مهدویت اعتیقادینا سطحی باخماغین
عاقیبتین بیلمک اوچون او حضرت‌اینن رابطه ایدعالاری اولانلار و حتی بیر عیده اؤزونو
او حضرت تانیتدیرانلارین پرونده‌سینه باخماق اولار.
آشاغیدا بو یالانچی مودعی‌لرین بیر
سئریسی ایله تانیش اولوروق.
- بیر قیزین اهواز
کندلری‌نین بیرینده, ایدعاسی وار کی ایماملارینان رابطه‌سی وار و ناخوشلارا شفا
وئریر. «ز ـ ج» 21 یاشلی قیز کی بیر مودت قاباق ایدعا ائله‌دی کی ایمام حسین(ع)
اونون یوخوسونا گلیب و اونا ناخوشلاری شفا وئرماغا ایجازه وئریب. سونرا اونون
قارداشی و عمیسی اوغلو اونون تبلیغینده فیلیم و سی‌دی پایلادیلار. بو ایش اوراجان
بویودو کی چوخلی جماعت اوزاق-یاخین کندلر و شهرلردن او قیزین ائوینه گلدیلر و
اونون فامیللری جماعتین نذیرلرین ییغماغا باشلادیلار. او بیر مودّت سونرا ایدعا
ائله‌دی حیاطلارینداکی خورما آغاجی ناخوشلارا شفا وئریر.
-
عوام ایچینده بیر
شایعه یاییلدی کی بیر تقلید مرجعی ایمام زمانین (عج) قاتیلین گؤروب. شایعه‌چیلر کی
بیر عیده فرهنگی محصولات تهیه‌ائدنلر ده اونلارین ایچینده واریدیلر بیر پارا
کاغاذلار و سی‌دی‌لر چیخاتدیلار و ایدعا ائله‌دیلر: آیت الله العظمی . . . دستاماز
آلاندا هوشدن گئدیر و هوشه گلیب حالیندان سوروشاندا دئییر کی ائله ایندی ایمام
زمانین (عج) قاتیلی دونیایا گلدی و بی‌هوشلوقدا اونو اوزونو گؤره بیلدیم
!
بو خبر اصفهاندا و آذربایجاندا گئنیش
صورتده یاییلدی و بئله یاییلدی کی با قاتیل ایرانلیدیر و بو خبر دیندار جماعتین
ناراحاتچیلیغینا سبب اولدو. بونا گؤره بو تقلید مرجعین شاگیردلریندن بیری اوندان
ایستیفتاء ائتدی و او بو مسأله‌نی شیدّتلی صورتده تکذیب ائله‌دی.
-
سیدعلی برزنجی اوغلو
مصطفی, مهدویت مودعی‌لریندن ایدی کی کردستاندا اؤزونو تبلیغ ائله‌دی و ایندی اؤلندن
سونرا کوبرا غئیبتینده باش آپاراریر ! ایکی اینترنت سایتی دؤرد دیلده بو شخصین
یازیلاری و سؤزلرین تبلیغ ائلیر. او 1955 ده عراقین سلیمانیه‌سی‌نین کندلرین
بیرینده دونیایا گلیب و 1988 مهدویت ایدعاسی ائدیب و جماعتی اؤزونه طرف
چاغیردی.
بو شخص ایرانا گلیب چالیشدی
شیعه موجتهیدلرین نظرین جلب ائله‌سین کی اوخو داشا دَیدی و سونرا
عراقا قاییتدی. برزنجی‌نین ایدعاسینا گؤره, آللاهین کلامی فیریشته‌لر طرفیندن اونا
ایلهام اولور و بو یازیلار آللاه طرفیندن اونا گؤنده‌ریلیب. بیر عیده عوامین
اینامینا گؤره بو شخص بیر گون ظهور ائده‌جاق, البته مکه‌ده یوخ بلکه عراقین
کردستانیندا.
-
سید احمد الحسنین
ایدعاسی وار کی ایمام زمانین (عج) وصی‌سی و گؤندریلمیشیدیر. او اؤزونو یمانی
آدلاندیریب اینترنتده گئنیش صورتده اؤزونو تانیتدیریر و حتّی ایدعا ائلیر کی شیعه
عالیملرین چوخونا دعوتنامه گؤنده‌ریب و اونلاری موناظیره‌یه چاغیریب. بو شخصین
سایتیندا گلیب: سید احمد الحسن, آیت الله سیستانینی خاص صورتده علمی موناظیره‌یه
چاغیریب تا اونون قاباغیندا فقط قورآنا ایستیناد ائدیب جواب وئره, آما او قبول
ائتمه‌ییب.
یالانچی یمانی, بو ایدعادان
علاوه اؤزونو بیرینجی مهدی آدلاندیریب و بیر سئری ریوایتلردن سوءایستیفاده
ائله‌ماغینان اؤزونو موعود مهدی آدلاندیریر. بو شخص اینترنتده «بلغ مبین شیخ ناظم
العقیلی قلمی« کیتابین نئچه دیلده یاییب و اوندا ایدعاسی‌نین دلیل‌لرین و
وظیفه‌لرین ساییب و هامیدان ایسته‌ییب کی اونا قوشولسونلار.
-
علیرضا پیغان، بللی
اولمایان بیر نفردیر کی مونجی آدیندا بیر سایت قویوب و اؤزونو موعود مهدی عنوانیندا
تبلیغ ائلیر و قائم آدیندا 673 صفحه‌لیق بیر کیتابی دا بو سایتدا یاییب. بو کیتابین
بعضی یئرلرینده بئله ایدعا اولوب: شیعه‌لرین 12-جی ایمامی کوبرا غئیبتین
اوّل‌لرینده وفات ائله‌دی و قبری مکه‌ده‌دیر. بو مدعی ایدامه وئریر: اون ایکینجی
ایمامدان سونرا علی آدیندا ایکی ایمام ظهور ائدیبلر کی او اونلارین آخیریدیر و لقبی
سید حسنی‌دیر.
-
هرمزگان کندلرینده یر
نفر ایدعا ائله‌دی کی یوخودا مأمور اولوب بندرعباس یاخینلیغیندا بیر کندده مسجید
دوزتسین. ایمام زمان (عج) آدیندا بیر مسجید دوزلماق حالیندادیر کی اونون موتوّلیسی
همان بو شخصدیر. کرامت و ناخوشلارا شفا وئرماق شایعه‌سی جماعتی بو نوقطه‌یه
ییغیب.
-
دشتستاندا بیر 45
یاشلی آرواد ایدعا ائلیر کی ایمام زمانی (عج) گؤروب و ناخوشلارا شفا وئرماق گوجو
وار. او بیر ایمام حسین (ع) عزا مجلیسینده ایدعا ائله‌دی کی ایمام زمانلا(عج)
رابیطه‌سی وار و ایندیه‌جن نئچه ناخوشا شفا وئریب.
بونلار اخیراً مهدویت
ایدعاسی ائدنلرین تکجه بیر آزیدیر.