نهج‌البلاغه‌نين 86-جي خوطبه‌سينه قيسا شرح
آللاهين لاب عزيز بنده‌لري
نهجالبلاغهده چوخ
موهوم و فوق‌العاده خوطبه‌لرين بيري كي آيري كيتابلاردا دا نقل اولوب 86-جي خوطبه‌‌سيدير
كي او خوطبه‌ده او كسلرين علامتلري و نيشانه‌لرينه ايشاره اولوب كي قورآنا ايمان
گتيرمك، تقوا، صالح عمل و حسنه اخلاقا صاحيب اولماغينان اعجاب‌انگيز مرتبه‌لره
چاتيبلار.
حضرت اميرالمؤمنين (ع) فرهنگينده بو خوطبه‌دن سونرا آيري
بير شئي اولماسايدي يئنه‌ده بو خوطبه جماعتين بوتون دونيا و آخيرت ايشلريني ايصلاح
ائتماغا كيفايت ائلردي.
بو خوطبه‌نين شرحي اؤزونده اولدوغو كيمي و تمام كمال اولسا،
حتماً اونلارجا حجملي علمي، روانكاوي، اخلاقي، ايجتيماعي، عيرفاني و معنوي
كيتابدان چوخ اولار. بو حسابينان بيز جومله‌لرين ترجومه‌سي و يا ساده شرحينه قناعت
ائديريك، اولسون كي بو خوطبه‌نين طريقي‌اينن قورآنا ايمان گتيرمك و اونا عمل ائله‌مك
اثرلرينه آگاه اولاق.
عِبادَ اللّهِ، اِنَّ مِنْ اَحَبِّ عِبادِ اللّهِ
اِلَيْهِ عَبْداً أعانَهُ اللّهُ عَلى نَفْسِهِ،
آللاه بنده‌لري، آللاه درگاهيندا لاب ياخجي بنده اودور كي
آللاه اونا، نفسينه تسلوط ائتمكده كؤمك ائده،
ائي آللاهين بنده‌لري، او حضرتين درگاهيندا لاب عزيز بنده‌لردن
او بنده‌دير كي آللاه اونون نفسينه (پيسليقلارين علئيهينه) كؤمك ائده.
«أعانَهُ اللّهُ عَلى نَفْسِهِ»دن منظور نه‌دير؟
حضرت مولىالموحدينين(ع) كلمه‌لرينه آگاه اولان بعضي شارحلر
«أعانَهُ اللّهُ عَلى نَفْسِهِ»ين توضيحينده يازيبلار: آللاهين، بنده‌سينه كؤمك
ائتمه‌سي بو معنايادير كي اونون استعداديندا قودرت يارالدا كي او قودرتين كؤلگه‌سينده
عقليني امّاره نفسينه غاليب ائله‌سين. تا ائليه بيله قودرتلي عقلي‌اينن كي آللاهين
كؤمگي و هيدايتي‌اينن تغذيه اولوب، تزكيه مرحله‌سينه ناييل اولا.
«أعانَهُ اللّهُ عَلى نَفْسِهِ» نئجه ايجرا اولار؟
بو عرصه‌ده كي عقل و اونداكي قودرت و فعاليتي مطرحدير، دئمك
اولار كي مسأله‌نين تحليلي بوندادير كي حق طرفيندن اينسانا گلن كؤمگين تجلّيسي،
نفسيني و اؤز اؤزون تانيماقدير و اونو، حقّّين تشريعي هيدايتي‌اينن ايصلاح ائله‌مكدير.
عقلي قورآنلا پيوند وورماق، نفسي تانيماغين لاب موهوم
عاميلي
عقلي قورآنلا پيوند وورماق. حقيقتلري اونون ملكوتي آيه‌لريندن
آلماق، باعيث اولار اينسان وارليقداكي اؤز يئرين تانيسين و اؤزونو بو كيتابين آيه‌لري‌اينن
ايصلاح ائله‌سين. بللي‌دير كي تزكيه (كي اولياءاللهين و خاص بنده‌لرين لاب يوخاري
و اساسي هدفي‌دير) اؤزو تانيماميش ايمكانسيزدير.
اؤزو تانيماق‌دا، اؤزو، اولدوغو كيمي تانيماغا لازيم اولان
علمي، اله گتيرمه‌ميش، مومكون دئييل. قورآن، اينسانين نفسي و اونون خاريجينده‌كي
دونياسي ايله بوتون رابيطه‌لريني تانيماغا لاب درين و دقيق تانيمالار ايرائه
وئريب.
قورآنين عقل، نفس، مسئوليت، تكليفلر، معريفت، دوشونجه، اؤز
تانيما، تزكيه و . . .آيه‌لري، ائله آيه‌لرديلر كي اينسانين خاليقي طرفيندن،
قارانليق دونيادا ايشيق منبعي كيمي حقيقتلري اونا گؤرسه‌دير و يولو، قارانليقلارين
ايچيندن اونون اوچون ايشيقلانديرير.
حقيقتده بو آللاهدير كي قورآنلا اينساني بوتون بوعدلاري
اينن تانيتديرير و اونو وارليقداكي يئيرينه تانيش ائلير. سونرا تزكيه يولونو و
اينساني و معنوي كماللارا چاتماق يولونو اونون قاباغينا قويور. اؤزو تانيماق بو
دئييل كي اينسان اوّلده بير ماهير روانشيناس و يا فيلسوف اولا و سونرا
اينسان اولماغا باشلايا.
موهوم بودور كي اوّلده گرك تعليم و تربيت و تزكيه‌اينن
روحون عظمتينه متوّجيه اولا و تدريجاً روحون عالي فعاليّتلري‌اينن تانيش اولا و بو
اعتيقادا يئتيشه كي آللاهين روحا وئرديغي استعدادلار و گوجلر قانون و نظم اوزو
اينندير. بو اينامين ضرورتي بوردان قايناقلانير كي بصيرتلي اينسان، گؤرنده كي
سامان و يا يارپاق كيمي بير كيچيك وارليق آغاجدان توشمه‌سينده قانون و نظمدن كنار
دئييل، آيا اولا بيلر كي روح بو گؤز قاماشديران عظمتي‌اينن قانونسوز و نظمسيز
اولسون؟
بو ايبتيدايي معاريفين داليسي توتولسا و ايقتيضا ائتديگي
عمل خاليصليغينان يئرينه گتيريلسه، بو زاماندا، عيرفان يولونون ساليكي يولا
توشوبدور.