بحارالانوار کیتابیندا بیر تاریخی ریوایت وار کی مضمونو
بئله‌دیر: جماعت حضرت علی (ع) بیعت ائدن زامان اونلارا خبر وئردیلر کی معاویه بیعت
ائله‌میر مگر بو کی علی‌ابن‌ابیطالب ده عثمان کیمی اونو شام حیکومتینه منصوب ائده.
دئییرلر بو واخت مغیره گلدی حضرتین حضورونا و پیشنهاد ائله‌دی
کی: «مصلحت بئله‌دی کی سن‌ده خیلافت ایشلری یولا دوشوب موستقر اولاناجن, اونو
شامین حیکومتینه منصوب ائلیه‌سن و سونرا ایسته‌سن اونو عزل ائلیه‌سن.» حضرت جواب
وئردی: «سن منیم عؤمرومو او گونه‌جن ضمانت ائلیرسن کی من او زاماناجن دیری قالام؟»
مغیره جواب وئردی: «یوخ»
ایمام (ع) بویوردو: «من هئچ‌واخت قارانلیق
گئجه‌ده ایکی نفر موسلمانا حیکومت ائله‌ماغین جوابینی آللاها وئره‌بیلمه‌رم» و کهف
سوره‌سی‌نین 51-جی آیه‌سینی شاهید گتیردیلر کی « وَ ما کُنْتُ مُتَّخِذَ
الْمُضِلِّینَ عَضُدا؛ من هئچ‌واخت گومراهلاری اؤزومه قول(کؤمک) گؤتورمه‌رم.»
بو گونون سیاست عورفونده مصلحت بو معنایه گلیر کی منفعتلری
حقیقتلره ترجیح وئره‌سن؛ بیر ترجیح کی منفعت گودور؛ ائله صلاح کی ایندی یا گله‌جاقداکی
منفعتی نظرده آلیر. بو ساده تعریف, بو گونون سیاستچی‌لری‌نین عورفو و البته جامیعه‌لر
فرهنگی‌نین علمی و فیکری ریشه‌لرینده اولان تعریفدیر کی مصلحته ائلیرلر. شیعه‌فرهنگینده,
مصلحت موختلیف باخیشلاردان نظرده توتولوب. نیه کی حقیقت‌اینن مصلحتین بیرینجی اوز
به اوز گلمه‌سی باعیث اولدو شیعه‌لیغین باشلانیشیندا, خلافت غصب اولسون و ایسلام
دونیاسی آیریلیغا چکیلسین. آیری منظرلر بو کی مصلحت موختلیف شکل‌لرینده حقیقت و
شریعتین موقابیلینده دایاناندا, اونا دایانماغینان نصین موقابیلینده ایجتهادا
مونجر اولدو, شیعه‌نین سیاسی نیظامی, مصلحته سیاسی ایصطیلاح کیمی عکس‌العمل نیشان
وئریب. آما موقابیل طرفده سونّت اهلی‌نین سیاسی اندیشه‌سینده مصلحتین مفهومونا
جیدّی صورتدنه دیقّت یئتیریلیب.
بو اساسدا دئمک اولار کی کلام, فیقه, و فلسفی باخیمدان
مصلحتین مفهوم شیناسی تاریخی, سونّت اهلینده شیعه‌یه نیسبت داها سابقه‌لیدیر. بو
آرادا بو نوکته‌نی‌ده یاددان چیخارتمامالی‌یوق کی ایسلامی اینقیلابین پیروزلوغو و
ایمامین مصلحته مخصوص دیقّت یئتیرمه‌سیله, و بونو مطرح ائله‌ماغینان کی ایسلامی
نیظامین مصلحتلری بوتون فرعی مصلحتلره حتّی اولیّه احکاما موقدمدیلر و هابئله
موطلقه فقیه ویلایتی‌نین نظری مبنالاری‌نین مطرح اولماسی, شیعه ادبیاتیندا فیقهی
زمینه‌ده «مصلحت» مفهومونون تازا مرحله‌یه گیرمه‌سینه باعیث اولدو. و بو دوشونجه‌نین
تابعینده شیعه فیقهی نیظامی‌نین اخیر ایللرین سیاسی دوشونجه‌سینده «مصلحت»ین
مفهوموندا تازادان دوشونمه حرکتلرین گؤرمک اولار.