حضرت عیسی بن مریم (ع) بؤیوک الهی پیغمبر دسامبرین 25-ده بیرینجی میلادی
ایلینده 621 ایل پیغمبرین هجرتیندن اوّل، فلسطینین بیت لحمینده دنیایا گلدی.
البته مسیحی‌لر او حضرتین پیغمبر یوخ بلکه -نعوذ بالله- الله-ین انسان تجسومو
اولدوغونا اینانیرلار.
آناسی عمرانین قیزی حضرت مریم (س)
شرافتلی خانیملاردان و بنی اسرائیلین یوخاری شخصیّتلریندن ایدی. مریمین آتاسی حضرت
سلیمان (ع) نسلیندن اولان عمران، بنی اسرائیلین بؤیوک و تقوالی عالملردنیدی. عیسی
پیغمبر معجزه‌لی شکلده باکره آنادان دنیایه گلیب بئشیکده دانیشماغا باشلاییب
پیغمبرلیق بشارتینی وئردی.
حضرت مریم (س)
حضرت عیسی‌نین (ع) کرامتلی آناسی، تاریخین فضیلتلی شخصیّتلریندندیر کی قرآن کریم‌ده
12 سوره و 34 آیه‌ده اونلاردان آد آپاریب. قرآندا خانملار ایچینده لاپ چوخ او
حضرتین آدی چیکلیب.
قرآ« کریمین آل عمران سوره‌سی‌نین 45-جی آیه‌سینده
اوخوروق: «إِذْ قالَتِ الْمَلائِکَهُ
یا مَرْیمُ إِنَّ اللَّهَ یبَشِّرُکِ بِکَلِمَهٍ مِنْهُ اسْمُهُ الْمَسِیحُ عِیسَی
ابْنُ مَرْیمَ وَجِیهاً فِی الدُّنْیا وَ الْآخِرَهِ وَ مِنَ الْمُقَرَّبِینَ»
اوندا کی ملکلر دئدیلر: ای مریم! الله سنه اؤز طرفیندن بیر کلمه‌یه بشارت وئریر،
اونون آدی مسیح، عیسی بن مریمدیر، او دنیا و آخرتده وجهه‌لی انسان و الله-ـا
یاخین اولاجاق.
او حضرت آناسی‌نی
قیمومتی آلتیندا بؤیویوب 12 یاشیندا عالملرین جمعینده مباحثه‌یه باشلادی.
او حضرت 30
یاشیندا پیغمبرلیغا مبعوث اولدو. حضرت عیسی‌نین (ع) تبلیغی اثرینده جماعت دسته-دسته
اونا ایمان گتیریردیلر. بو اوزدن یهودی بؤیوکلری اونو اؤلدورمک فکرینه دوشدولر.
اونلار او حضرتی اؤلدورمک ایسته‌ینده الله او حضرتی گؤیلره آپاردی و یهودیلر عیسی‌یا
اوخشایان بیر نفری صلیبه چکدیلر.
حضرت عیسی‌نین
علاجسیز ناخوشلاری علاج ائله‌ماق کیمی معجزه‌لری واریدی و انجیل کتابی اونا نازل
اولدو. همیشه سفرده اولدوغو اوچون ائولننمه‌دی و سوبای قالماغا مجبور قالدی.
قرآن کریم
نساء سوره‌سی‌نین 157-جی آیه‌سینده بویورور:« ... و ما قتلوه و ما صلبوه و لکن
شبِّه لهم» [عیسی‌نی]نه اؤلدوردولر و نه صلیبه چکدیلر، آما ایش اولارا مشتبه
اولدو.
بئله‌لیغینان
عیسی 33 ایل عمر ائله‌دی. یهودیلر اونو اؤلدورماق اوچون توتدولار. الله اونو
اونلارین الیندن قورتاریب گؤیه آپاردی. آما اونون صلیبه چکیلیب اؤلدورولمه‌سی
یاییلدی. ائله ایندی‌ده صلیب علامتی او حضرتین شهید اولماسی گمانی اینن مقدس
ساییلیر.
اسلامی و شیعه
رویاتلره اساساً حضرت عیسی (ع) امام زمان آغانین (عج) ظهورو زمانی قاییداجاق و او
حضرتین دالیسیندا نماز قیلاجاق.
بحار الانوار
14 و 18-جی جلدلری