حضرت معصومه‌نين (س) قوم شهرينه واريد اولماسي‌نين ايل
دؤنومو
گونش بانوسي‌نين پئشوازي
جام جم آنلاين: شهرين بؤيوكلري دروازا كناريندا كروانين
واريد اولماسيني گؤزلورلر. غريب بير كروان يولدان يئتيشير؛ مدينه‌دن گلن بير كروان
كي طوس شهرينه گئدير. يورقون بير كروان كي يول‌كسنلر يوللاريني باغلاييب وار
يوخلاريني تالاييبلار و اونلارين بير عيدّه‌سين شهيد ائديبلر.
ائله كروان كي اونون قافيله‌سالاري بير بؤيوك مرتبه و
قارداشينا وفالي اولان بير بانودير؛ او كي ايمام بالاسي و ايمام عمه‌سي و ايمام
باجيسي‌دير، اؤزوده فاطمه و معصومه‌دير.
آرالاريندا شهرين آدليم عاليملريندن اولان بؤيوكلر كرامت
بانوسي‌نين پئشوازي اوچون اؤزلريني شهرين دروازاسينا يئتيرديلر. اؤزلري‌اينن گول
گولاب گتيريب گؤزلرين يولا تيكيبلر.
شهرين دروازاسين بزه‌ييب و كروان بانوسي‌نين واريد
اولماسينا لحظه‌لري ساييرلار. حضرت فاطمه معصومه(س) قوما گلير و موبارك وجودي بو
شهري ايشيقلانديرير.
نئچه ساعت سونرا اينتيظار باشا چاتير و كروان شهرين
ويلايتمدار جماعتي‌نين اشتياقلاري ايچينيده شهره گيرير. شهرين بؤيوگو «موسي بن
خزرج قمي» كي پئشوازا گليب، دوه‌ني ائوينه طرف هيدايت ائدير و اؤز ائويني حضرت
معصومه‌نين (س) ايختياريندا قويور.
شهرين مير مئيدان محله‌سينده اولان بو ائو، 17 گون او
حضرتين نقاهت مودّتينده ايگامتگاهي اولور.
شهرين جماعتي «موسي بن خزرج» كيمي حضرته و اونون
همراهلارينا خيدمت ائتمگي اؤزلرينه بؤيوك ايفتيخار بيليب و سؤزه سيغمايان شادليق و
اشتياقينان او حضرتين حضورونو اؤزلرينه غنيمت ساييرلار.
كروان بانوسيني، طوس‌دا اولان عشق قيبله‌سي‌نين سككيزينجي
اولدوزو، قارداشي‌نين گؤروش عشقي بو دياره چكيب گتيريب آما افسوس كي تقدير ائله
اولدو كي حضرت حقّين دعوتينه لبيك دئييب دونياني ترك ائدير و قارداشين گؤروش حسرتي
اورگينده قالير. اونون پاك مزاري‌نين بركتينه، بو شهرين علميه حوزه‌سي تشكيل تاپير
و قوم شيعه‌لرين مركزي اولور.