ابو ریحان محمد بن احمد بیرونی‌نین دوستونون ریحان آدلی کیچیک بیر قیزی واریدی کی اولدوزلارا و نجوم علمینه چوخ علاقه‌سی واریدی. ابو ریحان اونا بو زمینه‌ده درس وئرماغا رغبت تاپیر و اونون اوچون نجوم علمی باره‌ده «کتاب التفهیم لأوائل صناعة التنجیم » آدیندا تعلیم کتابی یازیر. اوندان سونرا ابو ریحان آدینا معروف اولور. اونون آتا بابا کندی‌نین آدی بیرون اولدوغو اوچون‌ده بیرونی آدلانیر.

ابو ریحانین «آثارالباقیة عن القرون الخالیة» (گئچمیش عصرلردن قالان اثرلر) کتابیندا مختلف ملّتلرین اهمیتلی واقعه‌لرینی یازیب و بیر-بیریله مقایسه ائدیب. مثلاً بو کتابدا ملّتلرین یئرین عمرو باره‌ده‌کی نظرلرینی یازیب مقایسه ائله‌ییب.

ابو ریحان، ابو علی سینا اینن معاصر ایدی و اونونلا مکاتبه ائدردی.

سلطان محمود غزنوی زمانی، ابو ریحان سلطان محمودونان هند سفرینه گئدیر و اوردا هند و سانسکریت دیلین اؤرگشیر و هند فلسفه‌سی اینن تانیش اولور و سونرالار چوخلو کتابلار سانسکریت دیلیندن عرب دیلینه ترجمه ائلیر.

ابو ریحان علم اؤرگشماغا او قدر دوشگون ایدی کی اؤلوم یاتاغیندا دا علمی بیر مسؤله‌نین حلینه چالیشیردی. اوندان سوروشاندا کی اؤلوم یاتاغیندا بو مسأله‌نی بیلدین بیلمه‌دین نه فرقی وار؟ جواب وئریر: من بو مسأله‌نی حل ائلیه بیلسم یقیناً داها عالم بو دنیادان گئده‌جاغام.

ابو ریحانین اثرلری اکثراً عرب دیلینده اولوب کی اونلاردان بونلاری آد آپارماق اولار: تحقیق ماللهند، التفهیم لاوایل صناعة التنجیم، الجماهر فی معرفة الجواهر، الصیدنة فی الطب، آثار الباقیة عن القرون الخالیة، استیعاب الوجوه الممکنة فی صنعة الاصطرلاب.

 ابو ریحان ۲۹ ذیقعده ۳۶۲ قمری (۵ سپتامبر ۹۷۳ میلادی) ایلینده خوارزم یاخینلیغیندا بیرون آدلی بیر کندده دنیایه گلدی. و ۲۷ جمادی‌الثانی ۴۴۰ قمری (۱۳ دسامبر ۱۰۴۸ میلادی)‌ده غزنه شهرینده دنیایا گؤز یومدو آما قبری‌نین هاردا اولدوغو بللی دئییل.