بیر نفر کوچه‌ده پیغمبرین (ص) قاباغینی کسیب دئییر منه بورجلوسان و ایندی منیم بورجومو قایتارمالیسان. پیغمبر (ص)  بویورور: «اولاً منیم سنه بورجوم یوخدو، ثانیاً اگر پول ایستیسن ایندی یانیمدا یوخدو، اجازه وئر گئدیم».

شخص دئییر: «بیر آددیم‌دا گؤرتورمگه قویمارام. ائله ایندی و بوردا منیم پولومو و بورجومو قایتارمالیسان».

پیغمبر (ص)  یوموشاندیقجا او داها خشن‌لشدی و نهایتده پیغمبرین (ص)  یخه‌سیندن یاپیشدی و رداسینی ائله چکماغا باشلادی پیغمبریمیزن مبارک بوینو قیزاردی.

پیغمبری (ص)  مسجدده گؤزله‌ین لر گلیرلر گؤرسونلر کی پیغمبر (ص)  نیه یوبانیب. گؤرورلر بیر یهودی بئله بیر ادّعا ائلیر و دعوا قصدی وار. پیغمبر (ص)  بویورور: «سیزین ایشیز اولماسین من اؤزوم دوستومونان مسأله‌نی حل ائله‌رم».  پیغمبر (ص)  او قدر یوموشاق ترپشیرکی یهودی همین یئرده دئییر: «اشْهَدُ انْ لا الهَ الَّا اللَّهُ وَ اشْهَدُ انَّکَ رَسولُ اللَّهِ» سونرا دئییر: «سنین بو قدر تحمّلون عادی بیر انسان تحمّلو دئییل، بو تحمّل پیغمبر یانا تحمّلدور».

یئنه بیر آیری ماجرادا مکّه‌نین فتحینده قریش اشرافی‌نین خانیملاری‌نین بیری اوغورلوق ائله‌میشدی. محاکمه اولوب اتهام ثابت اولاندان سونرا پیغمبر (ص)  اونو مجازات ائله‌مک ایستیردی کی واسطه‌لر ایشه دوشدو.

بیر دئییردی: «یا رسول الله امکانی اولسا اونو مجازات ائله‌مه‌یین. او فلان کسین قیزیدی، اونون چوخ احترامی وار. بیر طایفانین آبریسی گئدر». خلاصه چوخلاری واسطه اولماغا چالیشدیلار. نهایتده پیغمبر (ص)  بویوردو: «امکانسیز و محالدی، ایستیرسیز اسلام قانونو آیاقلاییم؟! بو خانیم اشرافدان اولماسایدی و کیمسه‌سیز بیری اولسایدی یئنه بوجور واسطه اولاردیز؟»

گؤردویوموز کیمی پیغمبر (ص)  شخصی مسأله‌لرده چوخ یوموشاق ایدی آما جامعه‌یه و دینه مربوط اولان مسأله‌لرده اصلاً دالی اوتورمازدیلار».