حضرت فاطمه‌نين (س) آدلاري‌نين سيرّي نه‌دي؟
آللاه تعالا فاطمه‌ني اؤز عظمت نوري‌اينن ياراتدي. فاطمه
پاريلداياندا يئر و گؤي ايشيقلاندي و ملكلر تعجوبله سوروشدولار: آللاه بو نه
ايشيقدي؟
آد نيشانه معناسيندا و آد قويماق بير جور نيشانه قويماقدير.
علمي نظردن اينسانين آدي اونون حالي و آينده‌سينده چوخ اثرليدير. و روحي جهتدن
پيسليق و يا ياخجيليق، حركت و يا سيكونا باعيث اولار و بونا خاطير ايسلام اونون
موريدينده چوخلو توصيه‌لر ائله‌ييب.
ايسلام ايسته‌ييب كي اوشاغا ائله آد قويولسون كي اونو روشد
وئرسين، اونون بير مكتب و دوشونجه‌يه باغلي اولماسين گؤرستسين، اونا غرور و
ايفتيخار گتيرسين، اونو موثبت ايشلره وادار ائله‌سين و حتّي بعضي موريدلرده بير
دوشونجه‌نين ديريلمه‌سينه كؤمك ائله‌سين.
آللاهين رسولو خانيم فاطمه(س) شخصيتي ابعادينا موناسيب او حضرتي
موختليف آدلار و لقبلري‌اينن چاغيراردي كي اونلارين هاميسي گؤزل، غرور و ايفتيخار
گتيرن، ايسلامي دوشونجه رنگلري اولان و هر بيري اؤزونه مخصوص موناسيبتده
ايشله‌نردي و يا خانيم فاطمه‌نين(س) حالت و صيفتلرين نيشان وئرردي.
خانيم زهرا(س)-نين موبارك آدلاري
ايمام صادق (ع) بويوروبلار: خانيم فاطمه‌نين (س) آللاه يانيندا
دوققوز مخصوص آدي وار: فاطمه، صدیقه، مبارکه، طاهره، زکیه، راضیه، مرضیه، محدثه و
زهراء.
ايمام صادق(ع) فرماييشينه گؤره خانيم فاطمه زهرا نين (س) آللاه
يانيندا دوققوز مخصوص آدي وار و بونا گؤره او حضرتين كونيه‌لريندن «اُمّالأسماء»
دير. يعني چوخ آدي اولان خانيم. و بو مسأله صدیقه کبرى‌نين (س) روحي عظمتيندن خبر
وئرير، چونكي او حضرت نمونه خانيميدي. نمونه خانيم يعني كاميل اينسان كي بشريّته
اولگو اولسون. بونا خاطير بوتون عالي اينساني صيفتلر او حضرتده جمع اولموشدو و
حضرت زهرانين(س) هر ياخجي صيفت اوچون مخصوص لقبي واريدي.
نيه فاطمه؟
خانيم فاطمه زهرانين (س) بير رسمي آدي واردي كي همان فاطمه‌دير.
بو آدي پيغمبر اكرم(ص) قيزي دونيايا گلنده او حضرته سئچدي.
آللاه رسولو(ص) بويوردو: او و اونون شيعه‌لري جهنم اوتوندان قطع
اولدولار و فاطمه قطع اولموش و كسيلميش معناسيندادير و بونا خاطير بو آد او حضرت
اوچون سئچيلدي. هابئله ايمام صادق(ع) بويورب: چون او هر جور شرّدن و پيسليقدان قطع
اولوب و چون جماعت اونو كاميل تانيماقدان قطع اولوبلار، بو آدا آدلانيب.
نيه صديقه؟
چونكي او حضرت دوزلوقدان سونرا هئچ نه دانيشمادي و حؤرمتلي
آتاسي هر نه دئدي، تصديق ائله‌دي.
آللاه رسولو(ص) حضرت علي‌يه (ع) بويوردو: من فاطمه‌يه نئچه
سيفاريش ائله‌ميشم كي سنه دئسين. او نه دئسه قبول ائله چونكي او دوز دانيشاندي،
چوخ دوز دانيشاندي.
نيه مباركه؟
بركت چوخ خئيرليليق معناسيندادير و فاطمه‌نين نسليندن ايسلام
عالمينه چوخلو نسل هديه اولوب. بونا خاطير بعضي تفسيرلرده گليب كي «انا اعطیناک
الکوثر» آيه‌سيندن منظور خانيم فاطمه زهرا(س) دير.
