بن هلال –الله اونو باغیشلاماسین- باره‌ده اولان
امریمیز سیزه چاتدی. الله اونون گناهلارینی و اشتباهلارینی باغیشلاماز. او بیزیم
رضایتیمیزی آلمادان بیزیم ایشلرده دخالت ائدیب و اؤز نفسانی هوَسلرینه مطابق رفتار
ائدیب. الله اونو جهنّمه آپاراجاق. بیز گؤزلریک کی الله بیزیم نفرین سایه‌سینده
اونون عمرونو قیسا ائله‌سین».
امام حسن عسکری‌نین (ع) زندگانلیغی
ربیع الاولین سککیزی اون بیرینجی امام، امام حسن عسکری‌نین (ع) شهادت گونودور.
او حضرت هجری قمری ایلی ربیع الثانی‌نین سکییزینده مدینه شهرینده دنیایا گلدی.
او حضرت 22 یاشی اولاندا متوکل، منتصر، مستعین، معتز، مهتدی و معتمد عباسی
کیمی ظالم خلیفه‌لر دؤرونده اماملیغا چاتدی. بو دؤرده عباسی خلیفه‌لری او حضرته
اولان ظلملرینی حددیندن آشیرمیشدیلار. چونکی مختلف روایتلره گؤره امام حسن عسکری‌نین
(ع) اوغلو امام زمانین (عج) وارلیغیندان قورخوردولار و اونا گؤره او حضرتی نظارتده
ساخلامیشدیلار و اؤز خلافتلری‌نین بقسی اوچون او حضرتی حبسه سالمیشدیلار.
آما امام (ع) مختلف یوللارینان جماعت اینن ارتباطدا اولوردو و بالاسی امام
زمانین (ع) اماملیغینی اونلارا بشارت وئریردی. معتمد عباسی امام حسن عسکری‌نین (ع)
معنوی نفوذوندان قورخدوغونا گؤره او حضرتی 260 هجری قمری ایلین ربیع الاولین
سککیزینده مسموم ائله‌ییب شهادته چاتدیردی. او حضرتین مطهر مزاری سامراء شهرینده
کرامتلی آتاسی‌نین مزاری‌نین کناریندادیر.