عمر بن سعد كربلايه گلندن سونرا ايمام
حسينين (ع) يانينا بير نفر گؤندردي و سوروشدو نيه بو يوردا گليب و ايمام حسين (ع)
جوابيندا بويوردو: منيم بو يوردا گلماغيمين سببي سيزين همشهريلريزين دعوتي‌دير، كي
مينلرجه نامه‌اينن مني اؤزلرينه طرف چاغيرديلار. ايندي منيم يولومون ايدامه وئرمه‌سي‌اينن
موخاليف اولساز قاييدارام.
عمر بن سعد، ايمام حسين (ع) جواب نامه‌سين
آلاندان سونرا باريشماق و صولحه اومودلي اولدو.
اوندان سونرا ايمام حسين (ع) و عمر بن
سعد آراسيندا آيري نامه‌لر موباديله اولدو و باعيث اولدو اوّل‌كي حساسيّتلر و
دوشمنچي‌ليقلار آزالسين.
آما يزيد بن معاويه‌نين كوفه‌ده كي
عاميلي، عبيدالله بن زياد، كي كربلا جرياني و عمر بن سعدين ايمام حسين (ع) اينن
رفتارينا نظارت و ايشرافي واريدي، باريشا و جريانين قانسيز قورتولماسينا حاضير
دئييلدي و چاليشيردي بو ايش چتينلشسين.
بونا گؤره محرّمين يئددي‌سينده عمر بن
سعده بير نامه يازيب اوندان ايسته‌دي كي ايشي ايمام حسينه (ع) چتين توتسون و
اوننان فرات چايي آراسيندا فاصيله سالسين و اونلاري فرات چاييندان ايستيفاده ائله‌ماغا
قويماسين تا ايمام فيشاردا قاليب تسليم اولسون.
عمر بن سعد كي «ري» شهري‌نين حكومتينه
خاطير هر ايشه حاضيريدي، عبيداللهين امرين فورآ يئرينه يئتيردي و «عمرو بن حجّاج
زبيدي»ني بئش يوز نفر سواري‌اينن فراتا مأمور ائله‌دي تا ايمام حسينين (ع)
كؤمكلريني فراتا ياخين قويماسينلار.
عمر بن سعيدين قوشونو محرمين يئددي‌سيندن،
فرات سويوندان شيدّتلي موراقيب اولدولار تا ايمام حسينين (ع) كؤمكلري اللري سويا
چاتماسين.
لاكين اونلارين موغايات
اولماقلارينا باخماياراق ايمام حسينين (ع) كؤمكلري عاشورا گئجه‌سينه‌جن
قارانليقدان ايستيفاده ائديب اؤزلريني فرات چايينا چاتديريرديلار و خئيمه‌لرين
سويون تأمين ائليرديلر. شوجاعتده و وفادارليقدا مشهور اولان حضرت عباس بن علي،
ابوالفضل (ع) خئيمه‌لره سو چاتديرماقدا چوخ چاليشيردي.