نيه طاهره؟
ايمام باقر(ع) بويوروب: چونكي او حضرت هر جور ناپاكليقدان اوزاقدير.
و چوخلو روايتلره گؤره تطهير آيه‌سي «انما یرید الله لیذهب
عنکم الرجس اهل البیت و یطهرکم تطهیرا» خانيم فاطمه زهرا (س) موريدينده نازيل
اولوب. پس او حضرت طاهره‌دير چون هر جور پيسليق و ناپاكليق حضرتين وجودوندان
اوزاقدير.
نيه زكيه؟
زكاة هم روشد تاپماق و هم طهارت معناسيندادير. بونا خاطير زكيه
هم بو معنايه‌دير كي فاطمه ثمره‌لي نسلدن دونيايه گليب و هم اونون وجودي پاك و
طاهيردير.
نيه راضيه؟
حضرت فاطمه‌نين (س) قيسا عؤمرو چتينليق و غم غوصّه‌اينن اولوب.
اونون چوخ چتين بير ياشاييشي اولدو آما هئچ واخت شيكايت ائله‌مه‌دي و هميشه آللاها
شوكر ائله‌دي و راضي‌ايدي.
ريوايتده گليب كي بير گون آللاهين روسولو فاطمه‌ني گؤرور كي
كوبود و خشين پالتار گئييب و موبارك اللري‌اينن بوغدا دارتير و عئيني حالدا كيچيك
اوشاغينا دا سوت وئرير. آللاهين رسولو آغلاييب بويوردو: عزيز قيزيم ! آخيرت
شيرينليغينا چاتماق اوچون بو دونيانين آجيليغين داد.
خانيم فاطمه زهرا (س) نه اينكي شيكايت ائله‌مه‌دي، بلكه عرض
ائله‌دي: ائي آللاهين روسولو من آللاهين وئرديغي نعمتلره گؤره شاكيرم.
و هابئله بير گون حضرت علي(ع) آللاهين رسولوندان ايسته‌دي كي
ايمكاني اولسا فاطمه اوچون كولفت توتسون، آما آللاهين رسولي (ص) خانيم فاطمه زهرا
تسبيحاتيني اونلارا اؤرگتدي. حضرت زهرا بو امري ائشيدندن سونرا پيغمبره اوچ دفعه
بويوردو: من آللاهدان و رسولوندان راضي‌يم.
نيه مرضيه؟
آللاه و اونون رسولو حضرت فاطمه‌نين(س) بوتون ايشلريندن راضي
ايديلر. آللاه رسولو هئچ‌واخت فاطمه‌يه غضبلنمه‌دي و عكسينه، گاهدان بويوراردي:
آتاسين اونا قوربان اولسون.
بئله‌ايدي كي پيغمبر فاطمه‌نين ريضايتين آللاه ريضايتي بيليردي
و بويورودو: آللاه فاطمه‌نين غضبي‌اينن غضبه گلر و اونون ريضايتي‌اينن راضي اولار.
نيه محدثه؟
ايمام صادق(ع) بو بارده‌ده بويوروب: چونكي گؤيون ملكلري يئنيب
اونونلا دانيشارديلار.
ايسلام فرهنگينده دوز دانيشان موحدّيثلرين هميشه مخصوص
حؤرمتلري واردير. موحدّيثلر و راويلر ديني ارزيشلرين و شيعه مكتبين ارزيشلي ذخيره‌لرين
ساخلاماسيندا موهوم و بيرينجي نقشلري واردير.
نيه زهرا؟
ايمام صادق(ع) بويوروب: چونكي او موكرّمه خانيمين ايشيغي گونده
اوچ دفعه امیرالمؤمنین(ع) اوچون پاريلداييردي و چون عيبادت محرابيندا داياناندا
اونون پارلاق ايشيغي آسمان اهلينه آشكار اولوردو، گؤيده‌كي اولدوزلارين ايشيقلاري‌نين
يئر اهلينه گؤروندويو كيمي.
حضرت فاطمه (س) آيري آدلاري بونلاردير:
حصان (محفوظ
معناسيندا)، حره (آزاده معناسيندا )، سیده (مؤحترم خانيم معناسيندا)، عذراء (پرده
دالي‌سيندا اوتوران معناسيندا) و او حضرتين گؤيلرده كي آدي منصوره (كؤمك
اولونموش)گليب.