قدر گئجهسی موبارک اوروجلوق آیین
چوخ فضیلتلی گئجهسیدیر کی بو گئجه آللاهین رحمت قاپیسی آچیلار و دونیا و آخیرت
حاجت و ایستکلری اوچون ارزیشلی فورصتدیر.
قدر سورهسینین آیهلرینه دیقت
یئتیرماغینان قدر گئجهسینین فضیلتین بیلمک اولار:
- اوندا قورآن نازیل
اولوب.
- اونو آییق قالیب عیبادت
ائلهماق مین آیین عیبادتیندن افضلدیر.
- آللاهین خیر و برکتی او
گئجه نازیل اولار.
- آللاهین خاص رحمتی
بندهلرینه شامیل اولار.
- روح و فریشتهلر او گئجه
نازیل اولار.
قدر گئجهسی ایسلامین موقدس و
موبارک گئجهلریندندیر. آللاه قورآندا اونو کرامتاینن یاد ائدیب و بیر سوره ده
اونون آدینا نازیل ائدیب. ایلین بوتونلویونده قدر گئجهسینه تای فضیلتی و یاخجی
گئجه یوخدور. بو گئجه قورآنین نازیل اولماسی و روح و ملائکهنین نازیل اولما
گئجهسیدیر. قدر گئجهسینده عیبادت ائلهماق مین آیین عیبادتیندن
اوستوندور.
بو گئجه اینسانلارین بیر ایللیق
تقدیری: عؤمری, روزیسی و ساییر ایشلر بللی اولار. بو گئجه ملکلر یئره گلر و ایمام
زمانین (عج) محضرینه گئدر و بندهلره موقدّر اولانی او حضرته عرضه ائدر. بو گئجهنی
آییق قالماق, قورآن اوخوماق و موناجات ائلهماق چوخ توصیه اولوب.
بو گئجهنین آیری گئجهلره فضیلتی
بو مسألهلردن بللی اولور:
- گوناهلارین باغیشلانماسی:
آللاه پیغمبری(ص) قدر سورهسی تفسیرینده بویورور:
«هر کس قدر گئجهسی آییق قالا و مؤمین اولا و جزا گونونه اعتیقادی
اولا, بوتون گوناهلاری باغیشلانار.»
- رمضانین قلبی: ایمام صادق
(ع) بویودو:
«آللاه کیتابیندان ایستیفاده اولور کی آللاه یانیندا آیلارین سایی
اون ایکیدیر و آیلارین سولطانی رمضان آییدیر و رمضان آیین قلبیده قدر
گئجهسیدیر.»
- قورآنین نزولی: ریوایتلره اساساً,
قورآنین بوتونلویو قدر گئجهسی بیر یئرده پیغمبرین (ص) موبارک اورگینه نازیل اولوب.
بو قورآنین بیر یئرده نزولی ایدی, آما اونون تدریجله نازیل اولماسی 23 ایل لفظ
شکلینده اولدو.
- مین آیدان اوستون: ملکلرین
و روحون قدر گئجهسینده یئره یئنماغی و آللاه بندهلرینه سلام وئرماغی اونون مین
آیا شرافتی ساییلیر.
- ایمام باقر (ع)
بویوردو:
- «قدر گئجهسینده ناماز,
زکات و آیری یاخجی ایشلری گؤرماق آیری مین آیدان-کی اونلاردا قدر گئجهسی اولمایا-
داها یاخجیدیر.»