• امام حسین (ع) بویورودولار: اسلام امتی یزید کیمی حاکمه مبتلا اولسا اسلامینان وداعلاشماق لازمدیر.
  
  عزادارلیق اسلام و دین فرهنگینی ساخلاماق اوچون بؤیوک ایشدیر. مین ایلدن آرتیقدیر کی شیعه مذهبی اقلیتده و مظلوم موقعیتده واقع اولوب. بنی امیه زمانیندا اهل بیتین (ع) آدینی آپارماق جرم ساییلیر. چونکی دوشمنلر او حضرتلرین آدلاری‌نین دالیسینجان فرهنگلری‌نین‌ده گلمه‌سینی بیلیرلر. اونلارین فرهنگی‌ده چوخلو ایشلرین پرده‌سینی آچار و ریاکارلارین ریاسینی اوزه چیخارار.
  
  آما عزادارلیقدا اسلام و اهل بیت (ع) فرهنگی و سیره‌سی بیان اولماسا او عزادارلیق یزیدی عزادارلیقدیر. چونکی امام حسینه (ع) بیرینجی رسمی عزادارلیق مراسمی توتان یزید اؤزو اولدو. دئدی من ابن زیادا بئله دئمه‌میشدیم او افراط ائله‌ییب. ایندی بو اشتباهین جبرانینا عزادالیق مراسمی قورمالی‌یم. بیلیرسیز کی کربلا اسیرلری شاما قدر شکنجه‌ و تحقیرینن آپاریلدیلار آما شامدان مدینه‌یه حکومتی احترامینان انتقال تاپدیلار.
  
  یزید امام حسین (ع) اوچون عزادارلیق مراسمی توتاندان عزادارلیق ایک نوع اولوب. بیر دسته‌سینده صرفاً عزادالیق اولور و بیر دسته‌سینده عزادارلیقدان علاوه ائمه‌نین (ع) سیره و سؤزلری مطرح اولور. بو مسأله‌‌نین ایندی‌ده ادامه‌سی وار.
  
  امام رضادان (ع) روایت وار کی شیعه یالان دانیشماز. مشهدین شیعه‌لری امام رضانین (ع) گؤروشونه گئتدیلر. امام اونلاری آلتی آی بویوندا قبول ائله‌مه‌ییب بویوردو: یالان دانیشان بیزیم شیعه‌میز دئییل. اونلار جواب وئردیلر: بیز امام حسینه (ع) عزادارلیق ائله‌روق و احسان وئره‌ریک. اما بویوردو: شیعه، ائوده و بازاردا یالان دانیشماز، بیری‌نین باشینا بؤرک قویماز، ربا وئرمز و نزول یئمز. شیعه باها ساتماز، صادق اولار. بونلاین هامیسینا معتبر روایتلر وار. امام رضا بویوردو بو خصوصیتی اولمایان شیعه‌لر یالانچی شیعه‌دیلر و اسلامین آبروسینی آپاریرلار.
  
  روایتلریمیزده وار کی امام حسینه آغلایان و یا آغلادان جنّته گئدر. دوزدور بیری واقعاً امام حسینه آغلایا بیلسه البته جنّت اهلیدیر. آما دوغرودان و حقیقتاً امام حسینه آغلایا بیلماق اوچون او شخصیتی تانیماق و اونون سؤزلرینه عمل ائله‌ماق لازمدیر. چوخلاریمیز نماز قیلیروق آما کیمین نمازی واقعاً خالص اولور. انسانین بیر رکعت نمازی خالص اولسا الله‌ینان رابطه‌سی قورولماز؟ پس بو آرادا نا خالصلیق وار. بیری‌ده خالصاً مخلص امام حسینه آغلایا بیلسه یعنی بو آدام الله و اسلام دئیَنلره عمل ائلر کی امام حسینه آغلایا بیلیر.