ابن سینا شفانین اونونجو مقاله‌سینده و نجات کتابی‌نین
آخرینده اؤز مطلوب انسانی جامعه‌سی‌نین نئجه‌لیغی باره‌ده دانیشیب و اونو «مدینه عادله» آدلاندیریب.
او الاهیّات شفاسیندا «فی عقد المدینة و عقد البیت»
آدیندا بیر مبحث ضمنینده مدینه و خانواده بناسینی قویماغین نئجه‌لیغی باره‌ده بحث ائلهییب. او بو مبحثده مدینه اهلی‌نین قشرلری و طبقه‌لری
و اونا حالکم اولان قانونلار باره‌ده بحث ائلهییب.
شیخ الرئیس همان مقاله‌ده «خلیفه و امام و اوندان اطاعت ائله‌ماغین واجبلیغی و سیاستلرین نوعلری، معامله‌لر و اخلاق» آدیندا بحث‌ده آچیب آما اوردا سیاسی نظاملار باره‌سینده دانیشماییب بلکه اؤزونون مطلوب سیاسی سیستمینی توضیح
وئریب.
اونون نظرینه گؤره پیغمبرین «عقل قدسی» آدیندا کامل اولموش
عقلی اولدوغونا گؤره، معرفت منبعی یعنی فعال عقل اینن مرتبطدیر. بونا گؤره اونون
اجتماعی موقعیتی و سیاسی اختیارلاری آیریلاریندان فرقلی و ممتازدیر. ابن سینا
اعجاز و نبوّته بوجور باخدیغی اوچون انسانلاری دؤرد یئره بؤلوب:
بیر دسته‌نین نظری قوّه‌سی صفانین بیر حدّینه چاتیب کی انسانی معلّمه احتیاجلاری
یوخدور و اونلارین عملی قوّه‌لری بیر حده چاتیب کی
متخلیه‌قوّه‌سی‌نین گوجو اینن ایندی و گله‌جاغین اتفاقاتینا آگاه اولورلار و دنیادا معجزه‌لی ایشلر گؤره بیلیرلر. ایکینجی دسته، حدّی قوه کمالینا
چاتیبلار آمامتخیله قوه کمالینا چاتماییبلار. اوچونجو دسته‌نین نظری قوه‌لری کاملدی آما عملی
قوه‌دن بهره‌سیزدیلر. دؤردونجو
دسته ده اؤز همنوعلارینا فقط عملی قوّه‌سایه‌سینده توفُّق
تاپیرلار.
حکومت بیرینجی دسته‌نیندیر
چونکی اونلاری عقل‌لری واسطه‌سی اینن عقول عالمینده
و نفسلری واسطه‌سی اینن طبیعت عالمینده یاشیرلار. بونا گؤره کی اونا تدبیر
و تسلط شایسته‌لیقلار وار. سیاسی قدرتین تمشیتی‌ده ایکینجی دسته‌یه
عایددیر.
دؤردونجو دسته ده اشرافیته چاتیرلار. اونلار عادی طبقه‌لردن ممتاز اولسالار دا فوق العاده قوه‌لری اولمادیقلاری
اوچون فقط عملی فضیلتلری اله گتیرماق اوچون چالیشیرلار.