آیه‌لر و روایتلره گؤره، انسان گوجلو اراده‌یه صاحب اولماق و قرار وئرماقلاردا چتینلیقلارینان اوزلشمه‌ماق اوچون، گئجه‌لر و طلوعین آراسیندا آییق اولوب الله-ین عبادتینه مشغول اولمالیدیر.
پیغمبردن (ص) روایت اولوب کی بویوروبلار: «جبرئیل گئجه نمازینی او قدر منه تاپیشیردی کی بئله بیلدیم امّتیمین یاخجیلاری گئجه‌لر یاتمیه‌جاقلار». بونا اساساً نافله‌لرین چوخلو فضیلتلری وار، بلکه بعضی روایتلر اونو ترکیتماغی معصیت ساییبلار.
گئجه نمازی انسان اراده‌سی‌نین گوجلندیرمه‌سینده چوخ مهم تأثیری وار. قرآن کریم فجرین دوغماسینا، گئجه آییقلیغینا و دان اولدوزونا، اونلارا آند ایچماق قدر اهمیّت وئریر: «آند اولسون فجرین دوغماسینا، اونلو گئجه‌لره، آند اولسون گئجه‌نین درینلیغیندا قیلینان گئجه نمازینا، آند اولسون ایکی رکعت شفع نمازینا و آند اولسون بیر رکعت وتر نمازینا و آند اولسون گئجه‌نین گئدیشینه». و آیری یئرده بویورور: «آند اولسون گئجه‌یه و طلوعین آراسینا». (فجر سوره‌سی)
قرآنین آیری سوره‌لرینده بو جور جمله‌لره راست گلماق اولار. قرآنداکی بو آند ایچمه‌لر سؤزون اهمیّتینی بللی ائلیر و گئجه آییقلیغی‌نین انسانین روحوندا فوق‌العاده تأثیرینه اشاره ائلیر. گونلوق مسأله‌لر انسانین دقّتینی اؤزونه جلب ائلیر و اونون فکرینی مختلف وادی‌لره چکیب اونو نماز اوستونده حضور قلبدن اوزاقلادیر. آما گئجه‌نین درینلیغیندا و فجرین دوغدوغو زمان، نئچه ساعت یاتاندان سونرا، مادّی زندنگانلیغین غوغاسی‌نین یاتدیغی آنلاردا، آرام بیر محیطده، هر جور ریاکارلیقدان اوزاق، انسان خاص دقّت و حضور قلب تاپیر کی بو آنلارین عبادتی و راز و نیازی فوق‌العاده روح پرور و کمال یارادان اولور.
علامه مجلسی امام صادقدن (ع) بئله بیر حدیث نقل ائلیر: «مؤمنین شرفی گئجه نمازی قیلماقدا و عزّتی اؤز ناموسونو جماعتدن ساخلاماقدادیر».
گئجه‌نین یاریسی، یوخودان قالخیب کبریایی عرشین قاباغیندا دایانماق نماز قیلان انساندا ائله بیر حال یارادار کی اونو کمالا طرف چکیر. کمالا طرف آددیم آتیب منیّتدن ال چکن انسانین و اورگی‌نین حالی « وجهت وجهي للذي فطر السموات و الارض» اولسا، اونون نجاتینا اومید باغلاماق اولار.
امام صادقدن بئله روایت اولوب کی بویوروبلار: «گئجه قیامیندان ال چکمه، یازیق او آدام کی گئجه‌نین قیامی و عبادتیندن محرومدیر».